Şiğırlär - Rezeda Şäripova

BÜGEN BEZDÄ SABANTUY!

Bäyräm tañı

Borınnarnı kıtıklap
Uyattı koymak ise,
Samavarda koyaş kölä –
Öydä çın bäyräm töse!
Tañ belän ük torıp äti
Munça yagıp ölgergän.
İşek aldın, kapka töben
Yalt itterep sebergän.
Kunaklar kilgänçe min dä
Torıp urınnı cıydım.
Çäçemne tarap, ör-yaña
Külmägem kiyep kuydım.
Ütmi dä ütmi hiç vakıt,
Niçek tüzep torası,
Ällä inde säğat ugın
Alga taba borası?
Sizmi dä kaldı ölkännär –
Küçerdem-kuydım uknı.
Bäyräm könne ğayep tügel,
Gafu itelä şuklık.
-Başlana!-dip torıp çaptım
Malay kızlar yanına-
Sabantuy görläp uzaçak
Ärämä alanına.

Ä ärämädä...

Min genä sabırsız tügel,
Bala-çaga citärlek,
Mäydan buylap tügäräkläp,
Säylän itep tezärlek.
Allı-gölle külmäklärdän
Küzläreñ kamaşırlık,
Alan çäçäkläre belän
Bähässez yarışırlık!
Maktanışıp tuygaç, därräü
Kibetkä dip yögerdek.
Yarıy äle ölkännärdän
Alda kilep ölgerdek!
Elan kebek bormalanıp
Tezelde ozın çirat.
Kuandırdı satuçılar
Tuñdırma belän sıylap.

Köräş başlandı!

Köräşkä çıktı Azat,
Anıy köç-gayrät harap!
Şıbır tirgä batkanbız
Ul tırışkanga karap.
Köndäşe dä tiñ ikän,
Äyterseñ, töple bükän,
Kütärep alam dimä,
Bil bögep salam dimä!
-Äydük!-diyep köç birep
Kıçkırıp tavış bette,
Nihayät, köçle köndäş
Cirgä şapıldap töşte.
Häle betsä dä, Azat
Elmaydı bezgä karap.
Şundıy duslar bulganda
Ciñüne bula yaulap!

Üze yıgılgan - yılamıy

Kapçık kiyep yögerergä
Teläüçelär küp buldık.
Sıbızgı sızgıruga uk
Därräü alga atıldık.
Çü, ni häl bu, kinät kenä
Ällä cir äyländeme,
Kapçık eçendä adaşıp
Ayaklar bäyländeme -
Yaşel çirämgä suzılıp
Yatkannı sizmädem dä,
Başkalar uzıp kitkänen
Kürdem dä, kürmädem dä!
Sikerep torıp, açudan
Tomrıldım alga taban.
Ücätlek buşka kitmäde,
Berençe kildem – arttan!

Kolga başında

Kayan tapkannar bu qadär
Op-ozın neçkä agaç!
Oçı kükkä tigän kebek
Kütärelep karagaç.
İke dä uylap tormadı -
Nail külmägen saldı,
Balakların sızgandı da,
Baganaga yul aldı.
Maymıl kebek kenä ürläp,
Kolga başına citte,
Asta halık aña karap
Soklanıp ah-uh itte.
Yöräk tä bar ikän inde,
Niçek başı äylänmi,
Anıñ öçen kurkıp monda
Bezneñ tellär bäylände.
Cilkägä asıp bülägen
Şuıştı aska taba,
Işkılıp uttay kızardı,
Çıdasın gına taban!
Kul-ayaklar sıdırılgan
(Menmäs yalanös köye!),
Ämma avızı kolakta –
Tatlı şul ul ciñüe!

Çülmäk vatu

Urtada tora – çülmäk,
Kulga birdelär – küsäk,
Bäyläp kuydılar küzne,
Çualdırdılar ezne.
Ber, ike, öç... un adım,
Menä tagın butaldım!
Küpme genä sukmadım,
Çülmäkne hiç totmadım.
Mögayın, eşem uñmas,
Häylä kormıyça bulmas!
Yaulıknı çak kütärdem,
Küsäkne alıp bärdem,
Vatıldı kitte çülmäk –
Yaulıkta bulgan hikmät!

