Боко но Моко

Боко но Моко

Пичи коркакузёос сярысь выжыкыл-повестьысь люкетъёс



Вынъяськон*

Чыс-чыс уммен изён сямен Боколэн пель сьӧраз кылӥськиз бӧрдэм куара. Борддор сьӧрын кин ке но туж ӝожмыт кыла-бура аслаз улон-вылонэзлы.

– Кинлы мон кулэ табере, мискинь кураськись. Йыр вадьсам зор-котлэсь, кезьытлэсь утись липетэ гинэ но ӧвӧл. Кошко, сьӧд нюлэскы кошко яке мур коже тэтчо. Нюлэс Нюнялы но, Вумуртлы но юрт кутӥсь кулэ. Ы-ы-ы…

– Эй, кин отын? – мурӝол сэргысь небыт пышен шобыртэм валес вылаз пуксьыса, Боко каллен гинэ борддоре йыгаз.

– Мон та, бускель коркась пыдйылчи. Нош ачид кин луиськод?

– Мон Боко, та улыно-вылыно коркалэн юрт кутӥсез. Пыр ойдо, эн мурта, инты кыкнамылы шедёз. Огнынлэсь ӵошен шулдыргес.

Мокоез тэльмыроно ӧй вал. Та шуытозь бус сямен корка кор вискытӥ вӧлдӥськыса потӥз но Боколэн шуныт но небыт сэргаз вуиз. Тӧдьыпыръем пуштырес йырси пӧлысь сыӵе ик пуштырес ӵыж-горд Моко шоры учкизы пурысь синъёс. Кӧня ке дыр ӵоже кык пичи лусьтро макеос ог-огзэс йырысенызы пыдозязы мертазы. Дэра штани, дэрем, пыдъёсазы бинялтонэн кутъёс – ваньмыз кызьы кулэ. Нырысь учкемысьтызы ик соос ог-огзылы кельшизы, лэся, пумиськемзылы шумпотыса ӟыгырскизы. Эшъяськонзэс юнматон понна, вуюись буёло ыж гон шортъёслэсь пунэм кускерттонъёсынызы воштӥськизы.

– Ачид адӟиськод, корка бадӟым, кузёослэн нылпиоссы но пичиесь ай, ваньмаз вутскыны кулэ. Эн куректы, Моко, уж кыкнамылы шедёз, – буйгатыны турттӥз Боко выль эшсэ.

– Ярам, кузёосыд нокытчы палэнэ вырӟыны уг туртто ке, мон татчы ик кылё, – капчияк лулӟиз Моко, – нош мынамъёсыз город улонлы синмаськизы. Соиз ӝож, кык дауръёс ӵоже выжыысь выжые улон интызэс утьыса, чакласа вози. Берло дыре корказы но кузёосыз кадь ик пересьмемын, губырскемын вал, озьы ке но, кӧты сюмаса ӧй улы, кезьытъёс но ӧз кышкатэ. Кин мон табере? Юрттэм кузё? Егитъёслы кулэ ӧй луы. Анай-атайзэс городэ улыны басьтӥзы, нош мон сярысь огзылэн но тодазы ӧз лыкты. Марлы город коркан юрт кутӥсь кулэ, шуизы, дыр?

– Я, я, йырдэ выллань ӝут, Моко, ӵуказе нунал азьланьзэ возьматоз.

Кема шыпыртӥзы на Бокоен Моко, улэм-вылэмъёссэс тодазы вайыса. ӵукна ӟардыку гинэ, атасъёслэн чоръямзы улсын, соос вӧтъёслэн дуннеязы выйизы.



Пань-пань ‒ котэм нянь**

– Кытчы тон, Моко? – вӧзаз кыллись эшезлэсь кыштырак султэмзэ шӧдыса, ум йылтӥз юаз Боко.

– Изь, изь, мон ӝогак гинэ. Чаклало, мар лэсьтӥське отын, вылӥын.

Моколэн нокызьы но умме усемез ӧз луы, пель сьӧраз ялан кылӥськиз кадь гур азь палан пукись нянь шумесысь вуӵыртэм куара. Одӥг пол гинэ озьы луысал ке! Котькуд шутэтскон нуналэ нянь шумес лулъяськылӥз кадь. Моко соку малпаськонэ усьылӥз: котэм нянь пӧлаз пӧрась кинэ ке но возьмаськисе пуктылӥз, оло? Со кин ке, пукыса-пукыса акыляк луэменыз, лулӟылыны кутске. Тани туннэ но кузё кышно нянь котӥз, соин ик Моколэн чидан ӧвӧл: тодэм потон пычеез азьлань валтӥз.

