Ава шӱм - 3

ОНИСА (ӧндалын, вӱчкалтен). Мом тый, мом тый, ит шорт. Мый тыйым пешак умылем. Мыйже вет тыйым шудалмаш уке. Йӧсланен коштметым ужам, да шыдем лектеш. Ала-могай пӧръеҥ верчын илышетым локтылат. Шот огеш лек гын, тышке илаш кусно. Ӱдыретат воктенет лиеш. Кодшылан нелеш ит нал. Мый утыжденат ойлен колтышым ала-мо.
ИРИНА. Нимат огыл... Мый вет шкежат умылем: йоҥылыш корным тошкем, но шкем дене нимомат ыштен ом керт. Ынде шонымем вашталтышым: тетла марием дек ом пӧртыл, ӱдырем воктен лиям! А пелашем, мемнан дене илаш кумылжо лектеш гын, пӧртылеш... А уке гын, шке пала.
ОНИСА (Ирина ден Алёнам ӧндалын). Пеш чыным ыштет, ӱдырем. Ава шке икшывыж пелен лийшаш... Алёна, аватым акле, мутшым колышт...
АЛЁНА (шыпак шортын). Йӧра, ковай, колыштам... Мутым пуэм... Мый вет тудым тыйын семынак чот йӧратем...
ОНИСА. Юмылан тау! Кеч теже ала пиалан лийыда... Ынде мыланем каяшат лӱдыкшӧ огыл... Вӧдыр, ачай, авай! Мый ямде улам.
Ониса вуйжым эркын кӱпчыкыш пышта, сем йоҥга. Кум ош еҥ коклаште Ониса шога.


Шовыч