Kaşık kabıp yögerü

Avızga kaşıp kaptık,
Cıynaulap torıp çaptık.
Yomırkalar biilär,
Gel tik toram dimilär.
Şulçak kızu aldırıp,
Barıbıznı kaldırıp,
Menä siña äkämät,
Alga çıktı Säğadät!
Kilep cittem digändä,
İnde genä ciñgändä,
Ällä artık aşıkkan,
Yomırkası kaşıktan
Sikerep töşte-kitte,
Barça halık ah itte.
Säğadät yılap kaldı,
Büläkne başka aldı.
Tik nigä soñ küñelsez?
Ähä, añladık süzsez!
Säğadätne yuattık,
Aña da büläk taptık,
Söyende tagın üze,
Ayday balkıdı yöze.
Bezgä dä rähät buldı,
Küñelgä şatlık tuldı.

Katıktan akça ezläü

Koştabak tulı katık,
Toram torataş katıp,
Niçek kenä başlıysı,
Kurkunı alıp taşlıysı?
-Ber, ike, öç!-diyügä,
Katıkka avız tiyügä,
Eşlärem kitte hutka,
Kurıkkanmın iç yukka!
Bitlärem ap-ak buldı,
Borınga qadär tuldı,
Tik kayda soñ akçası,
Ällä taşlap kaçası?
Avız şäbräk sözdeme,
Ällä uynı sizdeme,
Eläkte bit, eläkte,
Min dä buldım büläkle!

Çabışkılar kilä!

Toyaklardan utlar çäçep,
Çabışkılar kilä.
Ciñü tämen iyärlägän
At ta hätta belä!
Muyınına çikkän sölge
Salu belän anıñ,
Cidençe katına kükneñ
Aşa yarsu canı.
Artta kalgan bahbay gına
Bik tä, bik tä boyık,
Küzlärenä yäş elengän
Ciñelgänen toyıp.
Çäçäklärdän täkıya ürep
Kildem dä yanına,
Sıypap, nazlap yallarınnan
Eldem muyınına.
Başın çöyep argamagım
Keşnäp avaz saldı.
Mögayın, ul bülägemnän
Bik känäğat kaldı.

Kapçık sugışı

Yuktan gına ätäçlänep,
Nurislam belän Barıy
Sugışıp kitä yazganda
Ayırıp aldık yarıy.
-Çın yegetlär köç sınaşa
Başkaça, -dip alarga,
Kapçık birdek kullarına,
Utırttık baganaga.
Täpäläşä torgaç tagın
Onıtıldı açuları,
İkäüläp kilep töşkäçten
Erıldı avızları.
Koçaklaşıp kitep bardılar
Berni bulmagan kebek.
Bezgä dä küñelle buldı,
Eçebez kattı kölep.

Citez kızlar

Çaykaladır çiläkläre,
Çaypaladır suları,
Bersennän-berse citezder
Bezneñ avıl kızları!
Çäçäkle köyäntälären
Cilkägä elep kenä,
Koşlarday oçıp kilälär
Cepkä tezelep kenä.
Çişmä suın taşıy-taşıy
Çınıkkan beläkläre,
Çişmä cırın köyli-köyli
Aşkına yöräkläre.
Aldan kilüçegä härçak
Büläkneñ - iñ zurısı,
Kötä halık küz dä almıy –
İñ citeze kaysısı?

Bulaçak çempion

Bezneñ oçtagı Välineñ
Yup-yuan beläkläre,
Ürtäşkän malaylarnıñ ul
Şäp birä kiräklären!
Timer gerne, kürçe, änä
Mamıktay gına çöyä,
Ällä gere yalganmı ikän,
Bolıtka qadär tiyä?!
Işanmıyça hätta zurlar
Kilep totıp karıylar.
Cirdän kuzgata almagaç,
Başların tik çaykıylar.
-Çempion bulır Väli!-dip
Cilkä kagıp maktıylar.

Arkan tartışu

Bigräk yuan arkanı!
Barmı ikän tartkanıñ?
Tezeldek ike safka,
Bülendek ike yakka.
Urtada torak – tayak,
Bilgegä digän mayak.
İ, arkannı tartabız,
Tirläp çıktı arkabız.
Ber mayakka citäbez,
Annan artka kitäbez...
Tırışa torgaç şulay,
Ahrı, ciñäbez bugay!
Uylap ta ölgermädem,
Çirämgä tägärädem!

Här tarafta uyın-moñ!

Bügen bezdä Sabantuy,
Bar eşeñne çitkä kuy!
Özderep uynıy garmun,
Här tarafta uyın-moñ.
Kileşep tora köye,
Urtaga çıgıp biye!
Yalındırıp tormaçı,
Çakırgannı bormaçı!
Biye-biye cilkenep,
Mäydan torsın selkenep!
Ostalıgıñ kürsennär:
-İh, şäp basa!-disennär.

