Малы адямилы кур адӟыны кылдэмын

Малы адямилы кур адӟыны кылдэмын


Малы адямилы вань улытозяз кур адӟыны но пумаз кулыны кулэ — пересьёс тазьы валэкто. Кылдытэмез бере Инмар адямилы тазьы верам:
≪Вот, мон тонэ бусы шоры пукто но, котькыӵе сьӧсез-кабез, тылоез-бурдоез тынэсьтыд вирдэ поттыны лэзё. Соослы астэ неномыр но карыны ӧд ке сёт,
тон туж но туж ӟеч улод, неноку но уд кулы, сиён-юон но, дӥськут но тыныд утчаны кулэ уз лу. Соос тынэсьтыд вирдэ поттыны быгатӥзы ке,
тон кӧня ке улыса кулод, вань улытозяд туж кур адӟыса улод, вир усьытозь пӧсяса ужатэк, аслыд сиён-юон но, дӥськут но уд шедьты,
весь улэмед-вылэмед та понна луоз≫.
Мар ке вань дунне вылын кӧшкемыт, зурод быдӟаесь сьӧськабъёс, вузэменызы музъемез сюрмытыса, чисто со доры лыкто.
Мар ке дунне вылын вылэм тӧл вуко бурд кадь бурдо тылобурдоос — чисто со вылэ ширто. Адями ненокызьы но соослы уг сётӥськы.
Бервылаз ӟольгыри но со доры лыктэ.
— Эй, — серекъяса шуэ адями. — Инмар кадьёсыз ӧз быгатэ но, тэй кадез быгатоз-а?
Лык али, тонэ мон уг улляськы! Адями кылзэ но быдтымтэ, ӟольгыри, ≪ӟил-лирик!≫ гинэ
шуыса, адямилэсь небыт йырпыдэссэ кукчалтыса, вир поттӥз.
Ӟольгырилы тазьы сётскемез бере, адями Инмар верам сямен ик кулылэ но, вань улытозяз ялан сиёнлы-юонлы, дӥсьлы-кутлы ужаса улэ.