Иднакарын туннэ куала ӧвӧл ни...

Иднакарын туннэ куала ӧвӧл ни.
Ньыль сэрегын гуос гинэ гушто.
Аръёс пыртӥ тылгизьыос пишто.
Иднакарын туннэ куала ӧвӧл ни.
Соин, оло, татын уртъёс ӝушто.

Пужым ягысь аслым кужым басьто но
Бугро ӵупо, выльысь ӝуто куала —
Берекетсэ мед сётоз на вашкала!
Пужым ягысь аслым кужым басьто но,
Вылез куала шокчоз на та палан.

Ӵукна ик вазь — инбам ай ӟаректоз на —
Сир зын лӧсъясь выль куаламе усьто,
Лымы кадь юг-юг ӝӧккышет басьто,
Ӵукна ик вазь — инбам ай ӟаректоз на —
Сяська пӧлы возь вылъёсы васько.

Тӧдььы юсед та шаертӥ ширъяз вал —
Выль Вӧсь кизиз-а, я вужзэ выльдӥз?
Оло ке нош, бурдо сямзэ вӧлдӥз?
Тӧдьы юсед та шаертӥ ширъяз вал —
Соин, лэся, выль куалае кылдӥз.

Шыпыт ӵукна Выль Вӧсь омыръяло но
Тӧдьы ӝӧккышетам лякыт гинэ кертто,
Инву гуре сое, шуре сямен, ветто,
Шыпыт ӵукна Выль Вӧсь омыръяло но
Выль куалаям выль кузёзэ вутто.

Дунне вылын кӧня удмурт калык вань —
Выль Вӧсь медам сёты йырбыттонлы!
Весь мед вордоз шудбур но тазалык!
Дунне вылын кӧня удмурт калык вань —
Выжыослы ваньмы йыбырттомы!