Кин чебергес?

Кин чебергес?


Вордӥськем нуналаз Юлялы анаез кузьмаз буяно суредъёсын выжыкыл книга но пӧртэм буёло карандашъёс. Шумпотэменыз нылаш быдэс ӝыт суредаськиз. Вуюись буёлъёслэсь сяськаяз возь выл, чагыр инбамын пиштӥз шунды, выжыкылысь геройёс огез бӧрсьы мукетыз чибориё дӥськутъёсын пӧрмытскизы. Изён дыр вуыса гинэ, Юля люкиськиз карандашъёсыныз. Коробкае оген-оген выдтыса, котькудӥзлы чебересь уйвӧтъёс сӥзиз.

Нылаш чыс-чыс умме усем бере, кытысь ке но шыпыртэм куараос кылӥськизы. Т-с-с, ойдолэ бен асьмеос но кылзӥськом, кинэз вань отын. А-а, озьы со ог-огенызы ченгешыны кутскиллям ӝӧк вылын кыллись буёло карандашъёс: пӧлысьтызы кин тужгес но чеберез, тужгес но кулэез?

— Котьмар шуэ, нош мон ваньдылэсь яркыт пиштӥсько, — йӧн-йӧн вазиз Горд Карандаш, — Озьыен, мон самой чеберез но кулэез. Мон валтӥсьты тӥляд.

— Нош мон ке ӧй луысал, музъем кемалась гольык кыльысал ни. Турын-куар но, садъёс но мон ваньысь гинэ возисько. Маин кузё ӧвӧл? — вожез потӥз Вож Карандашлэн.

Тае кылыса, Ӵуж Карандаш но пӧсекъяны ӧдъяз:

—Эй тӥ, кин кожаськоды асьтэды? Вунэтӥды шат веттаськись ю-няньлэсь, зарнилэсь тусбуйзэс. Мон адямиослы кӧттыр но узырлык кузьмасько. Озьыен, мон кузё татын.

— Ах тон, ӵуж чипы, астэ Инмарлэсь вылӥ кожаськод-а? Да мон тӥледды ваньдэс лыз пилем шобретэн возъяло! — лекъяськиз Лыз Карандаш.

Мар луиз соку коробка пушкын! Карандашъёс ог-огзэс лур-лар кесяны, чигтылыны дасесь вал. Ӧйтӧд, мар кыльысал, вылды, ӵукнаозь нылашлэн кузьымезлэсь, палэнынгес кыллись Пересь Карандаш ке ӧй пыриськысал керетӥсьёслэн куспазы.

— Тырмоз ни тӥледлы йырйиськыны. Ог-огдэс тазьы сьӧдманы, саптаны кутскиды ке, быдэс дунне одӥг пож виштылы пӧрмоз. Гордэз но, ӵужез но, лызэз но, вожез но — нокыӵе мукетыз буёл адями синъёсты уз шумпотты ни. Кинлы тӥ кулэ луоды на соку?

Буёло карандашъёс чалмытскизы, мур малпаськонэ усизы. Кӧня ке улыса, Ӵуж Карандаш дӥсьтытэк гинэ вазиз:

— Тон ваньмызлэсь визьмо бере, иське, валэкты милемлы: кин пӧлысьтымы тужгес но чеберез?

— Ярам, мон юртто тӥледлы, — вазиз Пересь Карандаш, — но тӥ мынэсьтым вань верамме быдэстыны кулэ.

— Кылзӥськом. Ми дась. Мар кароно? — огез бӧрсьы мукетыз куаразэс сётӥзы буёло карандашъёс.

— Ӝӧк вылын кылле буяно суредъёсын выжыкыл книга. Али котькудӥз аслаз буёлэныз солэсь кыӵе ке но одӥг бамзэ суредалоз. Кинлэн суредэз чебергес пӧрмоз — со ик тӥ пӧлын кузё луоз, — валэктӥз Пересь Карандаш.

Адӟысалды ке, макем шумпотӥзы буёло карандашъёс! Котькудӥз ас понназ малпаз: “Мон ваньмызлэсь чебер суредало!”

Горд Карандашлэн суредэз быдэсак горд пиштӥсь луиз: инбам но, музъем но, сяськаос но, адямиос но — нокинэ уг луы ни вал отысь тодманы. Вож Карандашлэн суредэз вожектӥз, Ӵужезлэн — ӵужектӥз, нош Лызэзлэн — лызэктӥз. Асьсэлэсь таӵе йӧспӧртэм ужъёссэс адӟыса, карандашъёс возьдаськеменызы йыръёссэс ик ошизы.

Пересь Карандаш буйгатӥз соосты:

— Табере асьтэос адӟиськоды — ог-огдытэк тӥляд чеберды бездэ, нокинлы со шумпотон уз вайы. Нош куке ог-огеныды артэ вамышъяськоды, тӥляд чебереныды быдэс дунне улӟе. Ваньды ик тӥ огкадь чебересь, огкадь кулэесь.

Тае кылыса, буёло карандашъёс капчияк шокчизы но улонтӥязы вамыштӥзы. Нош Пересь Карандаш дораз Ӵушиськонэз ӧтиз но мар ке но лушкемак сипыртӥз.

Кӧлэмысь султыкуз, Юлялэн буяно книгаяз карандашъёслэн уйин дарманьтэмзылэн пытьыез но ӧй вал ни.