Baltıyk buylarında

(Kapitan Ähtämovka)

Davıl çıksa, diñgez şomlı bula:

Dulkın sikerä korab östenä,

Kapitannıñ küze utka äylänä,

«Akkoşın» ul

Dulkınnarga bora tiz genä.

Aksıl toman kaplıy beten cirne,

Berkem bulmıy tirä-yagıñda,

Küzen tekäp, yalgız utlar gına

Karap kala uzgan çagıñda.

Diñgez ükerä... Maçta şar-şor kilä,

Ah, şul çakta

İnde nişliseñ?..

Alda sine, bälki, çiksez bähet,

Bälki... ülem kötä...

Belmiseñ...

Ä şulay da yöräk zur davılga

Karşı bara yäşäü ezennän.

Hislär oçıp barır cirgä citä,

Anda: şatlık, bähet belderä.

İseñdäme, Ähtäm,

Ütkän yaznı

Yaña bozlar akkan çagında,

«Çayka» belän yırak yulga çıktık,

Şaulap akkan Neva yarınnan.

Sin kapitan ideñ,

Min koçegar,

Kön dä, tön dä mazut eçendä,

Kümer töyäp könnär ütä ide

Parohodnıñ kaynar miçenä.

Sin haman da äle «Çayka» belän

Dulkın yarıp Baltıyk buyınnan,

İlebezneñ yırak kuyınına

Tovar taşıp cäyne cäylätäseñ;

Ah, nilär bar sineñ uyıñda?

Timer yöräk belän Baltıyk buylap,

Ütep bargan çakta korabta,

Taş kalalar, kırlar, urmannarnıñ,

Üsü adımnarın karap bar.

Min onıta almam sine,

Bezneñ gomer

Bergä ütär, bergä ut yotar.

Soñgı davıl kilsä, su östendä:

Sin kapitan,

Ä min koçegar.

Kaytmas inde

Ber tön ide,

Kömeş çäçen tarap,

Ay yılmaydı zäñgär kügendä.

Ay nurları sarı kazlar kebek

Yözep yörde İdel östendä.

Yar buylatıp iskän cillär sineñ

Bitläreñnän übep söydelär.

Äy, şul çakta,

Kiläçäkne uylap,

Şatlık yandı minem küñeldä.

Zäytünä,

Sin şunda berençe kat

Miña bähet birdeñ, akıllım.

Nazlı yäş baladay irkälänep,

Minem koçagıma atıldıñ.

Ah, ul könnär

Akılım diñgezendä

Onıtılmaslık ezlär kaldırgan,

Ah, ul könnär

Yarsu yörägemne

Sagındırır öçen yandırgan.

Zäytünä,

Ul yaznıñ maturlıgı

Mäñge kalır minem küñeldä.

Karlar erer,

Tagı da yaz kiler,

Läkin kaytmas inde ul könnär.