Адями но кый сярысь мадь

Адями но кый сярысь мадь


Мынэм кызьы ке одӥг адями кулигазэ сузяны. Турынэз ке, пе, ӧз поты, гырыны- кизьыны но яралоз. Сузям, сузям но силё-сюрно улысь кык кыйпиосты шедьтэм. Виыны малпам вылэм но, жаль потыны кутскиллям. Малы-о, пе, виёд со пичиосыз, леканы-мараны но уг быгато на. Кутэм но нуэм соосыз мукет силё люк улэ. Сояз люказ нош тыл понэм. Ужзэ быдтэ вылэм ини но, анайзы — бадӟымез кый — вуэм. Кельтэм интыысьтыз пиоссэ шедьтымтэ ни та. Адями верам солы: пиостэ, пе, мукет интые кутыса нуи, медаз ӝуалэ, пе.

Кый пиоссэ лулоен адӟем но туж шумпотэм. Адямилы тау карем жалямез понна. Тау карыса ик, адямиез пӧйшуръёслэн но будосъёслэн кылзылы дышето шуэм. Котырысьтыд котьмар вераськемез, пе, валалод но туно кадь нодо луод.

Кый дышетэм адямиез котьмар улэп маръёслэн ке кылзылы. Но шуэм солы: нокинлы но, кышноедлы гинэ но эн, пе, вера тодэмдэ но кинлэсь дышемдэ. «Ӧд ке чида вератэк, — шуэм кый, — ваньзэ вунэтод».

Адями ужзэ быдтэм но дораз бертэм. Мыноно сюрессэ кык кызьпуос дортӥ ортчем. Одӥгез кызьпу туж пересь мар ке вылэм ини, мукетыз — пинал. Шыпырто, пе, соос куспазы, тӧл дыръя кадь. Пересез, пе, вера пиналэзлы: «Тон пинал но чебер ке но, мар тынэсьтыд пайдаез? Мон пересь ке но, узыр: мон улын коньдон ватэмын». Пиналэз мар ке верам ик но, адями валаса вуымтэ, ӝогак палэнтӥськем. Кышкам кылэм вераськемзылэсь.

Вуэм ини та дораз. Туж, пе, кышноезлы верамез потэ кызьпуослэн вераськемзы сярысь. Кызьы ке ик чидатскем. Пуксиллям ӝытсэ сиськыны. Адями валатэк ик кылем кышноезлы верамзэ. Паймем кышноез: «Кызьы-о нош валад кызьпуослэсь вераськемзэс?» Котьмар улэп маръёслэн ке кылзылы, пе, монэ кый дышетӥз.

— Ойдо, сиськы ӝоггес, корт куйдэ кут но коньдонлы мын, — дыртытэ, пе, кышноез.

Адями, ӝӧк сьӧрысь султыса, корт куйзэ басьтэм но мынэм. Ортче, пе, со скалъёс дортӥ, писпуос вӧзтӥ. Скалъёс, пе, азьло кадь ик бӧксо гинэ, писпуос но куаръёсынызы гинэ шильырто. Номырзэс но уг вала ни адями.

Вуэм со кызьпуослэн азьвыл сылон интыязы, нош соосыз чиптэм-чаптэм ышиллям.