Имитация

Имитация


Ӝытсэ сиськем бере, Биктур газет ке уг лыдӟы, маке ужез лэсьтытэк кылемын кадь потэ. Нош туэ ар понна кышноез, Пакаез, газетлы гожтӥськымтэ. «Тӥни, оскы кышномуртъёслы», — тае тодыса, йырыз курен малпаз Биктур. Контораысен Почта Анна, пенсия сётъякуз, нялтас газетъёслы-журналъёслы гожтӥськон сярысь но ивортэм. «Ма, мон ӧй вала, мар бон ваньмыз Анна котыре люкаськизы ай та шуыса малпай ик но…» — янгышсэ ватыны турттыкуз, Пакалэн сотэк но пичи мугорыз уката пичи адӟиське — шымырске, синъёссэ улӥе лэзе. «Ӧд вала тон, маке но вераны кулэ ук, — пумитаз вазе Биктур. — Коньдонэд жаль потӥз, а со сатин басмаосыдлы ке — дурыныз кисьтӥськод. Сылалтыны медӥськод-а, шай-а соосты…» «Медӥсько, медӥсько!» — картэзлэн пумитаз арлан сямен вазь вал но — Пака чидатӥськиз, пырс гинэ ульчае потыса кошкиз. Табере тани Биктур котькуд нунал газетлы бускелез доры ветлоно луэ. Та учырен соглаш но луод кадь ини, нош со, газетлы кошкон азяз, ялан пирсэкъяса, ас понназ кышнозэ тышкаське: «Ӧд вала тон…» Тани туннэ но, лап-лап вамышъяса, газетлы кошкиз.

Мукет дыръя газетъёслы Биктур котьку но ачиз гожтӥськылӥз. Туэ гинэ озьы луиз… Со ноку но «Красная звезда» газетлы гожтӥськытэк ӧз кыльылы. Армия улонэн со али но туж тунсыкъяське. Ачиз со службазэ Москваын ортчытӥз. Ӧжыт ымаз пыре ке, вань вераськонэз Москва но армия сярысь. Берло аръёсы Москва сярысь вераськонэз уката но пуромиз. Нылыз отын дышетске. ВГИК-ын. Артисткалы. Пегӟыса ведь кошкиз, ерпечка! Любаез бертэ ке, Биктур кутскоз ини солэсь юалляськыны: «Третьяковкае ветлӥд-а ни? Ми тожо вуылӥм вал. Пыриськиз но — быдэс борддор трос гольык кышномуртлэн патретэз. Тьфу!» Пумитаз нылыз пальпотэ гинэ. Собере, ӧжыт улыса, выльысь вераськонзэ азьланьтэ Биктур: «Митингъёсы, демонстрациосы уд ветлӥськы-а? Эн но ветлы. Ыбыса куштозы». Воксё шер берта Любазы. Ярам, гожтэтъёс ке но ысъялля. Одӥгаз гожтэтаз киноын сниматься кариськонме быдтӥ шуыса ивортэм: «Осенний поцелуй», пе, нимаське. Ӝоген телевизор пыр, пе, возьматозы. «Уд но вала, утыр тодмо артистка луоз, ява, та», — гожтэтэз лыдӟыса шумпотӥз Биктур.

… Пуке тани Биктур кияз «Комсомольская правдаен». «Тожо умой газет вылэм!, — котькуд лыдӟемез бере, ас понназ пусъе со. Асьсэлы газет вуымтэен, программаез киыныз гожъяса кельтоно луэ. «Будто мынам номыр уже ӧвӧл», — нош ик аслыз но кышноезлы йыркуръяське со. Озьы, программаез гожъякуз, одӥг кинолэн нимыз солы туж тодмо потӥз: «Ма, ӵапак та киноын мынам нылы шудӥсько шуэ вал кадь ук!» Ӧз азьтэмъяськы, нылызлэн гожтэтъёсыз пушкын бугыръяськыны кутскиз. Шедьтӥз. Озьы ик вань — «Осенний поцелуй». Биктурлэн быдэс мугорыз пӧсектыса кошкиз, сюлмыз данъяськонэн пачылмиз. Кышноезлы та сярысь ӧз вера — возьмаськыса-возьмаськыса калыз быроз. Ведь та кино дырозь кык нуналэз кызьы ке но ортчытыны кулэ на. Ассэ кытчы карыны ик ӧз тоды воргорон. Изьыны вазь выдэ но бер султэ. Тае Пака шӧдытэк ӧз кыльы:

— Висьыны ӧд усьы-а тон, Биктур?