Bäyrämnän soñ

Kay arada kön ütkän,
Yoklarga vakıt citkän.
Tiz-tiz genä çäylädem,
Urınnı da cäymädem,
Baş törtkänçe mendärgä
Yokı kergän küzlärgä.
Töne buyı töş kürdem,
Haman mäydanda yördem.
Ber ciñeldem, ber ciñdem,
Ber yıladım, ber köldem.
Ä şulay da şäp, häyran
Sabantuy digän bäyräm!

ÜZEM BULASIM KİLÄ
(şigırlär)

Kızık yasıym dip

Kızık bulsın äle diyep
Malay-şalay halkına,
Berkön kiçen süz kuzgattım
Cen-pärilär hakında.
Avız açıp tın kaldılar,
Borçaknı häyran sibäm!
Küräm - çäçlär ürä torgan,
Yöräklär döp-döp tibä.
Berzaman bakça eçendä
Närsäder şart-şort itte,
Karañgıda kotnı alıp,
Küzläre yalt-yolt itte.
Artık küp şıttırdım bugay,
Hätta üzem kurıktım.
Artka da borılıp karamıy
Turı öygä sıpırttım.
Aça almıyça keläne
Tirlädem, yandım, peştem.
Äkiyät satıp ällä soñ
Çın yaman hälgä töştem?
Şulçak yomşak, conlı canvar
Sırıldı ayagıma.
"Ähä, - min äytäm, - cen bu
Söylägän baya gına!"
Baksam, bezneñ pesi ikän,
Ah, sin şaytan algırı!
Kiläçäktä çama hisen
Yugaltmaska añ bulır!

Suıknı tıñlamasañ

Ay-hay usal bu suık,
Uramnan kertte kuıp.
Küp uynadıñ, citte, di,
Sineñ vakıt ütte, di.
Anı tıñlap tormadım,
Baştan-ayak urandım,
Çanamnı tartıp baudan
Tuygançı şudım taudan.
Ällä suık kurıktı,
Könne kinät cılıttı.
Şıbır su buldı tänem,
Içkındı izülärem,
Oçtı baştan başlık ta,
Arttı hättä şarf ta!
Niçek basıym susaunı?
Tämläp yaladım karnı!
Tönlä uyanıp kitsäm,
Bu nindi mähşär disäm –
Ut bulıp yana tänem,
Bik möşkel ide hälem!
Täräzä aşa kürep,
Suık toradır kölep,
Kire betkän malayga
Şul kiräk, diyä kebek.

Şırdıy belän Bırdıy

Şarkıldap kem kölä disäñ –
Şırdıy belän Bırdıy.
Köne buyı cülär satıp
Niçek alar tuymıy?
Tänäfestä, ya därestä
Berkemgä yuk tıngı.
Kolaklarnı yarıp kerä,
Tavışları – bırgı!
Ürtäşergä, törteşergä
Alar yasap kuygan.
Barmı ikän dönyada köç
Şul şuklarnı tıygan?

Yaramasa da

Yalganlarga yaramavın
Üzem dä yahşı beläm,
Tik kayçakta akılıma
Telem gel karşı kilä.
İkele aldım bügen dip
Nik änine borçırga?
Ätineñ kayışınnan da
Äybät bula kaçarga.
Malaylar belän sugışıp,
Borın kanatıp kersäm,
Dönyamnı onıtıp kayçak
Buşka cil kuıp yörsäm,
Ni fayda ul dörestän?!

Çın dus şundıy bulamı?

Ber ük yortta yäşibez,
Terälep torgan kürşe bez.
Süz bireştek gel bergä
Dus bulırga gomergä.
Minem başta belem say,
Ä dustım – uşlı malay!
Öy eşlären cät kenä
Eşläp kuya şäp kenä.
Äzerne genä min dä
Küçermäkçe idem dä,
Dustım däftären birmi,
Yalıngannı da belmi,
Yanagannı da belmi,
Hiçniçek cayga kilmi!
Gel ber süzne tukıldıy:
-Üzeñ tırış, ukı!-di.
Kara inde sin anı,
Çın dus şundıy bulamı?!

