«Почётный гражданин»

«Почётный гражданин»


Илен-илен, мом от уж гын тӱняште?
Ужалтын ятыр, очыни, эше возеш.
Ик баррель нефть шоген шӱдӧ долларым гын ӱмаште,
Тений ак туртын кок пачаш, коеш.

Да кок пачаш вигак чӱдеште илыш,
Шергештын кечын чылажат толеш...
Шонен шинча «Америка», кӧ сийлыш
Ты ветераным таче кас велеш?

Америка — лӱмедышыже тудын,
А шкенжын лӱмжӧ — СССР гычак Эчан...
Ах, кузе ужарген уремыште шаршудо,
Кас таче рушарнян могай кечан!

Урем тыпланыш кенета, лып лие.
Оласе-ялысе шинчам окнаш тушка:
Тошкен геройла шем асфальтын шийым,
Лӱҥгалтын, мӧҥгыжӧ толеш ушкал!

Толеш, ноен шкет вес солан кӱтӱ гыч,
Пудан леҥежым пуйто сакалтен...
Кӱтӱчӧ ожно, пуалтен «тӱтӱтым»,
Пайремыш пуйто полкым наҥгаен.

А кызыт... ончык, мӧҥгӧ, ошкыл, Маня,
Эчаным куандаре лучо шӧрет ден.
«Почётный гражданин» улат тый ялын
Ман, пӧлеклем тылат почеламутем.