Поэтын шӱгарвалныже

Поэтын шӱгарвалныже


Ик семынак йӱр выжгыкта,
ӱмбачышт пурак лончым ӱштыл,
Пеледышым шокшын шупшалын,
ик семын мардежше пуа.
Ик мландыште нуно кият —
тора гынат, улыт пеш лишыл:
Алабога ма,
Ваганьково
я Сент-Женевьев-де-Буа...

А мые Турунысо ӱшыкын
ик кӱкшакаже воктеке
Чыла поэт-влакын лӱм дене
пеледше май кечын мием.
Тайналтме гай лийыт
пушеҥге-влак шыпак кок веке,
Палатыс: пырля Мланде шарысе
уло Поэт ешым мый намием...

Ик Мландыште нуно кият.
Тудын верчынак шӱмышт пудештын.
Но илыше-шамычше веле
пудештме ты йӱкым ышт кол.
Туге: соҥгыра улына.
Илена арамланак пуредыл,
Да мыскынь лӱмнерна
эше мыскыньрак лиеш шол.

Турунысо ӱшыкым выж-ж тарватен,
кожганат лышташ-шамыч —
Чыла толшо-влак
иканаште тыге шӱлалтат.
Мыят шӱргем дене ты шӱлышын
шӱлыкшым рашак шижамыс.
Шижам, кузерак чуриемым
ош тӱнян шем пуракше деч шӱялтат.


Ом шоно, ом вучо, —
но тудо лиешыс садикте —
Ик татыште пӱтынь Сандалыкым
чонышко пыштыме жап,
Да Чон ден Сандалык
эре-эрелан лийыт икте,
Да ӱштылт йомешыс вӱдтолкынла
мландыште коштмо межам.

Мый Кече тӱнян сотыж дене
тендан дек мием,
Тендан лӱмеш шочшо
чыла мурымат намием,
Палем кеч: тунам кӱлеш ыле
чыла мурыжат, —
Но палыза манын:
тӱняште ила эше пырт порыжат...
Пырля колышташ мыланна
кӱшнӧ йӱр выжгыкталмым...

Пырля келанаш,
колын шошо лышташ кыжгыкталмым...
Ик мланде — Турун
але Сент-Женевьев-де-Буа...
Левалге юж толкын
чурийышке эркын пуа...