Кӧжы возьмасьёс

Кӧжы возьмасьёс



Улэм-вылэм одӥг пересь кышноеныз. Соослэн куинь пизы вылэм. Самой пичиез — визьтэм Ванька. Соослэн кизем кӧжызы вылэм но, весь сое Тури сие, пе. Собере атайзы, ма карыны ёрмыса, бадӟым пизэс уин возьмаськыны косэм. Соиз мынэм. Возьма, пе, ини. Огпал пумаз мынэ ке, Тури мукет пал пумаз кошке... Бертэ, пе, ини ӵукна.
— Ворез кутӥд-а? — юа атаез.
— Ӧй, — шуэ таиз.
Озьы со Туриен нерад луэм, кутэмез луымтэ, уез уйбыт сямен курадӟем ке но.
Ӵуказеяз атайзы шоретӥзэ пизэс лэзем. Таиз но, бадӟымез кадь, ворез кутыны быгатымтэ.
Собере вуоно уезлы визьтэм Ванькаез лэзем ни. Соиз мынэм но кӧжызэ ишкыса огинэ люкам. Ачиз нош со кӧжыезлэн пушказ пырем. Тури лыктыса пуксем.
— Эк, уката умой кариллям ук мыным сиыны! — шуэ, пе, кузь кук Тури.
Сиыкуз сое Ванька куктӥз кутэм.
— А-а, умой-а? — шуэ. — Сюрид табере мон кие, виытэк уг лэзь ни.
— Пожалуйста, эн виы вал, — куриськем Тури. — Мон тыныд туж ӟеч каро! Ойдо мынам коркам, — шуэ, пе, та визьтэмлы. Визьтэм мыноно кариськем. Нюре нуэ ини тае Тури. Нуэм но ӝӧккышет сётэм.
— Тани та ӝӧккышетэз "вӧлдӥськы!" шуид ке, вӧлдӥськоз но — котькыӵе сиён-юон потоз, — шуэм.
Визьтэм басьтэм но кошкем. Дораз бертыкуз, со йыромем — нюръёстӥ ветлыса-ветлыса, весь дэриесь луыса бырем. Озьы ветлыса, одӥг гуртэ вуэм но одӥг пересь кышно доры кӧлыны пырем. Собере сое мунчо эстыны косэм. Пересь кышно эстэм но, мунчоез вуэм бере, Ванькаез мыныны косэм. Мунчое мыныкуз, Ванька со ӝӧккышетэзлы "эн вӧлдӥськы!" шуыса кельтэм. Пересь кышно, солэсь тазьы шуэмзэ кылыса, Ванька мунчое кошкем бере, "вӧлдӥськы!" шуэм. Ӝӧккышет вӧлдӥськем но — со вылэ весь олокыӵе но сиён-юон потэм. Соку пересь кышномурт, солэсь та ӝӧккышетсэ басьтыса, со интые аслэсьтыз со кадь ик ӝӧккышетсэ понэм.
Ванька вуэм ини мунчоысь. Собере дораз но бертэм.
— Ӧть али мон доры агайёсме, — шуэм атаезлы.
Атаез ӧтем но, агайёссы лыктӥллям. Соос вуэм бере, Ванька ӝӧккышетэзлы "вӧлдӥськы!" шуэм. Ӝӧккышетэз чик уг вӧлдӥськы.
— Малы ӧтид милемыз? — шуиллям агайёсыз но сое жугыса кельтӥллям.
Ванькалэн Турилы вожез, пе, потэ ини. Ӵуказеяз со нош ик кӧжы возьманы мынэм. Нош ик кӧжызэ люкаса, ачиз пушказ пырем. Тури, нош ик лыктыса, шумпотыса сиыны кутскем. Ванька куктӥз кутыса кеськем:
— Табере нокызьы но виытэк уг лэзьы ни! Малы тон алдад монэ?
Тури куриськыны кутскем:
— Лэзь вал, табере уг алда ни.
Ванька лэзем но, ӵош мыно — Турилэн караз, нюре. Турилэн караз вуиллям но, Тури солы нушы поттыса сётэм.
— Та нушыез "тышка!" шуид ке, весь тышкалоз. "Дугды!" шуид ке, дугдоз.
Ванька нушызэ басьтэм но кошкем Тури дорысь. Бертыкуз со нош ик, бертон сюрессэ шедьтытэк, азьло пересь кышноез доры ик пыроно луэм. Нош ик мунчо эстыны косэм. Пересь кышно эстэм.
Мунчоез вуэм бере пырем но Ванькаез мунчое, пе, мыныны косэ. Визьтэм, мунчое кошкыкуз, солэсь тазьы шуэмзэ кылыса, "тышка!" шуэм. Тае кылыса, нушы пересь кышноез тышканы кутскем. Ма карыны ик паймыса, пересь кышно мунчое, визьтэм доры, мынэм.
— Дугдыты вал, пожалуйста! — шуэ, пе.
— Ойдо тышка, тышка! — шуэ визьтэм. — Тон мынэсьтым ӝӧккышетме но озьы ик басьтэмед вылэм.
Со пересь кышно тэльмыре:
— Дугдыты, пожалуйста, ӝӧккышеттэ но берен сёто, только дугдыты гинэ!
Ванька "дугды!" шуэм но, нушы тышкамысь дугдэм. Собере пересь кышно ӝӧккышетсэ сётэм. Соку Ванька ӝӧккышетсэ басьтэм но дораз бертэм.
— Мын, ӧть агайёсме, — верам со атаезлы.
Атаез вожез потыса кеськем:
— Малы мон юнме соосты тон доры ӧтём?
Со визьтэм "пожалуйста, ӧть вал" шуэ, пе. Собере атаез ӧтем.
Агайёсыз лыктӥллям но "малы ӧтид?" шуо, пе.
— Ачим тодӥсько, — шуэм визьтэм.
Собере ӝӧккышетсэ "вӧлдӥськы!" шуэм. Ӝӧккышет вӧлдӥськем но — котькыӵе сиён-юон потэм.
Со визьтэмлэн агайёсыз сииллям-сииллям но — кӧтсы тырем. Собере нушызэ со визьтэм "тышка!" шуэм. Нушы агайёссэ радэн тышкаса, пе, ветлэ. Агайёсыз "дугдыты, дугдыты!" шуо, пе.
— Ойдо тышка, тышка! Тӥ монэ весь жугыса возиды,— шуэм визьтэм.