– Тон ке кескич, мон эшшо но кескичгес, Моколэсь нокытчы уд пегӟы, брат, – нянь шумес доры вуыса, ас понназ сипыртӥз со.

Моко, дӥсьтытэк но дӥсьтыса, тыбыртэм пукон вылэ кечырскиз, нош отысен – нянь шумесэ. Ватӥськисез матысен адӟоз кожаса, лусьтро йырзэ пыдлогес мыкыртӥз но – соку ик йырси бордаз ӝабырскись луиз.

– Эй, кин тон? Ӧжытак калленгес! Мон ожмаськон понна ӧй лыкты, ойдо киосмес кузь ум лэзьялэ. Нырысь-валысь тодматском: мон Моко. Ачид кин луиськод? – лулыз пыдтышказ вуиз ке но, Моко кышкатэк вераськыны турттӥз.

Пумитаз вазись ӧз луы, лушкемен шокам гинэ кылӥськиз.

– Лэзь, шуисько, мар соку ик йырси котыре тэбинид! - йырзэ ӝутыны курадӟыса, Моко дуринчи кадь пурӟиз. – Тани возьмато мон тыныд, кин кужмогес!

Йырыз курен мыжыксэ золгес шоналтӥз гинэ – небыт но тяпылес маке сое пушказ кыскыны ӧдъяз.

– Э-э, мар тон? Караул! Юрттэ! ‒ но кышкаменыз Моколэн куараез ик ӧз поты, кылъёсыз ым пушказ кугӟазы.

Пыдъёсыныз но нӧдымтэ киыныз пыкиськыса, кызьы но озьы мозмытскиз ик со сьӧраз сузьтӥськыны турттӥсь кин ке ки улысь. Пыдулзэ шӧдылытэк, лобатӥз ук Моко мурӝол сэргаз! Дынгыр куалекъя – Боко ик сайказ.

– Мар луиз тонэн, Моко? – кылзэ ньылэм эшсэ кӧня ке пол пельпумтӥз сэзъялтӥз со.

– Отын, отын, – Моколэн лякиськем ымдуръёсыз мырдэм но кызьы усьтӥськизы, – нянь шумесын кинэз ке но шӧтэмез пуке. Со ӧжыт гинэ ӧз лӧды мынэсьтым йырсиме, асме но ньылыны турттэ вал.

Боко али гинэ синйылтӥз Моколэсь няняськем йырсиоссэ, паймеменыз чабкиськиз:

– Бен тон ыльнянь пӧлы зымылэм, лэся, ук? Я, ойдо учком, кинэз сокем кышкатӥз тонэ.

Моко пыкиське ик вал, но Боко азьын возьыт потӥз кеч лулзэ возьматыны, нюж гинэ кыстӥськиз сьӧраз. Эшез, номыре луымтэ сямен, кечырскиз нянь шумесэ. Паймымон кадь, но вуӵыртӥсь маке со борды ӧз кырмиськы. Боколэсь кышказ, оло? Тае адӟыса, Моколы дӥсьтон пыӵаз, эшез борды сузьтӥськиз. Но мар та таӵе? Шумесысь нокин шӧтэмез ӧз учкы шораз, чырсаса лӧптэм ыльнянь гинэ шокамъяське. Возьытэ усеменыз, Моко интыяз ик пуксьыны дась вал.

– Эх тон, пань-пань – котэм нянь, – шудыса сямен исамъяськиз Боко. – Ӧвӧлтэм мае ке утчаменыд, ӧжыт гинэ ачид шаньгалы пӧрмымтэ, – дышем сяменыз, визьнодась кылъёс утчаны ӧдъяз вал, но эшезлэн сотэк но кунэрес тусыз сое дыраз серметаз. Номыр вазьытэк, Мокоез, пельпумтӥз ӟыгыртыса, сьӧраз валтӥз. Но ӧз чидатскы – пышкылӥз:

– Ӵушъяллы пӧрмемедлэсь азьло ойдо мисьтӥськыны.

Эшъёс ог-огзы шоры учкизы но – серемзэс кутэмзы ӧз луы: кӧтъёссы ик висьымон горизы.

