XXI курым нерген шонкален...

XXI курым нерген шонкален...


Шудышырчык йыга йӱдын ковыжым —
Кава кӱшнӧ лӱҥга тул ден темын;
Йомын кодшо ушкал, чарнен ломыжмым,
Мӧҥгӧ корным муэш куштылемын...

Вӱдын тымык, тылзан ший воштончышто
Тӧрла ӱпшым узьмак ялын йӱксӧ —
Йомын огыл сареш, курык лончышто,
Тумо патыржын эн ныжыл йӱкшӧ...

Шӱдӧ нар пачашан я пу пӧртыштӧ
Огеш игылт Осал телекандым —
Веселан луктеш еҥ-влакын ӧртыштым
Марсианин гына, волен мландыш...

Весе сомыл, паша — толшаш курымын,
Шке компьютерже, шке интернетше,
Лиеш весе мер тургымышт, мурымышт,
Пиал веле чылам ӧндал кертше...

Сугынь лыҥ — Кайыккомбын ош корнышко
Огеш шыҥе, ойлет гын, чылаже...
Лиям йоҥылыш, тек ушан кормыжыш
Воштылеш уныкан уныкаже...

Но палем: кугеммек, коден омыжым,
Тудат тӱнӧ чарна мыйын семын:
Шудышырчык йыга йӱдын ковыжым —
Кава кӱшнӧ лӱҥга, тул ден темын...

Тиде тулжо ала-кӧн дыр чонышто
Мландӱмбалне шуен тукымвожым...
Уна вел улына тӱня лоҥгышто,
Курымешлан лӱмна марий кодшо!