Tişek häter

-Ber säğattän kaytıp cit! -dip
Kisätkän ide äni,
Uynamadım da şikelle
Ul qadärle ällä ni,
Bik birelep kitelgänme,
Vakıt yagı onıtılgan.
Min kaytkanda koyaş inde
Yatkan ide yokıga.
Koyaş yatuın yatkan da,
Tik äni yoklamagan.
Soñargan öçen bastırdı
Mine utlı tabaga!
Niçek kenä şul häterneñ
Tişeklären yamarga,
Üzemä dä, duslarga da,
Änigä dä yararga?

Añlamadım

Ör-yaña külmägem belän
Maktanıym dip kızlarga,
Kübäläk totkan şikelle,
Yögerep çıktım uramga.
Mine kürep şakkattılar,
Hätta telsez kaldılar.
Äyländerep-tulgandırıp
Külmägemne karıylar.
-Çü,- dim, -ipläp! Berük ipläp,
Pıçırata kürmägez,
Çittän genä soklanıgız,
Kırıyıma kilmägez!
-Äy!-diyep torıp çaptılar,
Yalgızım basıp kaldım.
Närsä buldı soñ kızlarga,
Hiç berni añlamadım!

Rässam

Küñelsez bezneñ uram –
Sorı töslärgä tulgan.
Akbur aldım kulıma –
İzge niyät uyımda.
Bik katı buldı eşem,
Tırışıp tirläp peştem.
Şundıy sälät barında
Bizäp çıktım barın da:
Podezdlarnıñ eçen dä
(Kızganmadım tösen dä!)
Stenalar, baskıçlar,
İşeklär, utırgıçlar
Sürätlär belän tuldı.
Bik tä käyefem buldı .
Yalt itep kaldı uram,
Soklanıp karam toram.
Ni genä yasamadım,
Tik berse maktamadı!

Yal köne

-Urıñ-cireñ cıyılgamı?
-Cıyılgan.
-Tavık-saba yuılganmı?
-Yuılgan.
-Çäçläreñne taradıñmı?
-Taradım.
-Däreseñne karadıñmı?
-Karadım.
-Göllärgä su sibelgänme?
-Sibelgän.
-Çüp çiläge tügelgänme?
-Tügelgän.
-Uyna inde...
-Uynar idem, arılgan,
Kuzgalasım kilmi urınnan!

Kuyan küçtänäçe

Kap-kara tuzanga batıp,
Ätiyem kayta eştän.
Kerfek kakmıy kön dä anıñ
Kırdan kaytuın kötäm.
Köräk qadär kullarına
Kütärep alıp söyä:
-Kuyan küçtänäç cibärde
Kızıma, -diyä-diyä.
Kesäsendä kulyaulıkka
Törgän kibänbaş bulır,
Avız suların kiterep,
Ket-ket keterdäp torır.
Kuyanı da yumart ikän-
İñ tämle ciren birgän.
Kibänbaş yaratuımnı
Ällä ätidän belgän!

Ciläk cıyganda

Hiç tulam dimi çiläk,
Kaya kitkän bu ciläk?!
Kön ozın ayagurä,
Taudan-tauga yögerä
Cep özär häl kalmadı,
Kuş uç ciläk tapmadım.
Uf! Çügälädem cirgä,
Çü, kürenäme küzgä –
Elmayıp tora ciläk:
-Öz, - dip, -mine tizräk!
Menä ber, menä ike..
Hay, ciläk monda küpme!
Küzem genä timäsen,
İnde beldem häyläsen!

Buran

Kotırıpmı-kotırınıp
Täräzä kaga buran,
Ulıy-ulıy morca aşa
Öygä kerä dip toram!
Tübälärne döberdätte,
İşeklärne kapladı,
Can-färmanga tırışsa da,
Kerer tişek tapmadı.
Küpme genä dulasa da,
Ciñä almadı buran.
Garlegennän kaçıp kite,
Tınıçlap kaldı uram.

Közge yanında

Elmaysam – yılmaya,
Moñaysam – moñaya.
Ürtäsäm – ürtäşä,
Min däşsäm – ul däşä.
Äy, kızık tügel dä,
Kem soñ ul közgedä?!

Cil malayı belän

Cil malayı belän bügen
Könozın uynap yördem.
Koşlar kebek oçtım küktä,
Dulkınnar bulıp yözdem.
Kaysıbız citezräk dip
Uzışıp ta karadık,
Bolınnarda yögerä-yögerä
Ülännärne taradık.
Kay arada kön uzgan soñ,
Sizmiçä dä kalganbız.
Ayaklar tıñlamas bulgan,
Tämam häldän tayganbız.
Cil malayı da yoklıydır,
Tatlı töşlär küräder.
Bälki äle töşlärenä
Min - dustı da kerämder.

