Маскара чокморъёс

Маскара чокморъёс


Окси маке кадь ик кӧшкема пеймытлэсь. Соин ик ӵем дырья кӧлыны песяез вӧзы кариське. Туннэ ӝыт изьыны выдэмзылэсь азьло Лелина песянай ӝӧк вылэ тӧдьы ӝӧккышет вализ, собере нянь сукыри но сылал куӵы пуктӥз отчы.

— Малы-о озьы тыриськод? — абдраз пичи мурт. — Нуналлы быдэ озьы уг каро ук.

— Ӵуказе — Ымусьтон. Та дыре вашкала сямъёсты туж ик чаклась ӧвӧл ни. Нош мынам нэнэе, тынад пересь ноноед луэ ини со, Ымусьтонлэсь азьло ӝыт мильым одно пыже вал. Така яке ӟазег сӥлен пӧзьтыса, ӝуко мильым пӧралляз, — песянай нуноксэ вӧзаз султытӥз но, ым пушказ маке шыпыртыса, мудор шоры вӧсяськыны шӧтаз. Мае ке валаса кадь, Окси но шып кариськиз. Валесэ каръяськемез бере нылаш умме кематэк ӧз усьы. Нош огшап ортчыса, ӵашетэм куараослэсь выльысь сайказ.

— Ма со, песи? — мӧйыез борды ӝиптӥськиз покчиез.

— Эн кышка, нуныкае. Со озьы вожоос гуртэтӥ вань кырсьсэ улляса ветло,— буйгатӥз нылашез песянай.

Со куспын, бодыосынызы, гур суранъёсынызы йыггетыса, корка пыризы — кин вашкала дэремен, кин мыддорин берыктэм шубаен — пӧрмытскемъёс. «Та коркась — вань уродзэ улляськом! Кыш! Кыш!» — гур суранэныз шоналляське вожоослэн азьветлӥсьсы. Ӝужыт мугоро, оло пиосмурт, оло кышномурт со, ымнырзэ тӧдьы возъет ватэ. Мукетьёсыз чокморъёс кыл-куаразэс поттытэк экто, бодыосынызы выже шӧтэм зол йыггето.

Окси шоканы ик уг дӥсьты ни. Валесаз пуксем но шобретэн ватӥськем, синъёсыз гинэ огпалтӥз чиляло. Но тани пӧртмаськись пырак Окси доры матэктӥз:

— Нуо! Сьӧрам нуо! — суам ымныро кӧшкемыт шушмара кутыны медэ ни нылашез. Окси чир! кеськиз но шобретсэ йыр вылаз кыскиз.

— Фира! Ма озьы пичи муртэ кышкатӥськод? — бубизлэсь ваземзэ кылӥз нылок. Соку ик сое кужмо воргорон киос шобретэныз валче гадь борды ӝиптӥзы.

— Я, я, буйгатскы, нуныкае. Фира акаед со озьы эзэр-безэръяське.

Бубизлэн Фира сузэрез кылем сӥзьыл бускель гуртэ бызиз. Нош кызьы со вожо луэм? Тазэ пичи ныл нокызьы уг вала?

Со куспын Оксилэн нэнэез, чебермам графинэз ӟыгыртыса, йӧспӧртэм куноосты утялтыны кутскиз. Берло дыре нэнэез малы ке зӧкомиз. Соин сэрен, вылды, ӵӧж выллем кычылляське. Нэнэез сьӧры кияз тэркыен ӵужаез ӝуксэ пӧртмаськисьёслы веръятыса ветлэ.

— Асьме палъёслэн сямзы сыӵе, — абдрам тусо нылзэ вылэ ӝутӥз Васинь агай.

Окси табере вожоос шоры вылӥысен улӥе учке. Али солы номыр кышкыт ӧвӧл ни. Нош бубиз, чокморъёсты ваньзэс тодманы турттыса, ымныръёсысьтызы возъетъёссэс ишкалтыны выре. Соин но, лэся, пӧртмаськисьёс огез бӧрсьы мукетыз ӧс сьӧры ышизы. Фира акаез гинэ бере кылем:

— Вождэ эн потты, Васинь. Вожоослэсь Окси кышка шуыса, мон ӧй малпа, — суам бамзэ со ӵушылэм ини.

