Şiğırzar - Änğäm Atnabayiv


Min bıl yırze maturlarğa tıuzım


 Min bıl yırze maturlarğa tıuzım
 Häm kürergä tıuzım
 Güzällekteñ kükkä ürläüyen.
 Zakondan tış, tip iğlan itäm
 Yämhezlekteñ bötä törzären.

 Sudqa biräm ğäzelhezlek tigän
 Bıuattarzan kilgän ğäzätte
 Ültereşteñ üzen ülteräm dä
 Tik qaldıram yırzä häybätte.

 Hörmätte häm tınıslıqtı yırzeñ
 Padişahı itep qaldıram,
 İldän-ilgä yörör vizalarğa
 "Duslıq, tuğanlıq" tip yazzıram.

 Qayğılarzı qayırıp ırğıtam da
 Utqa halam unıñ oyahın:
 Keşe bähet menän yoqlahın da
 Yañı bähet menän uyanhın.

 Min bıl yırze maturlarğa tıuzım,
 Tazartırğa tıuzım
 Yıyın häşärättän, şaqşınan
 Häm tözörgä unı mäñgelekkä
 Tik güzäldän, nıqtan, yaqşınan!

 


1961


Qapqa töböndä


Auıl östön tınlıq qaplağas,
Qart-qorolar yatıp yoqlağas,
Yöröüselär bötkäs küz atıp,
Yıget kilde qızın ozatıp.

Tuqtanılar qapqa töböndä,
Qız aşıqqan buldı öyönä;
Yıget unı qıstap tuqtattı,
Yılı hüzzär äytep yıuattı.

Totop aldı unıñ bilenän...
Qaynar hüzzär, qaynar irendär...
"Abau, möhäbbäthez, kit bınan!"-
Tigän buldı qızıy, tik haman
Yıgetenä nığıraq hıyındı.
Ay nurına donya qoyondo.
hüzzär bötmäy yöräk türendä,
Ular haman qapqa töböndä.

Qızı tağı kitte üzgärep -
Häterläne äsä hüzzären.
İnäm, tiyep tağı uqtaldı,
"Azğa ğına" tağı tuqtaldı;
Ular hüzze tağı yañırttı,
Ul arala inde tañ attı.

Qabatlana şulay kön hayın
Yäşlek tigän nämä, moğayın,
Yoqohoz häm aylı tön menän
Başlanalır qapqa töbönän.
 




Öyrättelär


Ğümer buyı mine öyrättelär,
Öyrättelär barı yaqşığa,
Başta şıuışırğa,
     täpäy basırğa,
            atlarğa...

Ata-babalarzıñ ğöröf-ğäzäten
Üzemsälätep qabatlarğa,
Öyrättelär äsäyımä «ännä»,
Atayıma «ättä» tiyergä.
Aşap bötkäs,
            qorhaq tulmaha la,
Bitte hıypap «äppär» tiyergä.

Vaqıt yıtkäs,
Öyrättelär häref tanırğa
Häm ikenän berze alırğa...
Vaqıt yıtmäs boron, öyrättelär
Tırma tırmatırğa,
               yäğni irtän,
Küzze yırtıp, eşkä barırğa.

Tuqmap öyrättelär ilamasqa,
Keşe ilağanda kölmäskä,
Auızıñ tulı qara qan bulha la,
Doşman aldında tökörmäskä...

Öyrättelär, buğay, «töşörmäskä»,
Ä töşörgän saqta
Tura basıp öygä qaytırğa.
Hatta öyrättelär,
               tämäke yuqta
Munsa mügen töröp tartırğa...

Ä hine yaratırğa?
Ber kem öyrätmäne.
Ber kem öyrätmäne.
...Qasıp-bosop üzem öyrändem.
 


1968