Kiresençä

Kön sayın yaña maşina
Kütärep kayta äti.
Tik alarnıñ bik-bik äze
Miña uynarga täti.
Ul alarnı kızıksınıp,
Ber sütä dä ber cıya.
-Bügengä timi tor, -diyep
Ya çitkä alıp kuya.
Berkön tüzemem tökände,
Turıga yarıp äyttem:
-Äydä, sin bul minem ulım,
Min bulıym sineñ äti!

Enä nigä açulı?

Äniyem tekkän külmäkne
Eläkterdem kadakka.
Cilferdi cildä yırtıgı
Sälam birep yak-yakka.
Şul koyma başına nigä
Menärgä kiräk ide!
Ertıknı kürsä, änineñ
Käyefe kitär inde.
Tiz genä öygä kerdem dä,
Enägä cep sapladım.
Tegim genä digän idem,
Çänçep aldı barmagım.
Keçkenä yamau salgançı
İmannı köyde enä!
Nigä şulay açulı ul –
Töşenä almıym hiç kenä?!

İrtägädän üzgäräm

-"İkele"dä, "ikele"! -dip
Sükte äni ber könne.
Küräse kilmider inde
Yalkau itep hiç mine.
Nişlim soñ, irtän yokıdan
Toruları bik kıyın.
Yugıysä, hiç naçarlıkta
Tugelder minem uyım.
Mäktäpkä kilep citkänçe
Küp däres ütkän bula,
İñ yahşı bilgelär inde
Barısı da betkän bula.
İrtägädän ük üzgäräm –
Yañaça yäşi başlıym,
Soñga kalu ğadätemne
Bötenläy "sızıp" taşlıym!
Ä bügengä süz äytmägez,
Tuygançı yoklap kalıym!

Üzem bulasım kilä

Koyma başında yörergä yaramıy,
Uram buylap yögerergä yaramıy!
-Sin kız bala, ädäple bul, - diyälär,
"Yaramıy" dip gel teñkämä tiyälär.
Şundıy kızık uyınnardan tıyalar,
Kürşe kızın ürnäk itep kuyalar.
Şayarmıyça, anıñ kebek tik torsam,
Ber urında tıp-tın gına utırsam,
Sezgä bik tä rähät bulır ide lä,
Nikter üzem bulıp kalasım kilä!

Ürmäküç yätmäse

Kön-tön kordı ürmäküç yätmäsen,
Posıp kına küzätte kem elägäsen.
Kürenmi şul yıraktan yıfäk tügäräk,
Kilep kaptı aña güzäl ber kübäläk.
Bärgälänä, näfis kanatları çak sınmadı,
Kızgandım da, kübäläkne kotkardım.
Häylä belän ul kem dä ciñä,
Sin, ürmäküç, maturlıkka timä!

Başsız kadak

Tukı-tukı, tukı-tukı
Tukıldatıp sukkanga,
Kirelänep tora kadak
Käkeräyep tuksanga.
Ällä çükeçe naçarmı,
Ällä tottımmı caysız.
Baksañ, ğayep bezdä tügel,
Kadak bit bulgan – başsız!

Bakçaga barası kilmi

Hiç barası kilmi şuşı
Balalar bakçasına,
Şuña da irtän käyef yuk,
Açulı min barısına.
Eh, tizräk üsep citep,
Eşli başlarga ide,
Yuksa, mannıy botkaları
Tämam teñkämä tide.
-Uf, -di äni avır sulap,-
Tagın eşkä barası!
Ällä sineñ belän, kızım,
Urınnı alışası?!

Döreslek kayda?

Ul suktı, min suktım,
Min sukkaç ul suktı -
Yarıysı sugıştık.
Täpäli torgaçtın
Äle baya gına
Şäp duslar ikänne onıttık.
Minemçä - min haklı,
Anıñça - ul haklı,
Kemdä soñ döreslek?
Nigä soñ bu hakta
Añlatıp yazılgan
Yuk ikän ber genä däreslek!
Miña da küñelsez,
Aña da küñelsez,
Nik kenä «sözeştek»!
Üpkäläp yörüe
Bezne tiz tuydırdı,
Şul da soñ buldımı yegetlek!
Ul miña yılmaydı,
Miñ aña yılmaydım,
Açular basıldı.
Duslıktan qaderle
Berni yuk dönyada -
Küñellär şatlıktan taşıdı!