— Оломар таӵе-таӵе жадисько, йыр но берга, ӧскем но потэ — давлениен маке луиз, шӧдске…

Тае кылыса, Пака соку ик пӧртэм турынъёс быректӥз, першалэз но ӧтьыны турттэ вал но, Биктур ӧз лэзьы. Турын вузэ юытэк амалыз ӧйлась.

— Пака, нылмес телевизор пыр возьматӥзы ке, мар шуод?

Кышномурт та юанлэсь воксё куалектӥз: «Кулон азязы адямиос, адӟем потон муртсэс тодазы вайыса, тазьы верасько, — соку ик йыраз чилектӥз Пакалэн. — Инмаре-кылчинэ, эн басьты мынэсьтым Биктурме, сюдӥсьме-вордӥсьме!»

— Мар бон шып улӥськод? Мон шуисько, кык нунал ортчыса, солэсь кинозэ возьматозы. Тодӥськод на ук, та сярысь со ачиз гожтӥз вал.

— Солэсь тросгес кылзӥськид ке, со оломар но супыльтоз.

Биктурлэн тазьы вераськемез ӟечлы ӧвӧл шуыса, Пака вӧсяськыны кышнопала потӥз.

«Уг оскы, — мыняса малпаз Биктур. — А ведь мон шонерзэ верасько».

Нош вордӥськонэ, ӵапак та нуналэ киноез возьматыны кулэ вал, Биктур кышнозэ оскытӥз, зэм но туннэ телевизор пыр Любамес адӟыны кылдоз шуыса. Шумпотэменыз Пака номыр вазьыны ӧз шедьты. «Куазь туж тӧлаське, ӝытозь тазьы улӥз ке, тылэд кысоз» шуыса, Монтёр Вася доры кошкиз — марысь-мар ке, тылэз, пе, ӝегатскытэк мед тупатоз. Биктур талы пумит ӧз луы. Ачиз конторае кошкиз. Отысен, ваньмыз со шоры мед учкозы шуыса сямен, юри кызъем амал кариськиз но кутскиз:

— Оломар таӵе-таӵе тӧлаське. Тыл уз кысы-а та?

— Мар бон нуназе куазен тыл кулэ луиз ай тыныд?

— Бон туннэ телевизор пыр кино вань, «Осеннитй поцелуй» шуыса нимаське, мынам ныл отын шудэ.

— От тыныд! Али гинэ ыжпиосыз сьӧры бӧрдыса бызьылэ вал кадь но…

— От тыныд! От тыныд! — чабкиськизы контораын пукисьёс.

— Электриклы верано, тыл кысоно-мар луиз ке, медаз бабе, — та кылъёс верамын вал бригадирен, соин но, лэся, Биктур огшаплы буйгатӥськиз.

Собере со жингыртоно кариськиз бускель гуртын улӥсь агаезлы.

Вераз, сыӵе-сыӵе дырын сыӵе-сыӵе кино луоз но, отын нылы, Любае, шудоз, пе. Эшшо со жингыртӥз на мукет гуртын улӥсь апаезлы. Мукет адямиос пыр апаезлы пӧсь салам вераны куриз, конешно, кино сярысь ивортӥз.

Ӝыт пал, быдэс гуртын сяна, быдэс колхозын тодо вал ини, Мамыкинъёслэн нылзы киноын сниматься кариськем но, туннэ со киноез телевизор пыр возьматозы шуыса. Фермаысь скал кыскисьёс пудоосты азьлолэсь вазь вайыны куризы, ато, пе, киноез адӟытэк кылёмы. Клубысь индийской киноез гинэ но аналтӥзы — ӵуказелы кельтӥзы.

Нуназе бере куазь сазьтӥськиз, тӧл пуксиз, пилемъёсты ас сьӧраз нуыса кошкиз. Шундылэн пиштэмез пересьёслы кузьым выллем луиз. Дыр ӝоггес мед ортчоз шуыса, Биктур визнан ньӧр вӧлыны кутскиз, нош Пака, пудооссэ пыртэмез но скалзэ кыскемез бере, ульчаын кышноосын кылзэ шерыса пукиз. Кино вуон азьынгес вань кышноос доразы кӧжы сямен пазьгиськизы.

