Ачиз ветлӥсь кут

Ачиз ветлӥсь кут

Улэм-вылэм одӥг пересь мурт. Пересь ке но таза мугоро вылэм со. Туннэ сое татысь адӟо, чуказеяз со туж кыдёкын мукет интыын луэ ни. Гуртэ вуэ но тур-пар гинэ ыше. Пиналъёс сое адӟыса, гуж-ж! сьӧраз бызё. Сутэмзы нош уг луы. Паймозы вылэм солы котькытчы вуылэмысьтыз, ноку жадьымтэысьтыз. Котькинлэн солэсь та сярысь юамез потэ, котькинлэн тодэмез потэ. Нош та пересь ноку уг вера вылэм.
Огпол со сюрес дуре вож-вож гуждор вылэ сиськыны пуксем. Котыр шулдыр. Тылобурдоос кырӟало. Сиськем ни пересь. Шуныт куазь солэсь мылкыдӟэ вешам. Кузь-кузь кыстӥськыса, иземез потэм. Ноку пӧсьтӥсьтэм кутъёссэ кылем но ас вӧзаз утялтыса понэм. Умме усьыса вуымтэ — со доры одӥг воргорон вуэм. Пересез адӟыса дугдэм со. Пересьлы пайме, вераськыны кутске:
— Кызьы быгатӥськод тон со пересь мугореныд дуннеез котыръяны? Мон тани ӧжыт мыныса но жади ни. Пальпотыса кырмыштэм пересь. Котыр учкем но юам.
- Кытчы нош ачид мынӥськод? Ма муген ветлӥськод?
- Мынӥсько мон кумен кумае доры, — шуэм воргорон. — Куное чортӥзы. Валэ нош ӧвӧл. Пыдъёсы жадизы, кутъёсы посьтӥзы. Малы тон нош ноку уд жадиськы?
Пересь аслаз кутъёсыз шоры возьматыса верам:
- Тани мынам котыръясьёсы. Соин мон ноку уг жадиськы, котькытчы вуисько, дуннеез котыръясько. Та кутъёсы ке ӧй луысал, мынам ветлэме но ӧй луысал ни. Соос монэ асьсэос нулло.
- Кытысь тон соосты шедьтӥд? — панмыса юам ворогорон.
- Мон ӧй шедьты, — шуэм пересь.— Мон соосты ачим кутай. Ачиз ветлӥсь карон вылысь вань тодонме понӥ, со бордын ик пересьми. Со мынам ноку уз пӧсьты, ноку уз жадьыты. Кузь сюресъёстӥ со монэ нуллэ. Пеймыт но бадӟым нюлэсъёс пыр соку ик поттылэ.
Паймыса ма вераны ӟудыса, сылэм воргорон. Пересьлэсь верамзэ сак кылзэм. Учкылэм аслаз пӧсьтэм кутъёсыз шоры. Со бордысен ик пересьлэсь ачиз нуллӥсь, ачиз ветлӥсь кутсэ лушкамез потэм.
Пересь мурт шунды шунтэмъя вушйылыны кутскем ни. Кутъёссэ йыр улаз понэм но, воргорон сярысь номыр малпатэк секыт умме усем. Сор-сор шокаса изьыны кутскем. Лушкемен вуэм со доры воргорон. Шоканы дӥсьтытэк йыр вӧзаз кыстӥськем. Калленак гинэ басьтэм пересьлэсь кутъёссэ. Аслэсьтыззэ кыльыса со вӧзы куштэм.
Шумпотыса кутча, пе, ни ачиз ветлӥсь кутъёсты. Кумен кумазэ паймытыны малпа, ушъяськыны дасяське. Кутчам ини кутъёссэ, чорк! гинэ султэм. Ӟукыр кариллям кутъёсыз, кыӵе ке мылкыдлы кельшись куара сётӥллям. Собере воргоронэз, тӧлпери ишкалтэм кадь, нуиллям. Ачиз ик шӧдымтэ со гурт пала тур-пар вамышъямзэ. Уката шумпотэм ни воргорон.
