Мар луоз ӵуказе?

Мар луоз ӵуказе?

Верос



«Адӟись луиз ке бордгазетэз кесемме? Соку чидандэ чида. Ӵуказеяз ик линейка азе поттозы монэ. Атайлы но вератэк уз кельтэ «ӟеч уже» сярысь… Дугды ай, малы йырам таӵе малпанъёс лыкто? Ку мон кышкась луи? Зверевъёс лудкеч сюлэмоесь ӧвӧл. Малпам ужзэс быдэстытэк уг кельто. Тани оп! шуытозь бордгазет интыяз уз луы ни. Вообще-то, дыртыны кулэ меда? Дыртӥсь мурт юмоке сюре, шуо. Нош ик лыдӟо ай мон сярысь гожтэмзэс: «Кылем арнянуналэ уллапалась пиос нюлэскы тыпымульы бичаны мынӥзы. Кема ик ӧз ветлэ, мешокъёссэс ӝог тырмытӥзы. Собере вамыштӥзы дор палазы. Тӥни соку Сергей Зверев тылпуэз синйылтӥз. «Нюлэс ӝуа!» – кеськиз со. Ачиз, чик ӝегатскытэк, писпуос пӧлысь ӝутскись ӵын пала бызиз. Сергей сьӧры дыртӥзы мукетъёсыз но пиос. Тылпуэз кысыны соос быгатӥзы. Молодцы, пиос!»

Чебер гожтэмын кадь, но валантэмгес. Малы ке мынэсьтым нимме гинэ поттӥллям. Озьыен, мон герой! Нош мукетъёсыз? Соослэсь но фамилиоссэс гожтыны луысал ук! Монэ редакторе пуктысалзы ке, таӵе янгыш ӧй лэсьтысал. Нюлэскын луэм учыр сярысь но воксё мукет сямен гожтысал. Кызьы? Созэ мон уг вера нокинлы но».

Сергей Зверев кема сылӥз малпаськыса школа коридорын. Тодаз вайиз азьвыл аръёсы бордгазетэ поттылэмзэс. Та дырозь Сергеез огпол но ушъяса ӧз гожтэ вал. Со понна йырзэ но кур ӧз карылы. Ӧвӧлтэмзэ ӧз гожъялэ угось. Нош туннэ… Ӧз чида пияш, школа бордгазетэз кесьытэк. Нокин ӧз адӟы солэсь озьы дауртэмзэ. Школаын дышетӥсьёс но, пиналъёс но ӧй вал ни.

Сергей со нуналэ лумбыт куашкам мылкыдын ветлӥз. «Мар луоз ӵуказе?» юан пияшлэн йырвизьмаз лемтэй кадь мертчиськиз. Ассэ олокызьы но буйгатыны выриз ни, пайдаез ӧвӧл. Уг кошкы йырысьтыз со юан…

Уйвӧтаз но Зверев акылес юанэныз пумиськиз. Со табере йӧн-йӧн тусо луэм. Очкиен. Школалэн директорезлы кельше. Сергей шоры ялан пальпотыса учке. Тани со матэктӥз пияш вӧзы:

– Зверев, тон туннэ бордгазетлэн редакторез.

– Мон?

– Эн паймы сокем. Одӥг нуналлы гинэ редактор луод. Кесем бордгазет интые выльзэ поттод.

– Тылпу сярысь но ачим гожтом-а?

– Ачид… ачид… ачид…

Бордгазет поттыны Сергей кема выриз. Тужгес но шуг йӧтӥз солы тылпу сярысь заметка гожтон. Курадӟемез юнме ӧз луы. Суредэз вань, гожъямъёсыз лыдӟымонэсь. Мар кулэ на? Бордгазетэз пӧрмиз. Зверев выльысь лыдӟиз ачиз но эшъёсыз сярысь гожтэмзэ: «Лӧптылонлэсь кытчы вуттэмзэ мон умой валай кылем арня нуналэ. Соку ми, уллапалась пиос, нюлэскы тыпымульы бичаны мынӥм.

Писпуос пӧлтӥ ветлонъям, эшъёсме син азьысьтым ыштӧ. Ӧй, ӧй йыромы. Нюлэс сокем бадӟым ӧвӧл. Одӥг пол шултӥ ке, пиос соку ик вазиськозы.

Мешокме тыпымульыен тырмытэме бере мон ялкарыны пукси. Тӥни соку тодам лыктӥз кисыысьтым спичкае. Писпуос пӧлын ик тылскыны малпай. Музъем вылысь кӧс куаръёсты огазе люкай но кенӝытӥ. Соосты тыл гомак басьтӥз но… куинь метр кеме ӝутӥз. Сюлэмы ик оломар луиз. Со вакытэ кытысь ке тӧл пельтӥз, мынэсьтым тылскемме кир-пазь кариз. Учкисько – отын но, татын но тыл. Пиджакме куштыса, тылскемме кысыны кутски. Нош тыл уг сётскы. Кый кадь азьпала мынэ. Одӥг интыетӥ кысыны ӧдъясько, тыл мукет палтӥ гомӟе. Кышкаменым ма карыны но уг валаськы ни. Сюлэмы тани-тани пилиськоз…

Мешокме кутыса, ӝоггес потӥ нюлэс дуре. Эшъёсы отын ӧвӧл на. Ӧтьыны малпай вал ни. Ӧй вутскы – нюлэскысь потӥзы Ваня Кузнецов, Митька Егоров но Олег Вахрушев. «Кызьы пиослы тылпу сярысь ивортоно? Ӧз адӟе меда соос мынэсьтым тылскемме? Номыре ватытэк верай ке? Соку монэ кышкась уз шуэ-а?» – пӧртэм юанъёс бергазы мынам йырам. Нош со вакытэ ӵын пумен вылӥе ӝутскыны кутскиз. Ӧй чида ни кеськытэк: «Пиос, тылпу!»

Сергей Зверевлы вӧтсэ пумозяз адӟыны ум люкетэ. Уйвӧтаз со тылпу поттэмез сярысь алдаськытэк мадиз. Нош мар луоз меда ӵуказе?