Биктур рос-прос интыяськиз креслое. Пака но картэз вӧзы сыӵе ик небыт пукон пуктӥз. Телевизорез со уг ик учкылы. Чик уг учкылы шуэмысь, солэн сюлмаз пыдло пыризы Штирлиц сярысь но «Ирония судьбы, или С лёгким паром!» киноос. Берло дыре тани мексикан телесериалъёсты бӧрдыса-бӧрдыса учке. Ато азьвыл шуоз вал: «Телевизор дорын пукон — азьтэмъёслэн ужзы со!» Небось, табере ачиз скал кысконзэ ик вунэтэ. Азьвыл ялан картсэ телевизорен пыкылӥз. Нош Биктур солэсь индылонъёссэ пеляз ӧз понылы, уг понылы, уз но понылы. Со ведь мае сюрем уг учкы — быръем передачаосты гинэ. Шуом, «Полигонэз», «Час пикез», «Темаез», «В мире животныхез», «Стратегия победыез», «Америка с Таратутоез» но, мылкыдыз луыку, куд-ог мукетъёссэ. «А вот тыныд, мусокае, мае но сое учкыны ӧй люкетысал. Ато кытын ма ортче, номыр уд тодӥськы ук тон…» Пака та выллем верамъёсты кылымтэ улэ аналске. «Ок, кескиесь бон та кышномуртъёс!» — огшоры гинэ, вожез потытэк, малпа соку Биктур.

Тани пуко соос креслоосазы. Реклама сотэк но пилиськыны турттӥсь сюлэмез ныж пуртэн вандэ. Мырдэм но кызьы экранэ диктор потӥз: «Нош али ӧтиськомы учкыны… Валтӥсь рольёсты шудо Любовь Мамыкина, Георгий Снегирёв…» Биктур, нылызлэсь нимзэ кылыса, син ултӥз мыньпотыса кышноез шоры учкиз — соиз но ас дуннеяз мыняса пуке. Кутскиз. Экранысь нылзэ адӟыса вуиз-а, ӧз-а — Пака соку ик чигиськыны ӧдъяз: «Остэ, восьтэммем ук, лы но ку кылем та Люба! Вань уксёзэ дӥськутлы быдтэ-а, мар-а?!» «Вуоно пенсиез солы ыстом!» — пумитаз вазиз Биктур но данъяськыса малпаз: «Быдэс дуннеын учко ук та киноез! Тодысалзы ке, кин солэн анай-атаез! Табере вань газетъёс Мамыкина Любовь сярысь гинэ гожъялозы ни ай. Юалозы: «Кытын тон вордскид?», «Кин луыса ужало анай-атайёсыд?», «Малы тон артистка луыны малпад?»… «Быгатэ ведь, ерпечка!» — картэзлэсь малпанъёссэ уретћз Пака. «Ӧй ке быгатысал, валтӥсь ролез ӧй оскысалзы, — валэктӥз Биктур. — Ӧжыт шып кариськы ни ай». «Осто, нош кыӵе серекъя, кыӵе серекъя, серемез потыса ик серекъя меда?» — аслэсьтыз каре Пака. «Чус пук, шуо тыныд!» — вожез ке но ӧз поты, куаразэ будэтӥз Биктур. Соиз ымзэ киыныз ворсаз. Пуко пересьёс, нылынызы данъяськыса. Нош кинолэн одӥг интыяз соос кыкназы ик пирсэкъяны ӧдъязы: Любазы тамак кенжытӥз но чик возьыттэк кыскыны кутскиз. «Озьы, иське?!» — интыысьтыз ик тэтчиськиз Биктур. «Телевизор пыр адӟод вал нылъёслэсь пурккетэмзэс, асламез но пӧртэм вылымтэ!» — кышетсэ тупатъянъяз вазиз Пака. Вожез потэ ке, со котьку но куалекъясь киосыныз кышетсэ тупатъяно кожа — ачиз, конешно, тае уг шӧды. Тамында ар ӵоже Биктур тае синйылтӥз ни. Куддыр озьы выремез Биктурез воксё нырдӥняз вуттэ. Та пумысен татчыозь номыр ӧз куареты на вал, нош али ӧз чида:

— Дугдод-а, уд-а тон со кышеттэ тупатъямысь?! Тани басьто но ӝуась учоге сэрпалто! Выль кен!

— Осто, табере ваньмыз понна мынам кышетэ янгыш! Сэрпалтыто мон тонэ, та кенакелэн кузьымез ай. Астэ сэрпалто мон!