„Мон котэм нянь доры вокурат вуо",—шуыса, малпаса гинэ гуртэ вуэм ни. Утыр кумен кумазэ ортчемзэ ик шӧдымтэ. Берытсконо луэм солы. Озьы берытскыса гинэ вуэм, кумезлэн капкаез борды кроп! шуккиськем. Тыл пезьдэм синъёсысьтыз. Тач! гинэ усем капка выжые. Кукъёсыз валлань урдӥськиллям. Омырын вамышъям кадь сэзъясько, пе. Сое пиналъёс адӟыса котыраз люкаськиллям. Паймыса шораз учко, шузи мурт сое кожало. Воргоронлэн син азьысьтыз кизилиос лобамысь дугдӥллям ини. Кышкам со омырын ури-бери пулсаськись пыдъёсызлэсь, ачиз ветлӥсь кутъёсызлэсь. Пиналъёс азьын тэльмырем:
— Кыле вал мынэсьтым та кутъёсме. Юрттэ вал мыным, нуныкаосы, Мон тӥледыз кӧмечен сюдо. Ултозям уг вунэты.
Мырдэм кылиллям пиналъёс омырын пулсаськись пыдъёссэ. Соку гинэ воргорон султыны быгатэм. Пиналъёслы шумпотэмзэ верам.
— Ачиз ветлӥсь кут та. Соин править карыны тодэм кулэ. Мон нош дышыса вуымтэеным бекмыльски. Ярам тӥ вуиды но мозмытӥды. Сотэк монэ олокытчы вуттысалзы.
— Кытысь шедьтӥд? — тодэмзы, пе, потэ пиналъёслэн.
— Шедьтӥ мон сое дуннеез котыръяса ветлӥсь пересьлэсь. Шедьтӥ но табере ачим но кышкасько ни.
Тазьы верам но кумен кумаез доры гольык пыд пырем. Кутъёссэ тыбыраз ошем.
Ини куноос ваньмыз люкаськемын вылэм. Ӝӧк котыр сиыса-юыса пуко. Кудӥз кырӟа, кудӥз вераське.
Шумпотэм талы кумез. Нош гольык пыд пыремезлы паймем.
— Малы тон татчы гольык пыд лыктӥд? —юам солэсь.
- Мынам кутъёсы пичи, пыдъёсме пачкато,- пӧяса верам воргорон.—Вай кутъёсмес воштом. Тынад пыдъёсыд пичигес, тыныд тупалозы.
Кумез та кутъёслы синмаськем. Пӧсьтэмын ӧвӧл, выль кадь адско. Ваче ки шуккиллям соос, кутъёссэс воштӥллям. Шумпотыса кутчаны кутскем кум кутъёссэ. Кутчам но ӟукыр вазиллям соос, корка тыр шуккиськем. Куноос ымзэс но усьтыса вуттиллямтэ, кузё пыдысь кутъёс тӧлпери кадь асьсэос вамышъяны кутскиллям. Берзэ гинэ адӟыса кылиллям кузёлэсь. Кылӥллям на ос борды шуккиськемзэ, корказетӥ дыбыр-култыр васькемзэ. Капка усьтэмын вылэм. Ури-бери потэм та ураме. Дугдыны быгатымтэысьтыз кышкаса урам тыр кесяське, пе. Урамын кыллись ыжъёс синтэм-пельтэм палэнско солэсь, курегъёс визьтэммыса палэнэ лобӟыло. Ӟазегъёс резь-куаж пегӟо, пе. Куноос но бызьыса потӥллям. Кузёзэс кутыны туртто. Токма луэ уиськемзы, кутъёс тузон пурӟытыса вамышъяло.