İşek

Äbi açsa –
Şıgır-şıgır
Sıkrıy işek.
Äni açsa –
Şıldır-şıldır
Cırlıy işek.
Ä min açsam –
Şırık-şırık
kölä işek.
Menä niçek!

Kıyu malay

Sineñ çıp-çın yulbarısnı
Kürgäneñ yuktır äle,
Karşısında tel kürsätep
Yörgäneñ yuktır äle!
Azau teşlären tırpaytıp,
Bik katı ırlasa da,
Östemä sikermäk bulıp,
Koyrık bolgasa da,
Tamçı da kurıkmadım min!
Işanmasañ süzemä,
Zoopark karavılçısınıñ
Barıp sora üzennän!

Yögerek çişmä

Çelter-çelter yögerek çişmä
Üzännär buylap aktı,
Dulkın bulıp yılgalarnıñ
Yarına kilep kaktı.
Korablar belän uzışıp,
Zur diñgezlärdä yözde,
Ak bolıtka äverelep,
Zäñgär küklärgä mende.
Cillär kuıp alıp kitte
Anı Cir şarı buylap,
Säyähät kılıp kayttı ul
Ällä kaylardan urap!
Tanış üzännärne kürgäç,
Ber mälgä tıp-tın kaldı.
Şatlıgınnan cirne koçıp,
Tamçılar bulıp tamdı.

Lap-lap

Ayu kilä lap-lap,
Äpän-töpän atlap.
Adımnarı zup-zur,
Kürsä, kem dä kurkır!
Basıp toram der-der,
Yuksa, tor da yöger!
Yözem buldı ap-ak,
Cirdän kupmıy ayak
İnde kaldı çak-çak...
Uyandım bit şulçak!

Bulıştım

Bügen bit bäyräm köne,
Kuandırıym änine!
Yalt itep kuydım öyne,
Cıyıştırdım bar cirne.
Äniyem nazlap söyde,
«Hay, rähmät, kızım!»-dide.
Äle yarıy sizmäde,
Ällä yüri kürmäde -
Çınayak vatıgın da,
Augan göl savıtın da,
Su tügelgän kelämne,
Sıdırılgan idänne...
Kürmiçä soñ, kürgänder,
Ul da bäyräm digänder,
Käyefne töşermäskä
«Tırışkandır» kürmäskä.

Añlamıym

Bärelsäm dä, sugılsam da,
Ni bulsa da – yılamıym.
Egılsam da – sikerep toram,
Änä şundıy yıldam min.
Egılıp yılagannarnı
Nigäder gel cällilär.
Mine isä :«Taşbaş!»- diyep
Ärlilär dä ärlilär.

Ser

Berkön dustım iñ yäşeren
Seren çişte miña,
Avız açarga da kurkıp
Yörim menä şuña.
Ser digäneñ mine ürtäp,
Ällä inde yüri
Çıgıp oçam, digän kebek
Tel oçımda yöri.
Bu qadär dä ser saklavı
Avır dip kem belgän!
Büleşmiçä tüzä almadım
Mindä başka belän.
Eçlär buşaganday buldı,
Şundıy rähät, ciñel!
Sersez kalgaç kına nikter
Töşte beraz küñel.

Tıñlausız kullar

Tıñlausız minem kullarım,
Gel tik tora belmilär,
Üzem dä sizmiçä kalam,
Ber-ber şuklık eşlilär.
Ällä kesägä tegäse,
Ällä ciñne bäylise,
Naçar ğamäldän tıyarlık,
Bardır bit ber häyläse?
Uylıy torgaç, ezläp taptım –
Kullarga bit eş kiräk!
Pıçkı, çükeç totasıñmı,
Yaisä sänäk, köräk...
Faydalı hezmättä genä
Şatlık kiterä kullar.
Monnan arı, ant dip äytäm,
Tıñlarlar mine alar!

Aldakçı yañgır

Öyermälär tuzdırıp
Kilä kap-kara bolıt.
Bik korı tordı könnär,
Susıkkan ide göllär.
Başların tübän iyep:
«Tamçı, tamçı, tam!»-diyep
Pışıldap yalvardılar,
Ömetlär bagladılar.
Ä bolıtmı? Buş kuık!
Cil alıp kitte kuıp.
Kötterep tä yaumadı,
Yañgır tagın aldadı!

Click or select a word or words to search the definition