Пумитаз Биктур номыр но ӧз вазьы. Шып пуко. Телевизор учконзэс азьланьто. Нош бӧрысь телевизорзэс воксё куспетӥ кысоно луизы. Любазы шыр гольык кылиськиз но пиосмурт вӧзы выдӥз. Ачиз! Ваньзэ возьматӥзы. «Озьы, иське?! Пиосмуртъёсын кӧланы но тамак кыскыны дышето-а ма со ВГИК-ады?!» — Биктурлэн вань ёзъёсыз лурк-ларк кыстаськыны кутскизы. Пака ымнырзэ кык киосыныз ик ӵоксаса пуке — оло бӧрдэ, оло серекъя… Воргорон лапас улаз визнанэн ньӧрзэ лусйыны потӥз. «Проституция… Конституция… Экранизация… Урбанизация… Канализация… — кыл йылаз мар шедем чирдыны кутскиз со. — Приватизация… Интеллигенция… Революция…» Визнан ньӧрез лусъёнъяз ик шорияк тӥяськиз. Пуртсэ но кияз чигиськыса кылем ньӧрзэ сэрпалтыса, корказ пыриз. Документъёсын папкаысьтыз ручказэ басьтыса но тетрадь лист кесьыса, «сщас возьмато мон тыныд революция» шуыса, нылызлы гожтэт гожтыны пуксиз: «Люба! Люба, шуисько! Бертыса утча — мон тонэ корка пырыны уг лэзь! Возьыттэм, сурон бам! Адямилы серемес! Марлы шуыса тыныд отчы дышетскыны пыронэз вал? Мар ӧз кельшы клубад? Клубдэ усьтӥськод-ворсаськод но — коньдон но басьтӥськод вал. Табере тани тон интыын Сёмкалэн нылыз ужа. Бызиз. Алигес сюанзы но вал. Озьы ветлыса, аслыд карт но уд шедьты ук тон. Кинлы тон сыӵе-сыӵе кулэ луод? Кин выжые тон мынӥд? Куракузы ӧд бызьы. Ма, Колялы, шуисько. Мар огпӧртэм бырйиськем луоз со? Аръёс ортчо — бӧрысь астэ бырйыны кутскозы. Маин тыныд Коля ӧз яра? Таза, чебер. Азьветлӥсь комбайнёр. Кенос тросазы юзы. Мон сямен, ӵапак киыз но пыдыз. Офоньлэсь пизэ тожо кулэ ӧд кары. Туж чупырес маке ук со! Бызьылыса-бызьылыса ужа! Чача кадь корка пуктӥз. Пеноблоклэсь. Алигес солэсь корказэ «Удмурт дунне» газетэ но поттӥллям. Ачим ӧй адӟы, адямиос веразы. Анаед газетлы гожтӥськымтэ. Яратэ тонэ Офонь Митя, весь тон сярысь юалляське: ку бертоз ни Любады шуыса, воксё нерад кариз ни. Алигес адрестэ сётӥ. Уг тодӥськы, гожтӥз-а, ӧз-а — адӟи ке, юало ай. Сыӵе эмеспи ке шедёно вылэм!.. Люба! Кушты дышетскондэ! Бертод. Уж шедёз. Тани Лепсейлэн кышноез ӝоген декретэ потоз, шуо, интыяз, пе, нокинэ уг шедьто. Завфермаен мон ачим верасько. Ужалод фермаын — али соослэн ужзы секыт ӧвӧл… Тон скалъёсын ужам маке. Берт. Тани сюрес вылэ витьтон сюрс манет коньдон ыстӥсько. Ми тонэ анаеныд простить кариськом.

Тынад атаед — Мамыкин Виктор Фёдорович».

Гожтэтсэ эшшо огпол лыдӟыса, Биктур коньдонзэ сьӧд копированной кагазэ лачмытак бинялтӥз но конвертэ понӥз. Чик ӝегатскытэк почта ящике куштыны медэ вал но — ульчаысен ваньмыз чиньыеныз возьматозы кадь потӥз солы. «Коть кыре ик эн пота», — мур лулскиз Биктур.

Кышноез вожомем мылкыдын керттӥськыса пуке, шара чирдэ:

— Адямилы серемес нылпи но будэтӥськом уга асьмеос. Шонер верало: одӥг нылпи — нылпи овӧл со…

— Ачид эркияса будэтӥд — мар паймонэз, — Биктур выльысь лапас улаз потӥз но выль ньӧр лусйыны кутскиз. «Проституция… Вулканизация… Приватизация… Прихватизация… Колонизация… Имитация…» «Имитация?» — шара юаз со аслэсьтыз ачиз. — И-ми-та-ци-я? Имитация!» — кеськиз со лапас трос. Шумпотэменыз визнан ньӧрзэ векчи юдэсъёслы тӥяса куштӥз но, пичи мурт сямен, корказ бызьыса пыриз. Пакаез сыӵе куректӥсь тусын керттӥськыса пуке — туэ ар понна скалзы муры кылем, кожалод.

