Şiğırlär - Muhammat Sadri

Kaz kanatı
Kaz kanatların ezlärgä
Töştem su buylarına,
Su buylarında yörgändä,
Sin genä uylarımda.

Kaz kanatların sanadım
Tezelep kagınganda,
Aydagı kızga karadım
Özelep sagınganda.

Kaz kanatın kagınganda,
Mamıkların cil ala,
Yäş vakıttagı mähäbbät
Mäñgelek bulıp kala.

Koyaş

Mine koyaş, iñ berençe kürep,
Täräzämnän täräzämä yörep
Küzli kebek. Nider ezli kebek.
Ayırılabız diyep kiçendä,
Uynıy kebek bülmäm eçendä.

Koyaşımnı här tön kötäm min,
Anı kötep sagnıp betäm min,
Karıym oçsız kükneñ türenä...
Yul birmäsä bolıt üzenä,
Sagış töşä yaktı yözemä.

Açık tañda, nazlı irkä kebek,
Nur uynatıp yanıp häm kölep,
Erak cirlär, taular artınnan
Bezneñ yakka aşıgıp kilä ul,
Söyenä-söyenä nurlar sibä ul.

Mine koyaş, iñ berençe kürep,
Täräzämnän täräzämä yörep
Küzli kebek. Nider ezli kebek.
Ayırılabız diyep kiçendä,
Uynıy kebek bülmäm eçendä.