Идентификация

Идентификация


малы ке шуоно мон пичи,
нош дунне — со бадӟым. Мон солы
луисько шур пыдсысь векчи из,
вышкыысь пызь пыры.
кинлэн ке ву вылаз тэтчась пыӵ,
пипу куар мон лэйкась ву вылын,
ву пушкы мон зымем мумы ӵӧж —
берпалы урдэмын.
нюлэскысь сисьмемез мон лӥял,
мон ӵушъял — бус пӧлы ышемын.
мон бадӟым уллёысь куӵо скал,
сылӥсько палэнын.
калыкын мон огнам — палтури,
сукырлэн киосаз мон боды,
зор куазен сюрескысь мон дэри —
мон пушкы эн нӧды.
мон ачим — сӥль корась но вандэм
пудолэн макесаз сӥль быгыт.
книгаысь огез кыл но кыллэн
букваез. Мон, дыр, «ы».
мон ӵышкем такалэн ӟуг гонэз —
губырскем пересьлэн киосыз,
лӧдыса тугаськем интыме,
бугоре черсозы.
кыдёкын улӥсько — кунгожсьӧр
мон нумыр, куисько тӧдь буртчин.
му борды йыртышме шукко вӧсь,
усьыса мон кымин.
гожтымтэ мон кылбур.
кырӟамтэ мон кырӟан.
усьымтэ мон лысву.
ишкалтэм купанча.
верамтэ мон мадёс.
пуктымтэ мон кенос.
эмъямтэ мон висён.
мон вунэм Ымусьтон.
урымтэ мон убо.
черсӥсьтэм мон кубо.
витетӥ мон питран.
нылпитэм мон корка.
бызьымтэ мон выль кен.
пузасьтэм мон курег —
вандозы ни ӝоген.
малы ке шуоно мон пичи,
нош дунне — со бадӟым, со монэ
пырыен-пырыен ке но, мед —
сылмытӥз улонэ.