Гурт дурысь кенер борды мырӟиськем кузё: кенерез уськытӥське вылэм. Ачиз нош берлань усем но пыдъёсыз омырын пулсаськыны ӧдъяллям. Куноос бызьыса вуиллям со куспын. Дэмен кутскыса кутъёссэ кылиллям. Ӵапак соку гуртэтӥ подъясь пар валэн ортче вылэм. Люкаськем калыклы паймыса дугдэм.
— Ма тӥ дауртӥськоды? Малы со кутъёсты сыӵе дэймыса учкиськоды? — зӧк куараеныз юам.
— Та кутъёс укыр чаляк ветло, — верам куно ӧтчась. — Тае кутчад ке, валэн сяна уд суты. Туж усто кутъёс.
Подъясьлэн кырым пыдэсъёсыз ик лыдӥллям. Малы уд басьты, пе, таӵе паймоно кутъёсты.
— Вуза мыным та куттэ, - курем со, — мынам азьтэм ужасе вань, мон солы та кутэз сёто. Весь мед бызьылоз, сэрыт мед ужалоз.
Куно ӧтчась тае гинэ возьмаса улэ вылэм. Малы уд вуза та синтэм-пельтэм нуллӥсь кутъёсты! Басьтӥсь шедем бере, дыртыса верам со:
— Кык куз кут сётӥд ке, вузало.
— Me, басьты, — шумпотыса сётэм подъясь дуно курымтэысьтыз.
— Нош та кутъёсын йырин изъян адӟоно луид ке, мон кыл уг сётӥськы, — тодытэм сое куно ӧтчась.
— Ярам, — шуэм подъясь. Ачиз ветлӥсь кутъёссэ басьтэм но, ворттыса кошкем.
Кӧттырмостэм вылэм та подъясь. Пинал медозэ дас мурт мында ужатыны дась улэм. Дораз бертыса гинэ вуэм но, соку ик кутъёссэ медоезлы кутчаны косэм.
— Me, кутча, ӝоген валъёслы суралты. Собере ву вай, собере нюлэскы пу кораны мын. Лымшорозь бадӟым возэн пу гидкуазе вуттэмын мед луоз. Валад-а?
— Валай, — шуэм медоез.
Подъясьлэсь сётэм кутъёссэ кутчам, ӟукыр вазиллям кутъёсыз. Пызь омыртыны ведра но кутыса вуттымтэ медо, сое кутъёсыз пызь кеносэ вуттӥллям ини. Созэ-тазэ валаса ик вуттымтэ на подъясь, медоез пызен тыр ларе бекмыльскем. Пызь пушкы гаӵоло усем со. Ну, пе, пыдъёсыз омырын вамышъяло! Пызь пурӟе, тӧдьы пилем жутске! Подъясь отчы кызьы вуэмзэ ик тодымтэ ни. Кесяськыны ӧдъям:
— Пунылэн пиез! Ма тон дауртӥськод? Пызьме изъянтӥськод?
Нош медоез пызен наштаськеменыз уг ик адскы, пе. Нырпелесъёсаз, ньылоназ пызь тырмемын.
— Омырез ӵыжасько, лэся, — синъёссэ усьтыны быгатытэк мырдэм вазем со. — Ой, шоканэ быриське ни.
— Сёто мон тыныд омырез ӵыжан, — медоезлэсь пыдъёссэ кутыны дауртэ, пе, подъясь. — Судэ сёто! Тюрьмаын сисьто мон тонэ!
Пал пыдтӥз медозэ кутэм но лар пушкысь кыскыса поттэм. Медоез аналскыны турттэ кожаса, подъясь ачиз солэсь кутъёссэ кылем. Кылем кутъёсыныз медозэ жугем. Ачиз весь кесяськем:
— Сёто мон тыныд аналскыны турттон! Азьтэм! Ӝог выронлэсь, ӝог ветлонлэсь кышкад. Дышето мон тонэ та кутъёсты нуллыны!
— Мон уг быгатӥськы та кутъёсын ветлыны, — тэльмыре, пе, медоез.
