Азьтэм ныл

Азьтэм ныл


Одӥг бай муртлэн куинь нылыз вылэм: кыкез ужаны яратӥсь, куиньметӥез азьтэм. Кык бадӟымъёсыз умоесь картъёслы бызиллям. Куиньметӥзэ нокин но, пе, уг басьты.

Со гуртын ик улэм туж начар мурт. Коркаез но туж алама вылэм, валэз но, скалэз но вылымтэ. Со начар мурт мынэм бай мурт доры азьтэм нылзэ юаны. Бай мурт солы шуэм:

— Ма ужалод тон соин? Со ведь туж азьтэм, номыр но уг ужа, тон соин бӧрдод.

Начар мурт бай муртлы шуэ, пе:

— Мон сое ужаны дышето. Бай мурт шуэм:

— Озьы ке, дышеты, дышеты ужаны, мон тонэ узырмыто.

Бай мурт нылызлы корка пуктэм но пирдан сётэм: вал, скал, ыж, кечъёс, парсьёс, дӥськут. Начар мурт бай муртлэсь со нылзэ кышно басьтэм. Начар муртлэн анаез, ӵукна ик султыса, чай пуктэ, пизэ, кензэ чай юыны сайкатэ, пе. Пиез султыса чай юэ но ужаны кошке, кенэз йырзэ но уг ӝуты, изем амал кылле. Пиез анаезлы вераса кельтэ:

— Тон, анай, та кендэ эн сюды, мед изёз нунал лумбыт.

Кенэз лымшор азьын султэ но сиён куре, пе. Анаез кенэзлы вера ини:

— Бен туннэ маке ужад-а, ӧд на-а, кенэ? Ми ужамтэ муртэ ум сюдӥське. Мын, азьло маке ужа али, собере сиён сёто.

Кенэзлэн ужамез уг поты, кыктой, куиньмой пукем, кӧтыз туж сюмам ни. Атаез доры бертэм но верам:

— Монэ картэ уг сюды, ужаны косэ, куиньмой номыр ӧй сиы на.

Атаез нылызлы шуэм:

— Мон но тонэ, нылы, уг ни сюды, тыныд туннэ нянь ӧй дася.

Паймем азьтэм нылыз, берен картэз доры кошкем. Картэз доры бертэм но шуэм:

— Вай мыным кыӵе ке уж, мынам туж кӧты сюма.

— Ойдо бусые етӥн ишкыны.

Мынӥллям етӥн ишкыны. Кышноез ӧжыт етӥн ишкем но изьыны выдэм. Етӥн ана вылазы бадяр будэ вылэм, бадяр выжыын кузьыли муӵ вылэм. Картэз кышнозэ кузьыли муӵ вылэ пуктэм но бадяр борды думылэм. Кузьылиос туж зол куртчылыны кутскемзы бере, картэзлы со шуэм ини:

— Буркарик, лэзь вал, табере уг ни азьтэмъяськы, ма гинэ косӥд — ваньзэ ужало.

Картэз кышнозэ лэзем но ӝожонэн нянь сётэм. Собере кышноеныз ӵошен нунал лумбыт етӥн ишкиллям. Со дырысен начар муртлэн кышноез туж ужась луэм. Кышноез куке-соку азьтэмъяськыны кутске ке, картэз солы шуэ:

— Эй, кышно, етӥн вылысь бадярез тодад вай.

Кышноез, пе, соку ик бызьыса уж дуре кошке.

Одӥг пол атаез нылыз доры куное лыктэм. Кема пукем атаез ӟус вылазы. Нылыз сое уг но сюды, уг но секта. Атаез шуэ:

— Нылы, коть чай пукты вал, куное лыктэме понна.

Нылыз шуэм:

— Педло потыса, маке ужа али, ми ужамтэ муртэ ум сюдӥське. Тӥни озьы одӥг начар мурт азьтэм нылэз ужаны дышетэм.