Книга

Книга


Со вал чылкак выль книга. Туж чебер, туж яркыт. Адями киос сое кема бергатӥзы, зарни букваоссэ маяллязы. Лачмытак понӥзы ӝажы вылэ. Зарни бускельзэс адӟыса, мукет книгаос шымырскизы, сурыкмем вылбамъёссы пушкы ватскыны тыршизы. Выль книга нырзэ урдыса сылӥз. Со татын тужгес чеберез, тужгес даноез. Нош мукетъёсыз – так, огшоры гинэ, учкон туссы но, йӧнала дӥсьсы но ӧвӧл...

Ортчизы нуналъёс, толэзьёс, ар... Зарни книга зарни нырзэ урдыса улӥз. Но нокин кияз ӧз кутылы сое. Вӧзысьтыз пичи гужам бичетэз нуналлы быдэ усьязы, бамъёсаз карандашен маке гожъязы, соин ӵош ик умме усьылӥзы...

Зарни книга аслэсьтыз данзэ тодӥз. Со укыр визьмо, укыр чебер, сое ноку уз гожмалэ, бадӟым нуналъёсы гинэ, туж жаляса гинэ кутылозы киязы...

Ортчиз эшшо одӥг ар. Зарни книгаез нокин ӧз потта, шуныт киын ӧз маялля. Дырын-дырын ӵушылӥзы вылысьтыз тузонзэ. Нош одӥг пол... Дуно книгалэн вӧзысьтыз сурыкмем бускельзэ басьтӥзы но кытчы ке нуизы. «Куштӥзы, – лек малпаз зарни книга. – Озьы ик кулэ. Медаз сылы татын, кузёзэ возьытэ вуттыса»…

Но, бускелез нош вуиз: кеськем бамъёссэ лякылӥллям...

Пумтэм-йылтэм кыстӥськизы нуналъёс. Нырзэ урдэм книгалэн зарниез бездыны ӧдъяз. Мугорзэ вожъяськон тулкым шобыртӥз: сое но, одӥг пол ке но, кӧлон азязы мед лыдӟозы, дуно бумагаосыз вылэ одӥг конгыртык ке но мед гожъяськозы!
Я, тани кузё сое кияз кутоз, туннэ одно ик кутоз, туннэ – кутоз! Но... адями киос нош ик лякиё-лякиё кышъям книга борды кырмиськылӥзы.

Ортчиз эшшо кык ар. Кузё сое кияз кутӥз. Кутӥз! Дуно книга вань зарниосыныз воректыны тыршиз. Кузё учкиз бамъёссэ. Укыр дыртыса учкиз. Лулӟиз. Ӟоскыт коробкае понӥз сое, вылаз вуж газетъёс, кыӵе ке книгаос куяз, кыре потӥз. Бертӥз коробкатэк. Зарни книгатэк. Ӝажы вылэ кылемъёссэ лачмытак тыриз.

Одӥгзэ, тужгес сурыкмемзэ, кутыса, диван вылэ пуксиз. Кышъям книгалэн вылбамаз мырдэм адӟиськись букваосын гожтэмын: «Удмурт калык визькылъёс». Мар гожтэмын вал зарни книгалэн вылбамаз – нокин ӧз тоды ни...