— Пака, мар киноын вал — ваньмыз со имитация!

— Ой-ёй, сюлмы-кӧты! Кыӵе синмын табере асьме шоры калык учкоз! Мар улон вуиз та ми доры!..

— Да имитация со ваньмыз! — киыныз шонтӥз Биктур но выльысь телевизорез лэзиз.

— Кыс, шуисько, иське, тани астэ но, телевизордэ но маин ке лэзё! Уг, шу?! Уг, шу?! — Пакалэсь таӵе-таӵе урмем дыръёссэ туж шер адӟод. — Ортчем маке! Тӥни нош ик чупаське ни! Кыс шуисько!

— А таиз тани имитация ӧвӧл.

— Мар бон со — ими… ими… — кышномуртлэн бӧрдэмзэ кутэмез ӧйлась.

— Имитация шуэмед потэ, оветь? — кышноез вӧзы пуксиз Биктур. — Ожеговлэн но Шведовлэн валэктэмзыя, имитация — со куке… ну, тани тынад та весед зэмос марӟанлэсь, кожаськод-а? Ӧ-вӧ-ӧл… Син пӧёт со, огшоры пилинӟы буёлэн шобыртэм маке… Нош тон сое марӟан кожаса нуллӥськод. Ма, тон эн куректы, тани пенсия сётӥзы ке, мон тыныд зэмос марӟанлэсь чыртывесь кузьмало. Озьыен, асьмелэн нылмы, шонерзэ ке верано, чик но пиосмуртэн ќз кќлы — кќлэмъяськиз гинэ. Сценарийя. Вань учкисьёсты пӧяса куштӥз! Ерпечка ик вань та Люба! Вылаз ик — талант! Искусство понна мар но уд кары. Кыдёке кошкоз асьмелэн Любамы, мон верай вал, шуод- ай!..

Пака ӧжытак буйгаз. Оскиз картэзлы. Солэн со визьмо маке, тодытэк юнме шорысь уз вераськы.

Тани сылэ нылзы, пиосмуртэн ваче ӟыгырскыса. Писпуосысь ӵужектэм куаръёс усьыло… Каньылля зор кыдыра… Чупаськизы… Тӥни озьы ик кино йылпумъяськиз.

— Тодӥськод на-а, асьмеос но мон армие кошкон уе таман зор улын чупаськыса сылэммы вал, — кышнозэ каллен гинэ кустӥз ӟыгыртӥз Биктур.

— Ый, мунчокузё, весь пересь йыраз но вирыз шудэ-а, мар-а на талэн, — Пака озёлогес кариськиз.

— Мар бон воксё нырысь пумиськеммы сямен выриськод?

Пака номыр ӧз вазьы. Синъёссэ выль кен сямен улӥе лэзиз.

Гожтэм гожтэтсэ Биктур кесяса куштӥз. «Паймисько, кызьы азьло ик йыре ӧз шуккы — ваньмыз кино ук со. Малпам маке. Ӵуказе ик, райцентре йӧл нуллӥсь машинае пуксьыса, ныллы телеграфен коньдон лэзё. Пака шуэмъя, зэм но, Люба туж восьтэммемын — урдлыоссэ лыдъяны луоно», — таӵе малпанъёсын со изьыны выдӥз.

Нош ӵуказеяз, толковой словарьзэ кутыса, умой-умой учкиз, мар со сыӵе — имитация. Та словарез со ачиз ик басьтӥз вал. Кӧня керетон потӥз соин йырин — уксёзэ юыса быдтысал ке, эшшо ик. Биктур юонлэсь эсэпсэ тодэ — пыкылыны мугез ӧвӧл. Вамыштэ воргорон сюрес кузя но контораысь адямиослы валэктэ: «…Учкиськиз ай толон киноез. Туж быгатыса шудэ Любае. Сыџе имитация возьматӥз, ява…» «Мар бон со — имитация?» — огкылысь юало воргоронъёс. Биктурлы та ик кулэ. Со мылысь-кыдысь та кыллэсь пуштроссэ усьтэ: «Имитация — со ведь кескич маке. Син пӧет со. Тани, пиосъёс, тодӥськоды ук пурысь изьыме. Огшоры изьы. Изьы ке изьы, нош пельёсыз уг лэзьясько. Имитация со. Кескич маке. Син пӧет со — имитация…»