— Тон мынэсьтым эн кӧшкема ни, ява, нылы, — Оксиез бубиз берен валес вылэ пуктэм бере, Фира тыбыраз вешаз.— Вожоос сокем кышкытэсь ӧвӧл, адямиослы шуд но тазалык сӥзё.

Акаезлэсь оло янгышам, оло пыриськись куараен вераськемзэ нылок паймыса кылзэ. Та дырозь солы нокин но вожоос сярысь ӧз вералля на. Песянайзэ ёртытэк уз луы.

Песянаез бордаз выдэм бере ик нылаш вожоос сярысь юалляськыны ӧдъям вал но, мӧйыез покчизэ могӟытӥз:

— Бер ини. Уйин соос сярысь мадиськыны уг яра — сьӧразы ву улэ нуозы...

Оксиез суам ымныро кӧшкемыт вожо уйбыт уйылӥз. Соин, вылды, ӵуказеяз ӵукна нылаш мылкыдтэк султӥз. Ӝӧк сьӧры соос ваньзы ӵош пуксизы. Нэнэез Оксилы вазенгес вераз вал ини, нылаш каникулэ потӥз ке, со но отпуск басьтоз шуыса. Нош бубиныз акаез малы ай туннэ уж дуразы мынӥллямтэ? Нылызлэсь малпанзэ кылэм кадь, бубиз валэктӥз:

— Туннэ Толсур, яке, кызьы шуэ песяед, Ымусьтон праздник. Соин ик тонэ, нылы, вазь ӵукна ӧм сайкатэ. Толон ӝыт дорамы вожоос пырам бере кыӵе кӧлӥд ай? Туж кышкад-а со пӧртмаськисьёслэсь?

Окси зэмзэ вераны малы ке керпотӥз:

— Пичи но. Соос сыӵе тумошоесь адӟисько.

— Ма, песяез вӧзын кин-о кышкалоз? — мыньпотӥз нэнэез, нылызлэн тэркыяз ӝуко мильым тырон сяменыз.

— Нош тон, Оля, толон укыр бер бертӥд, лэся? — покчи нылыз шоры вазиз Лелина песянай.

— Ми, куиньнамы, вожоослэсь лыктэмзэс шӧдон понна сюрес воже султӥм, — мильымзэ сиён куспетӥз ик мадьыны кутскиз Оля. — Ӟепъёсамы чеснок йыр тырим, киосамы турчико кутӥм но возьмаськом — кытысен ма кылӥськоз.

— Нош котыртӥды гож ӧд лэзе-а, мар-а? — кушетскиз Лелина песянай.

— Ма кызьы сотэк? Ато вожоос бичатыса виёзы ук, — веранзэ азьланьтйз Оксилэн нэнэезлэн покчи сузэрез. Озьы час ёрос сылэммы бере пыдъёс юзэктӥзы, нош, пуны куара сяна, номыр ик уг кылӥськы. Соку вӧзам сылӥсь Мани шыпыртэ: «Оля, кылӥськод-а? Пурга-Бусо палась гырлы куара кылӥське кадь». Нош мон номыр уг шӧдӥськы. Света но чалмыт улэ...

— Иське, Маниды туэ бызёз ук, — пальпотӥз Лелина песянай.

— Бызёз, пе, ини. Так-то солэн туганэз зэмзэ ик Пурга-Бусоысь. Нош со гырлы куараез берлогес ми но Светаен кылӥм. Гуртысьтымы пиос милесьтым тунаськыны мынэммес тодӥллям но кышкатыны малпаллям. Эшшо одӥг час мында ӟонгыраса сылэммы бере кытысь ке ӧй вал мыддорин дӥсям шубаосын пиос потӥзы но милемды лымые месыны выро. Ми соос шоры турчикоосынымы ожалляським, нош пӧртмаськисьёслэн кӧберзы ик ӧвӧл.

