Коӵо, ӟичы но куака

Коӵо, ӟичы но куака

Коӵо уром ӝужыт писпуэ кар лэсьтэм но ньыль пи поттэм. Тае Ӟичы шӧдэм.

— Коӵо уром, вай пидэ, ӧд ке сёты, тубыса астэ сиё.

Коӵо уром сётэм пизэ. Ӵуказеяз Ӟичы нош ик лыктэм но шуэ:

— Коӵо уром, вай пидэ, ӧд ке сёты, тубыса астэ сиё.

Нош ик сётэм Коӵо уром. Куинетӥ пизэ но озьы ик лэзем. Одӥг пиез гинэ кылем на, погылляськыса бӧрдыны кутскем Коӵо уром.

Сое Куака уром адӟем.

— Коӵо уром, малы бӧрдӥськод? — юам Куака уром.

— Мон ньыль пи поттӥ вал, нош Ӟичы куинь пиме сииз ини, ӧй ке сёты, тубыса асме сиё, пе.

— Марлы сётӥд пидэ, солэн кыз йылэ тубемез уг луы. Только Ӟичылы эн вера, мон верай шуыса.

Нош ик Ӟичы вуэм. Коӵо уром шуэ:

— Э-э, мыным Куака уром вераз, тынад кыз йылэ тубемед уг луы шуыса.

Ӟичы кошкем но сюрес вылэ выдэм, кулэм кариськем. Куака уром вуэм:

— Ка-ар, мон Ӟичылэсь синзэ поттыса сиё.

— А-а, сюрид-а, Куака уром, табере мон тонэ сиё.

— Озьы гинэ эн сиы ай, Ӟичы уром. Лучше гурезь уллань питырты. Йыры поромоз, тон кутод но капчияк сиёд.

Озьы ик лэсьтэм Ӟичы уром. Нош со куспын Куака уром лобӟем вылэ но кошкем.

Нош ик Ӟичы уром кулэм кариськем. Куака уром отын ини.

— Ка-ар, мон Ӟичылэсь синзэ поттыса сиё.

— А-а, сюрид-а, Куака уром. Табере мон тонэ сиё ке сиё ини.

— Дугды ай, Ӟичы уром, курадӟыса эн улы. Лучше быжтӥм кут но кенер борды шуккы. Мон жӧлмай ке, сиёд.

Озьы ик лэсьтэм Ӟичы. Шуккем ук кенер борды, нош Куака уром лобӟем, быжыз гинэ кылем на.

Куака уром кеськем:

— Кемыз тыныд! Быжме си!