Maşinalı Kızga

(yumoreska)
Menä sin, kızıkay, aş ta peşerä belmiseñder äle? Ğomereñdä kükäy täbäse dä kızdırganıñ yuktır? Ä üzeñ yılkıldap torgan ör-yaña maşina rule artına kerep kunaklagansıñ. Pravam bar, diseñ inde, eme? Borınıñ çöyelgän. Tirä-yaktagılarnı kürmiseñ dä. Yulnıñ urtasına sin huca. Cirneñ küçäre dä üzeñ utırgan şuşı maşinañnıñ algı utırgıçı aşa ütä, dip his itäseñder äle. Belmim, pravañ küpmegä töşkänder, ä menä bu täti maşinañnı «krutoy» ätäñ satıp alıp birgän inde siña. Anısın tuçnı beläm. Yuksa, üzeñneñ bu dönyada ber kön dä eşläp karaganıñ yuk bit äle. Häyer, kayberäülär ğomerläre buyı eşläp tä ala almıy mondıy zatlı maşinanı. Änä, kürşegez Hämzulla abzañ, eşli-eşli arka bökrese çıgıp betkän bulsa da, üzennän un-unbiş yäşkä genä yäşräk şul «Moskviç»ınnan ayırıla almıy haman.
Bik käpräyep maşina rule artında utırasıñ, ä üzeñ şuşı maşinanıñ rulennän häm ike-öç pidälennän başkasın belmiseñder äle?! Kapotın açıp karaganıñ barmı, içmasam? Änä şul, aldagı kapkaçın äytüem inde. Karaganıñ yuk, eme? Ä närsä bar dip uylıysıñ soñ anda? Yuk, señel, «Zaparay»nıñ gına bagacniğı alda bula ul. Ä sinekendä motor häm maşinañnıñ küpsanlı çastları urnaşkan. Nindi çastlar, dip?.. Ä nindilären beläseñ soñ sin? Karbiratır turında işetkäneñ barmı? Kar-bi-ra-tır, dim! Närsä, isemen äytergä dä tel äylänmi, diseñme? Şulaydır şul. Ä sütep karıy başlasañ, bötenläy... Radiatır, termostat kebek äyberlärne dä işetkäneñ yuk inde sineñ? Tersäkle val, kardan?.. Şul-şul menä, berençe märtäbä kolagıña kerä. Ä yulda maşinañ vatılsa? Bu Amerika tügel siña. Anda gına ul, maşinañnı vatılgan urında kaldırasıñ da, kaytıp berär remont firmasına häbär itäseñ. «Şundıy-şundıy urında maşinam vatılıp kaldı, remontlap kuyıgız äle, pacalıstı!» - digän üteneçeñä cavap itep, telefon trubkasında «Okey!» digän süz häm kıska gudoklar gına işetelä. Ä ikençe könne maşinañnı üz hutı belän işek töbeñä kaytarıp kuyalar. Akçañnı gına tülä.
Bezdä alay tügel, señelkäş. Maşinañnı berär säğatkä genä yulda kaldırıp kara! Äye-äye, «Okey» tügel, «Gudbay» bulaçak. Şuña kürä, menä bu kıska itäkläreñ belän, ürmälärgä bik uñaysız bulsa da, ireksezdän maşina astına kerergä turı kiläçäk. Ä maşina astında yatu ul siña... Kürşeñ Hämzulla abzañ kebek maşina tözeleşen biş barmagıñ kebek belsäñ, ber häl bulır ide äle. Ul, änä, üzeneñ «Moskviç»ın yartı köndä şöreben şörepkä ayırıp kuya ala. Ä könneñ kalgan yartısında kire cıyıp ta ölgerä. Döres, här sütep cıygan sayın, ni öçender, «kiräkmäs» biş-altı detale artıp kala anıñ. Yegerme yıl buyına şul maşinasın sütep cıya-cıya, ber mini traktorlık zapçast tupladım, dip söyläp torgan ide bervakıt...
Señelkäş, mine iñ ğacäpländergäne beläseñme närsä? Menä şuşı «şpilkañ ükçäle tufliläreñ belän niçek maşina yörtä alasıñ sin, ä? Pidällärgä basarga uñaysızdır bit? Närsäse bar inde anıñ, diseñme? Menä min şunı hiç kenä dä buldıra almas idem. Kürşegez Hämzulla abzañ da, nikadär täcribäle şofer bulsa da, «şpilka» ükçäle tufli kidersäñ, maşinanı mäñge yörtä alaçak keşe tügel. Annan soñ, maşina barganda, qabinadagı közgegä karap, irengä pomada sörtüne dä buldıra almayaçak ul. Ya maşinası yuldan çitkä kayıraçak, ya pomadasın borınına da ışkıyaçak. Ä menä sin, şul ike eşne dä bernindi yalgışsız başkarasıñ da çıgasıñ.
Min hätta maşinası bargan çakta mufta pidälenä basa torgan sul ayagınıñ barmaklarına manikyur yasıy aluçı hatınnar turında da işetkänem bar. Äye, sul ayagına! Yuk, sin närsä, uñ ayaknıkına nahadu yasap bulmıy inde. Ayaknı gaz pidälennän alırga turı kiläçäk bit. Menä bu yaktan maladis sez, güzäl zatlar! Häyer, kem belä, señelkäş, hatın-kızlarnıñ irlärdän böten östenlege dä änä şunda - teläsä nindi şartlarda da üzeneñ qıyäfäten kaygırta belülärendäder, bälki? Ä min monda karbiratır digän bulam, nindider ähämiyätsez äyberlär turında gäp kuyırtıp torgan bulam tagın...