— Дышето! —кесяське подъясь. — Тани ачим утчало кутчаса. Тазьы верам но ачиз кутчаны кутскем. Ӟукыр шуиллям кутъёсыз. Отӥяз ини пал кыл но вераны вутскымтэ со. Кеносысь тэтчыса сямен потэм. Шуак гинэ чильдол поттыса уробо доры вуэм. Уробо борды кутӥськыса дугдымы турттэ вылэм, кутъёс сое азьлань ури-бери нуиллям. Суйёсыз ик ишкалско вылэм солэн. Шулӟектэм, дэра кадь косэктэм та, йырсиез меӵыр ӝутскем. Гидкуазь тыр чирак кеськыса гинэ вуэм, кутъёсыз сое коргид доры вуттӥллям ини. Тач! гинэ шуккиськем со борддор борды. Отчыяз ик супрак усем, шонерак парсьёслы кисьтэм пожву пӧлы. Нош ик омырын пулсасько, пе, пыдъёсыз. Нош ачиз кулыса коскам кадь луэм. Медоез вуэм со доры. Озьы но тазьы дауртыса кутъёссэ кылем. Мырдэм сэзьдӥськем подъясь. Кутъёс шоры учкыса кесяськем:
— Окты сое, сэрпалты. Кулэ ӧвӧл со мыным. Кораса быдты сое. Тылын сут.
Ачиз чорк! гинэ тэтчыса султэм но, медоез дорысь бызьыса, кытчы шедем отчы кошкем.
— Дышетӥд дэся,— медоез серекъяса кылем.
Подъясез шедьтӥллямтэ ни. Оло вуэ выем со, оло нюлэскы йыромыса бырем.
Медо ачиз ветлӥсь кут сярысь номыр но верамтэ. Кутэм но гидкуазь шоры сэрпалтэм. Ӧжыт-а, кема-а кыллем со отын — тодмо ӧвӧл. Ог нуналэ подъясьлэн нылыз гидкуазяз лёгаськонъяз та лошъяськыса кыллись кутъёсты адӟем. Чеберезлы синмаськем но кутчаса утем. Куазь чебер вылэм. Возьвылэ, шур дуре мыныны мылкыд кыске, ӟукыр вазиллям кутъёс. Собере ини подъясь нылэз синтэм-пельтэм нуыны кутскиллям. Чик сюресэз ик уг чакла, пе, ныл. Куд пала нуо кутъёсыз — уг пумитъяськы. Кышкаменыз юрттэт курыны ик дӥсьтымтэ. Канаваос вамен тэтчаса потылэ, пе. Усьылэ но нош султэ, нош нуо кутъёсыз. Шурез но колатыса потытӥллям ни нылэз. Котмем деременыз валче нюлэскы вутто ни, пе. Радтэм кесяськыны кутскем со. Нош кутъёсыз резь-куаж гинэ вамышъяло. Нюлэскын писпуос борды тын-тан шуккылӥськем бераз, лӥял борды канжаськыса пограм. Пудо возьмась пичи пи шедьтэм пыдъёссэ сэзъяса кыллись нылэз.
— Ma тон сыӵе кыллиськод?
— Та кутъёс катьтэммытӥзы монэ, — шуэм ныл. — Мозмыты монэ соослэсь. Басьты соосты аслыд.
Пудо возьмась пичи пилэн кылэмез вылэм ини та ачиз ветлӥсь кутъёс сярысь. Манерзэс но соослэсь кылылэм.
— Та мынам ужам ту ж яралоз, — шуыса кутьёссэ кылем со.
Озьы тӥни ачиз ветлӥсь кут пудо возьмась пичи пи кие шедем. Сямзэ валам со та паймоно кутлэсь. Пудоез ышыку гинэ кутчалоз вылэм. Пудозэ шедьтэм бераз гачоло выдыса кылёз вылэм. Со дырысен солэн одӥг пудоез но ышымтэ ни. Со дырысь кузь сюресъёслэсь кышкамтэ. Со дырысь жадёнэз валамтэ. Улытозяз трос муртъёсты ветлыны дышетэм.