Kıtaydagı  ayfonnar citeşterüçe iñ zur zavodta eşçelär baş kütärgän

Alar hezmät hakları äz birelüdän, sanitar şartlardan zarlana.

Sotsial çeltärlärdä taralgan videolardan kürengänçä, yözlägän eşçe politsiyägä karşı tora, alarnıñ kübese koronavirustan saklauçı mahsus kiyemnärdän. Videoda protest belderüçelärneñ hezmät haklarına, sanitar şartlarga zarlanuı işetelä.

Baş kütärülär sişämbe irtäsendä başlangan. Eşçelär Apple vazifalarınıñ ber öleşen başkaruçı şirkät – Foxconn bezgä eşkä yallaganda väğdä itelgän ike aylık akçanı – 25 meñ yuanne (3,5 meñ dollar) tülämäde, di.

Eşçelär koronavirus testları uñay çıkkan hezmättäşlären başkalardan izolyatsiyälämäüläre belän dä riza tügel.

Source: www.azatliq.org