Калык чакланъёс

Калык чакланъёс


Вашкала дырысен адями валаз: инкуазь – со улэп маке. Сое обиде уськытыны уг яра. Соинтэк-а вашкала адямиос, писпу ӵогыкузы, нырысь ик верало вылэм: «Вождэ эн вай мыным, тонэ ӵогыны косӥзы».
Адями – инкуазьлэн нылпиез. Мар меда ужасалмы асьмеос инкуазьтэк? Со асьмеды сюдэ, секта, турлы чебереныз палёмытэ.
Вашкала дырысен адями синйылтӥз: тулыс бере вуэ гужем, гужемез воштэ сӥзьыл, нош сӥзьылэз азьланьтэ тол. Арлэн котькуд вакытэз ас сяменыз чебер. Со сярысь ик верало калыклэн сак синъёсыныз адӟем но синйылтэм веранъёс.
Чакланъёс туж трос пӧртэм пумо. Туннэ тодматскоме Салья гуртысь гожтэм тужгес но тунсыко чакланъёсын. Гожтэмын соос пӧртэм аръёсы.
• Беризь сяська трос ке, ӟег удалтэ.
• Пужымлэн кускылиез трос ке, йыды удалтэ.
• Кызаузы трос ке, нянь удалтэ.
• Лулпу гуры трос ке, сезьы удалтэ.
• Тулыс сурсву ческыт ӧвӧл ке, нянь удалтэ.
• Лымы трос ке, нянь удалтэ.
• Палэзё арын етӥн удалтэ.
Вашкала дыръя нимаз дышетскем агрономъёс ӧй вал. Инкуазь соосты сак карыны дышетӥз. Чакланъёсъя ик кутско вал тулыс кизён ужъёс но:
• Бадьпу куар копейка быдӟа луиз ке, гырыны потоно.
• Кызьпу куар азвесь уксё быдӟа луэ ке, кизьыны потон дыр вуиз.
• Сусыпу мульы тӧлӟыку, етӥн кизён дыр вуэ
• Тыпы куаръёс потэм бере, чабей кизён дыр вуэ.
• Шупу сяськаяськыку, кияр мерттон дыр вуэ.
• Шупу сяськаяськыку, йыды кизё.
Кыӵе аспӧртэмлыко но тунсыко адямилэн зор яке умой куазь сярысь чакланъёсыз. Со чакланъёс пыр адӟиськомы: гуртын улӥсь адями инкуазьлы, зэмзэ но, туж матын:
• Уӵы быдэс уй чирдэ ке, куазь умой луоз.
• Ваёбыжъёс вылэтӥ лобало ке, куазь шулдыр луоз.
• Чонари вотэс кузя ваське ке, куазь умой луоз.
• Бакаос уин кесясько ке, куазь шуныт луоз.
• Кузьыли карын пыран – потан пасьсы усьтэмын ке, куазь шулдыр луоз.
• Уйин уйсы кесяське ке, куазь шулдыр луоз.
• Тюрагай вылын чирдэ – куазь умой луоз.
• Куакаос лобакузы шудо ке, куазь шулдыр луоз.
• Ӝыт пал лобась кибыос трос ке, ӵуказеяз куазь шуныт луоз, уз зоры.
• Мушъёс вазь ӵукна ик чечылы мыно ке, куазь умой луоз.
• Тылобурдоос вазь ӵукна ик куашето ке, куазь шулдыр луоз.
Зор, зор, зорые
Таиз чакланъёс зор луонэз валэкто:
• Ки кӧса ке, зороз.
• Куазь зорон азьын висись суй-пыдъёс висё.
• Гужем нуналэ куара кыдёке шуккиське ке, куазь зороз.
• Чорыгъёс ву вылэ тэтчаса ветло ке, зороз.
• Турын-куаръёс вылын лысву ӧвӧл ке, куазь зороз.
• Пуны погылляське ке, зороз.
• Мушъёс умортоязы гужетыса уло ке, куазь зороз.
• Ваёбыжъёс улэтӥ лобало ке, куазь зороз.
• Кутъёс зор азьын куртчылӥсько.
• Бакаос ярдуре потӥзы ке, зороз.
• Чонариос син азьысь ватско ке, зороз.
• Кузьылиос муӵазы пыро ке, зороз.
• Кыркокась (дятел) зорон азьын писпуэз кокча.
• Курегъёс зор азьын луоын погыллясько.
• Зорон азьын ӵӧжъёс но ӟазегъёс лопыръяськыса бызьыло.
• Зорон азьын вал йырзэ сэзъяса но сэрпалляса сылэ.
• Муръёысь ӵын музъем вылэ лэзиське ке, зороз.
• Шуккем аръян тукырӟе – зороз.
• Куазь шуак пӧсь кариське – зороз.