Вӧсь

Вӧсь... Малы сыӵе вӧсь мыным? Котьку но, котькытын но – вӧсь!

Шуак луыса сайкасько ӵукна. Быдэс уй! Кӧня кыстӥськиз со? Минут-а, кык-а? Уй ӵоже, нунал ӵоже, ар ӵоже, даур ӵоже люкаськем йырйись малпанъёс выльысь но выльысь лэчыт шиен бышкалско сюлэмам... Чиданы луонтэм вӧсь!

Кыӵе ке кышкыт фильмын сямен, син азьтӥм пӧртэм тусбуйёс, улон учыръёс ортчо...

Ненег тӧдьыгырлы тӧлъя дырекъяса сылэ. Сое урмем трактор лёгаса кошке...

Вӧсь!

Секыт киын корам векчи кызьпуос, берпум осконэн чильпыраса, вӧзазы сылӥсь эшъёссы борды вайёсынызы ӝабыръяськыса пограло...

Вӧсь!

Вирын орсмись мумы кионлэн кезьыт кӧтыз борды ялан мырӟиськыло на муспотон комокъёсыз – шудтэм пиосыз...

Вӧсь!

Егит пиосмурт коньдон понна ас утись-вордӥсьсэ куштэ, вань лулозэ ӵушканы дась луэ...

Вӧсь!

Мудор азьын вӧсяськыса бӧрдэ анай: чик кулэтэм жугиськонын бырем пизэ дораз ӧте, куасьмем мыжыкъёссэ кырмыса, котыр улонэз карга...

Вӧсь! Вӧсь! Вӧ-ӧсь!

Малы со вӧсен висисько? Малы вӧсь мыным?!

Шат ненег тӧдьыгырлы – мон? Дырекъяса, лысву синкылиосыныз быльыраса погрась писпу – мон? Сюлэм чеберзэ ыштэм пиосмурт – мон? Мудор азьын вӧсяськись анай но – мон? Мон!

Вӧсь!!!

Со вӧсе юн нюжаосын герӟаськемын Музъемлэн пӧсь сюлмыныз. Музъем ӝуштэ, курыт зорен-синвуэн бӧрдэ. Нош мон Музъем вылтӥ вамышъясько, мон – нылыд тынад, Музъеме! Соин ик – вӧсь!