Miñnehanov: "Federallarnıñ neft çıgaruga yaña salım kertüen huplamıybız"

Mäskäüneñ yaña salım näticäsendä "Tatneft" 40 mlrd sum keremen yugaltırga mömkin.

Tatarstan prezidentı Röstäm Miñnehanov neft çıgaruga östämä kerem salımı kertüne huplamavın belderde. Bu hakta ul yıllık matbugat oçraşında äytte. Anıñ süzlärençä, federal üzäk salım kertep hata yasıy.

"Östämä kerem salımı – yaña forma. Anı tiz arada kabul ittelär. Min neft tarmagınıñ törle buluın äytäsem kilä. Yaña neft tabu urınnarı häm 50, 40, 30 yıl tabıla torgan urınnar bar. Alardan berdäm salım cıyu bulırga tiyeş tügel. Bu salım neftne tabunıñ yaña eşlänmälärenä kagıla. Tatarstanda ul elekke urınnarda yaña tehnologiyä belän tabıla. Bez federal üzäk belän söyläşäbez. Alar kabul itkän kararlarnı huplamıybız. Tarih alarnıñ hatalanuın kürsäter. Bu formanı reformalarga kiräk bulgandır, läkin mondıy räveştä eşläü döres tügel. Bälki, bezgä kayber oçraklarda östämä kerem salımı turı kiler, yäki başka ısullar bulır. Bez kerem yugaltabız. İñ möhime – neft ölkäsendä investitsiyälär kertü mömkinlege betä. Läkin bu ülärlek däräcädä tügel. Urtak mänfäğatlärne tabarga tırışırbız. Uglevodorodlar – ilneñ baylıgı. Keçe şirkätlär dä zur zavodlar kebek salım tüli. Bez federallarga üz fikerebezne citkererbez. Monda ber törle şablon turı kilmi, eş bara", dide Miñnehanov.


1 month ago
2 visists
Source: www.azatliq.org