Та уе Бокоен Моко мырдэм умме усизы. Я бен, ум люкетэ соослы, мед изёзы ойдо. Азьланьын соосты возьмало на пӧртэм серемес учыръёс, выль пумиськонъёс, вормонъёс.



Азьтэм басьтэм***

Одӥг нуналэ Моко валес вылысь султыны ӧз дырты, мар карыны ёрмыса сямен, тэк кыллиз но кыллиз. Боко со но та лэсьтэ, отчы, татчы мынэ, нош эшезлэн интыысьтыз вырӟыны малпаназ ик ӧвӧл.

– Моко, улон интымес коть ӵужем кар вал, кылльыса-кылльыса нумыр поттод ни, – пань-пань улӥсь эшез шоры учкыса, Боколэн чиданэз пӧсьтӥз, тэргаськыны ӧдъяз: – Кинэн вераськисько мон? Тани тыныд ӵужон, вырӟылы!

Ужаны катез ӧвӧлэн Моко ассэ шонере поттыны турттӥз:

– Эн керӟегъяськы, Боко. Мон ӧвӧл янгыш, Азьтэм бинялскиз котырам, суй-пыдъёсме но выртэме уг луы.

– Зуль ойдо, кыллэн лыэз ӧвӧл, - ӧз ик оскы эшезлы Боко.

– Мар тон, Боко, шуисько ук: со Азьтэм няняз монэ, тэкитэн сямен. Уд ке оскиськы, еэн жугыса, оскалты, оло, вӧсь луэмезлэсь кышкалоз.

Таяз учыре Боко малпаськонэ усиз. Оло, Моколы, зэмзэ но, юрттэт кулэ? Маке луэм – лу шуыса, ӝогак гинэ выллане тубаз но паськыт е васькытӥз. Тае адӟыса, Моколэн пыдессинъёсыз ик лябомизы, но аслэсьтыз куалектэмзэ со номырин ӧз возьматы. Нош Боко, эшезлэн нырултӥз еэн шонаса, буйгатэмъяськиз:

– Таиз азьын, Азьтэм гинэ ӧвӧл, ачиз Шайтан но берлань чигналоз. Я, Моко, кӧт вылад кариськы ай.

Соизлы кылзӥськытэк ӧйлась. Синъёссэ гинэ кыниз на, елэсь пӧсь табань возьмаса. Ма бен, пичильтык осконэз но вал, Боко уз дӥсьты эшсэ вӧсь карыны, жалян сямыз вормоз. Зэмзэ но, соиз небыт интыяз чибинь куртчем кадь одӥг-кык пол йӧттӥз ик.

– Номыр толыкез уз луы, дыр, тазьы, Боко, – ӝуштэмъяськиз Моко. – Одӥг-кык нуналзэ кызьы ке но чидало. Адӟод али, вез-вез кылли ке, со Азьтэмлы аслыз акыльтоз монэн нюръяськыны.

– Я, я, нырдэ эн ош, Моко, асьмеос сое живо-два уллялом, – озьы шуыса, Боко шлачкетӥз ук Азьтэм басьтэмлэн берпалаз – соиз, вӧсь луэмысьтыз, мурӝол вӧлдэт дорозь ик тэтчиз.

– Ӧб-ӧб-ӧб-ӧб!!! Ма, мар тон сокем жугиськиськод? – Моколэн синвуосыз ик пызьыразы.

– Ого, пӧрмиз! Е тон дорозь но пыӵаз бере, со няняськись Азьтэмлэн пытьыез но ӧз кыльы, дыр, – эшез понна шумпотӥз Боко. – Яке эшшо кытчыяд ке дэмӟиз на-а?

– Ӧз, ӧз! – Моко киосыз улэ ватӥськыны турттӥз. – Тани, учкы, чӧльыосылэн гинэ но ужамзы потыны кутскиз, – пумозяз оскытон понна, Боко азьын чиньыосыныз выретӥз со. Собере, тылын сутӥсь интызэ маялляса, юаны дыртӥз: – Возьматы, ма кароно?

– То-то угось, – мынектӥз Боко. – Ужлэсь пегасьёсты гинэ Азьтэм басьтэ. Но тон эн кышка, Моко, асьмеос табере тодӥськом, кызьы нюръяськыны соин.

Со дырысен, Моко ужлэсь палэнскыны турттэ ке, Боко тодаз вайытэ:

– Нош ик Азьтэм басьтӥз-а? Кытын асьмелэн паськыт емы?