Окси, шоканы дӥсьтытэк, мӧйыослэсь мадемзэс кылзэ. Паймоно кадь: асьсэос бадӟымесь ни ке но, пичиос музэн дарманьто ук.

— Нош мон Васиньлы быземелэсь азьло ай, уйшор вакытэ, лапас улысь пис пыртӥ вал. Уло-ваё, кырыж-конгыль. Эшъёсы серекъяло: «Ну, Зина, картэд сӧсыр луоз». Инмарлы тау, картэн мыным удалтӥз, — Оксилэн бубиз шоры мусоясь синъёсын учкиз нэнэез. — Нош кылем арын ошмесысь ву ӟузьыса вайи но, пуньые кисьтыса, корказе поттӥ. Ву вогыриё кынмем. Таиз тунаськонэ зэмаз, — нэнэез малы ке но быгылес кӧтсэ маялтӥз. Кемалась ини ваньзылэн кӧтсы тыремын, нош ӝӧк сьӧрысь султыны уг дырто. Со куспын корка пырись луиз.

— Митрей кудо, туж умой тынад пыремед. Ымусьтон дыръя, пе, нырысь пиосмурт мед пыроз. Ойдо ай милемын ӵош «мешок ӝутъяны», — Лелина песянай кытӥ-мартӥ пукон вуттӥз. — Толон ӝыт вожоос тӥ дорады но пыразы-а?

— Пыразы. Ой бен тумошоесь ук, — мильымен ӝук кутыса, мыньпотӥз Митрей кудо. — Нош туннэ кенэн кышноен ӵукна вазь ик гурезе нискыланы кошкизы. Етӥн, пе, мед удалтоз. Оломалы но оско ук та кышноос.

— Озьы эн шу, Митрей кудо. Вашкалаослэсь сямзэс вунэтыны уг яра, — кунэрскиз Лелина песянай. — Пересьёс уго Йӧвылэсултонозь озьы пӧртмасько, тунасько, нискылало, ог-огзы доры куное ветло вылэм. Тани милям нэнэ шуоз вал: «Вожо дыръя маскаръяськыса, шулдыръяськыса, ваньмыныз тупаса улоно. Кызьы арез кутскид — озьы ик улод». Нош Крещение, асьме сямен Йӧвылэсултонэ, ву дуре гинэ но нуназеозь ветлыны ӧз лэзьылэ. Асьсэос нош, шур дуре васькыса, йӧ вылэ тӥрен кирос карылӥзы но люкмес лэсьтылӥзы. Вожоос со пасетӥ йӧ улэ мед кошкозы шуыса, вылды.

— Песи, нош вожоос зэмен ик вань-а, мар-а? — чылкак абдрам Окси юатэк ӧз чида.

— Ма, вожоосты нокин та дырозь адӟымтэ ай. Нош вашкалаослэн осконзы калык пӧлын али но юн возиське. Коммунистьёс дыръя, ма, пӧртмаськыса ветлӥсьёсты уггес ик ярато вал но... Нош вож кыз котырын пӧртмаськон — со мар-о кожаськод? Сыӵе ик вожояськон. Таиз понна ини оло коммунистъёс «янгыш», оло Пётр эксэй. Со ук выль арез 1-тӥ январьысен (асьме сямен — толшор) лыдъяны косэм. Котькуд тӧро ас валамезъя косъяське уго. Озьы ке но асьмелы вашкала ӵыжы-выжыосмылэсь сямъёссэс вунэтыны уг яра. Эшшо ке кулэмъёс уродъяськозы я мар, — песянай ӝӧк сьӧрысь султӥз но гадяз кирос тырыны шӧтаз. Нош Окси ас понназ капчияк шокчиз: иське, вожоос зэмзэ ик кышкытэсь ӧвӧл. Мӧйыослэн но пичи дырзэс тодазы вайылэмзы потылэ, дыр, ук — мед ойдо пӧртмаськозы со маскара чокморъёс.