Putevka

(yumoreska)
Könnärdän berkönne Mönirägä ahiräte Näfisä şaltırattı:

- Älü, ahirät, ireñ belän ikegez dä otpuskıda ikän, dip işetkän idem. Karale, berär cirgä yalga-mazarga barırga planıgız yukmı?

- İ-i, ahirät, barırıyık ta, kesä yagı takırrak şul,- dip kölde Mönirä.

- Menä şuña da äytäm şul,- dip göreldäde tege baştan Näfisä. - Minem hezmättäş Soçiga barırga putevka algan ide. Kire uylagannar. Şunı, «yandırıp» äräm itkänçe, yartı bäyäsenä genä satam, di...

Möniräneñ küzläre oçkınlanıp kitte.

- Döres, putevka ike keşelek. İreñ belän bergä bula inde. Anıñ işe cirgä alarnı söyräp barsañ, gel dä yal itmiçä kaytuıñ da bar. Tik şulay da, Mönirä, mondıy şansnı ıçkındıra kürmägez, - dip tögälläde süzen ahiräte.

Içkındıramı soñ, hiç ıçkındırmıy. Mönirä eşne kızu tottı. Şunda uk, du kiterep, Sälimne uyattı. Tegese mahmırdan avırtkan başın totıp, kire yakka borılıp yatmakçı ide:

- Cıyına başla, öç könnän Soçiga kitäbez,- dip, iren telsez kaldırdı.

- Nindi akçaga barmakçı bulasıñ anda?

- Bakça tulı bäräñge, şunı satarbız änä. Bezneñ ikebezgä genä kış çıgarga ike kapçıgı citär.

Mönirä üze, putevka yullarga dip, Näfisälärgä cıyındı, kulına köräk, çiläk, kapçıklar tottırıp, Sälimne bakçaga ozattı. İşektän çıgışlıy:

- Algan bäräñgeñne şunda uk sata torsañ da bula. Kürşe Gariflar bıyıl bäräñge vak, bulganı da çerek, beraz satıp almıyça bulmas, digännär ide. Ber bakça aşa Banularnıñ da berär kapçık östämä bäräñge kiräk bulır, digän süzläre bar ide. Avtobus tuktalışında bäräñge alabız, digän ber-ike belderü dä kürgän idem. Tik işetsen kolagıñ, arzanga cibärä kürmä...

«Baş tözätergä ber yartı alırlık akça yuk, ä ul Soçiga çıgıp kitmäkçe»,- dip sukrana-sukrana, Sälim bakçaga yünälde...

Öç-dürt kapçık bäräñge kazıp algaç, kürşese Garifka süz kattı ul.

- Küpmegä satasıñ soñ?- dip kızıksındı tegese.

Menä monısın uylap betermägän ide şul Sälim.

- İke çiläge küpme?- dip kabat soradı Garif. Sälim, ike dä uylamıyça:

- Äydä, çurt s nim, ber «yartı»ga cibäräm,- dide.

Anıñça «yartı» arzan tügel ide (bigräk tä baş çatnap avırtkan çakta). Çönki hatını, şul bäyägä arakı eçep, tämam bölderep beteräseñ inde, dip zarlangalıy bit.

Garif bäräñgene ike kapçık aldı. Sälim ber yartını açıp, baş tözätkändä, ikençe satıp aluçı da kilep citkän ide inde. Ul bar bulgan bäräñgesen arakılata gına sattı. Cün bäyägä bulgangamı, ahırdan kilgän keşelär, hätta, Sälimgä köräkne dä tottırmadılar. Bäräñgene üzläre kazıp aldılar.

Möniräse putevka totıp bakçaga kilgändä, Sälim bäräñge sabakları östendä çalkan yatıp:

- Üz ilemdä yämle miña

Bäräñge bakçası da,- dip cır suza ide inde.

Click or select a word or words to search the definition