Город шорын пуке вал Кылдысин...

Город шорын пуке вал Кылдысин,
Секенхендысь дӥськут вал со вылын.
Лыдӟе вал бомжъёслэсь газетъёссэс —
Кытын луэ куртчын, кытын кӧлын.

Мон йыбырттӥ вал черк жингыртэмлы,
Куинь пол пуктӥ кирос аслам азям,
Дас манетме куштӥ Кылдысинлы,
Потэ вал, дыр, кисыосме сузям.

Но кытысь ке вуиз сьӧд Керемет,
Ыгыосын, зарни жильыосын.
— Марлы тыныд, — шуиз, — таӵе «чермет»,
Тынад ведь интыед зоопаркъёсын?..

Албастыез, налим кадь тэкито,
Ӵыжиз Кылдысинлэн ангес улаз.
Но Кылдысин пальпотылэ шудо,
Вирзэ виятыса газет вылаз.

Ульча-бакча — котыр лыз экранъёс
Кисьто боевико сюжетъёсты.
Отын вормон, отын фейерверкъёс,
Отын ӧвӧл ю-тысь усён инты.

Нош Кылдысин шузи кадь пальыша.
Сое ини жуго урмем ментъёс.
Лыз инбамлэн зэрпал кадь гольышаз
Льӧльмыт-льӧльмыт жуго черк гырлыос.