Hokuk yaklauçılar: kırımtatarlarnı mäcbüriläp Kırımdagı mobilizatsiyä punktlarına kiterälär

Hokuk yaklauçılar bäyälämäsenä kürä, kırımtatarlar yäşägän urınnardan mobilizatsiyälängännärneñ sanı meñgä yakınlanıp kilä, ä bälki inde artıp ta kitkänder. Bu operatsiyäneñ kiçä, 22 sentyabrdä irtänge säğat altıda başlanuı häm küpçelek kırımtatarlar yäşi torgan urınnarda baruı äytelä.

Hokuk yaklauçılar bäyälämäsenä kürä, kırımtatarlar yäşägän urınnardan mobilizatsiyälängännärneñ sanı meñgä yakınlanıp kilä, ä bälki inde artıp ta kitkänder.

Bu operatsiyäneñ kiçä, 22 sentyabrdä irtänge säğat altıda başlanuı häm küpçelek kırımtatarlar yäşi torgan urınnarda – Bakçasaraynıñ 6nçı, 7nçe mikrorayonnarında, Akmäçet (Simferopol) yanındagı Mamak (Strogonovka) avılında, Sak, Kalay (Azovskoyı), İslam-Terek (Kirovskoyı), Zuya torak massivlarında baruı iskärtelä.

İctimagıy häräkät äytüençä, reydlarda politsiyä hezmätkärläre katnaşa, ä torak punktlarda Kırım yul-patrul hezmäteneñ Rosgvardiyä belän postları kuyılgan.

"Kayber hucalıklarga yalgan yul belän kerdelär. Yärdäm kiräk dip kıçkırdılar, keşelär işegen açkaç, härbi çakıru käğaze tapşırdılar. Şulay uk eş urınnarınnan mobilizatsiyälägän oçraklar da bar. Zuyada berniçä ukıtuçı ir-atka, Bakçasarayda – meditsina hezmätkärlärenä "povestka" birgännär. Härbi çakıru käğaze tapşırgannan soñ keşene mäcbüriläp avtobuska utırtıp, härbi komissariatka iltkän oçraklar da küp terkälde", diyelä häbärdä.

Basıp alıngan cirdä yäşäüçelärne okkupant-il ğaskärenä hezmätkä çakıru – sugış cinayate häm "çirattagı mätäbä bu cinayätneñ töp korbanı – Kırımnıñ asaba halkı", dip iskärtälär "Kırım fikere"ndä.

Source: www.azatliq.org