Säğat Sukkan Sayın

Sanarga öyränäseñ...

Vakıt ütkänne toya başlıysıñ...

Öyrätälär: kiçä akça taptıñ, bügen matematikadan mäsälä çişäseñ, irtägä kanikul başlanaçak...

Säğat sanıy başlıysıñ – üsteñ... Säğatkä karap yöri başlagaç, vakıt citmägänne sizäseñ...

Berkönne säğatneñ zatlısın satıp alasıñ, altın çılbırlısın...

Aldıñ, kaytarıp elep kuydıñ... dıñ... dıñ...

Dönya kuu buldı şunnan soñ böten tormışıñ, dönya kudıñ...

Dönya kudıñ: baylık cıydıñ, keşedä bulmagannı alıp kalırga tırıştıñ, kürşegä karaganda yahşırak lyustra aldıñ, bällür-farfor belän şkaf tutırdıñ. Ä stenada säğat suktı: dıñ... dıñ... dıñ... Sizmädeñ dä inde anı, işetmädeñ, vakıtıñ gel tar buldı.

Küpme kusañ da dönyanı kuıp totıp bulmagannı tiz genä añlamadıñ, añlarga telämädeñ, anıñ sayın siña vakıt taraygannan taraya bardı, üzeñ taraydıñ. Haman aşıktıñ... aşıktıñ: tizräk kiräk! Vakıt yuk! ölgeräse ide! Davay! Davay!

Säğat suktı... här kön irenmiçä vakıtnı kürsätep tordı, säğat sayın suktı, iseñä töşermä keläde. Sin aşıktıñ. Kiyem östenä kiyem öydeñ, skladka äylände öyeñ... Akça belän genä dus buldıñ, akçaga öyländeñ, akça kolı buldıñ da betteñ...

Bakça aldıñ, daça saldıñ, et asradıñ, äyber cıydıñ, yozaknıñ gel zurısın eldeñ – kön artı uza tordı köneñ...

Kemeñ bar soñ häzer, yä, kemeñ?

Uylamadıñ! Säğatkä genä karap aldıñ da tormış kudıñ... tormış kudıñ... kudıñ... dıñ... dıñ...

Könnär uzdı, aylar, yıllar. Sineñ gomereñ uzdı, üzeñ tuzdıñ... Aşamadıñ, eçmädeñ – maşinalı buldıñ...

Mizgellärse tormış ütkärdeñ: aldım bit! taptım! yünättem! eläkterep kaldım bit! Ber närsäñ yuk ide – üzeñçä bar närsäle buldıñ. Küñel baylıgıñ tumıştan tulı ide – tarattıñ da beterdeñ. Bay ideñ – yarlı bulıp kaldıñ. Tuzsañ tuzdıñ, ämma çın baylıknı fani dönya baylıgınnan ayıra almadıñ... Aldandıñ...

Bügen dä köneñ uzdı. Argansıñ... işetäseñme: dıñ... dıñ... dıñ... Ällä gomer ütkän däme?! Yuktır, diseñ, yuktır... Işanmıysıñ, ışanmadıñ. Säğat çılbırın tarttıñ... tıñ... tıñ... tıñk! Sügenmä, sukranma - özelde şul çılbır! Buşka sütelgän gomer -

özelgän çılbır...

Özelde çılbır, özelde: zıñ-ñ-ñ... Sin ber yalgızıñ... ber yalgızıñ... zıñ...

1993 yıl

Click or select a word or words to search the definition