Калмез батыръёс

Калмез батыръёс


Вашкала дыръя, ӟуч калыклэн татчы лыктэмезлэсь азьло, та музъем вылын порен но удмуртэн улӥллям. Кыкезлэн ик та калыкъёслэн нимаз батыръёссы вылэм. Та батыръёс калык пӧлын кун эксэй кадь улӥллям. Ожтэм дыръя калыкез судитьтозы вылэм. Ож дыръя калыклэн азьлапалаз ветлозы. Удмурт калыклэн котькудӥзлэсь ӟеч, кужмо батыръёсыз Калмез вылын улӥллям. Таӵеесь батыръёс вылӥллям: Чуньыпи Бурсин — Люкмыйысь, выныз солэн — Сьӧлталась, кужмо Бигра — Сезёлысь.

Та вунэтонтэм батыръёслэсь ужзэс пересьёс улы вуисьлы туэ но сюлмысь ушъяса-данъяса верало.

— Таӵе луэ тӥ но! — шуо ялан.

Выжыяса-ёзнаса верало чуньыпиослэсь кӧшкемыт ожмаськемзэс; верало, кызьы одӥг пол кужмо Бигра тямыстон иськем улсысен пор батырен ыбылӥськиз... Мон пинал вал, али но тодӥсько на, кызьы мынам пересь дядяе одӥг пол, алаз пуктыса, та выжыкылэз вераз:

— Инмын пилем уя, музъем вылтӥ батыр кошке. Лёгемез куать иськемысь кылӥське, мынэмез музъемез зуркатэ. Та — Бурсин батыр, пор Мудрое даллашыны дасяське.

— Кытчы мынӥськод, мусо картэ? — юа кышноез.

— Поръёс доры ожмаськыны, кужмоосын ёзнаськыны!

— Эн мын, эн мын! Ӟеч мугордэ шормалозы, дуно йырдэ быдтылозы.

— Мынны кулэ, кышно-кенаке, но вала, ява, шуге-леке вуи ке, ыльнянь сабляме лэзь мыным!

Кылзэ быдтытэк, Бурсин, ӵуж вал вылаз тэтчыса, тюо сямен* ворттӥз.

Мудро азьын шур вань; та шур вамен лэсьтэм бадӟым выжлэсь юбооссэ поръёс ёзнаса дасяллям. Татчы вуыса, Бурсин батырлэн ӵуж валэз выж вылэ ӧз пыр. Чукдор вал вылаз пуксиз. Со но ӧз пыр. Бератаз куӵо вал вылаз пуксиз. Куӵо вал, тыпрак тэтчыса, выж вылэ кылдӥз. Гудыри кылӥське но — гудыри ӧвӧл — бадӟым выж куашка батырен валче. Бурсин батыр, одӥг пол тэтчыса, ву дуре кылдӥз. Поръёс кузьылиос сямен люкасько со котыре.

— Мын чаляк, — шуиз ини Бурсин батыр ыстон-косонэзлы, — мын кышное доры, ыльнянь сабляме мед лэзёз!

Ыльнянь сабля шуыса, Бурсин туй ныдо агылской саблязэ малпам. Амалтэм кышноез валатэк дас кык пуд секта ыльнянь сабляез лэзиз солы.

— Кызьы каром? Ма каром? — Бурсин батыр саблятэк, киыныз гинэ, ожмаськыны кутскиз.

Ожмаське одӥг нунал — пор йыръёс сӥзьыл зор сямен усё. Ожмаське кык нунал — пор йыръёс кубиста йыр сямен усё. Куинетӥ нуналаз кужмыз со бордысь люкиськиз. Катьтэм-витэм луыса, "э, калтак, визьтэм кенак! — кесяськиз куректэменыз. — Кылме валасал ке, мон тазьы ӧй бырысал, йырме нӥзилилы ӧй сётысал!" Собере сеп кышноез но, куӵо валэз но каргам:

— Та дырысь удмурт калык, кенакез басьтытозь, кӧто нылэз мед басьтоз. Йырзэ кышно кышетэн мед бинялтоз. Куӵо валэн но пырак пор мед ветлоз — удмуртлы бырон пум со!

Поръёс, Бурсин батырлэсь катьтэм-витэм луэмзэ адӟыса, сое кутӥллям но жильыен дуриллям. Та бере бадӟым юон лэсьтӥллям. Бурсин батыр кулон азяз поръёслы ас сюлэныз куссэс керттыны косэм...

Поръёс, та батыр вал шуыса, ӧз дӥсьтэ солэн кылызъя карыны. Map меда луоз шуыса, юри солэсь сюлзэ юбо котыре биньылӥзы. Юбо соку ик пилемозь ӝутскиз. Таӵе пӧртмаськиз Бурсин батыр кулэм бераз но.

Бурсинлэн выныз Сьӧлта батыр нюняезлэсь бертэмзэ дас кык нунал ӵоже возьмам. Собере, нюняез шуге-леке вуиз, дыр, шуыса, утчаны мынэм. Бурсин батырлэн мыйы кудыро шубаез вылэм. "Шубаезъя шедьто!" шуыса, Сьӧлта батыр сюрес вылтӥ котькытысь мыйы кудыро шубаез юаса мынэм. Гуртлы быдэ пыраса, калыклэсь юам:

— Ӧвӧл-а кинлэн ке мыйы кудыро шубаез? Аслэсьтым гуртам вунэтӥськем но сотэк умме уг усиськы.

Тазьы юалляса, нокытысь но шедьтытэк, Мудрое вуэм. Отын сётӥллям но — со соку ик нюняезлэсь шубазэ тодмам.

Поръёс Сьӧлта батырлэсь лыктэмзэ шӧдыса ӧтчаськиллям. Кызьы ке но озьы сое виёно шуыса, ӧтчаме люкаськем калык солэсь кӧлон чумзэ кортэн дурылэм.

Сьӧлта батыр, ӵукна султыса, чум липетэз мыддорин поттыса кошкем. Собере весь Мудро гуртэз, лымы уськытыса, лымыен согем. Поръёс, тае адӟыса, со сьӧры уиськыны кутскиллям. Сьӧлта батыр, пытьызэ медаз тодмалэ шуыса, гондыр кариськем. Гондыр кариськемзэ ву ваись ныл адӟем. Та ныллэн кылъяз поръёс гондыр сьӧры уиськыны кутскиллям. Соку Сьӧлта батыр лӥял вылэ пуксем но душес кариськем. Отысь нош ик Мудрое лобӟыса, весь гуртэз тылын сутэм. Поръёс отын выль юртъер лэсьтӥллям. Сьӧлта батыр, выльысь мыныса, поръёсты сутыса, ожмаса куштэм. Куиньметӥяз мыныса, порлэсь пытьызэ но кельтымтэ ни.

Тазьы Мудроын пор калык бырем. Собере Сьӧлта батыр кема улэм на, ас удмурт калыксэ котькыӵе тушмонлэсь утьыса-вордыса.

Бӧрысь удмурт калык весь куректӥз-бӧрдӥз, уз луэ ни табере удмурт калык пӧлын та Калмез батыръёс кадьёсыз шуыса.