Şiğırlär - Raşat Nizami

İdeldä köz
İkäü yörgän yar buyların
Yuksınıp kilgän idem.
Gacäplänep karap toram:
Közlärgä kergän İdel.
Karakuçkıl dulkınnarda —
Arıganlık bilgese.
Üzgäreşsez kalgan bugay
Komnarnıñ gına töse.
Sıñar akçarlak talpına,
Kanatların uynata.
İke kanat aslarında
İdel cäyelep yata.
Koyaş belän su arasın
Cäy buyına gizgän ul.
Akçarlaknıñ töse uñgan —
Kitep barır tizdän ul.
İke kanat aslarında
İdelne toyıp kara!
Yamansu, güyä akçarlak
Mäñgegä kitep bara.
Közneñ bu yugaltuların
Sin nigä kızganasıñ?
Kiterer bezgä Tabiğat
Yazlarnıñ ör-yañasın!
Koşlar kitä, yafrak kitä
Kem ğayeple, ezlämik.
Kitmäsen söyü! Añarga
Säcdä kılıp tezlänik!
Moñsu halät
Cillär sıman, su agışı sıman
Häräkättä uzdı könnärem.
Yoldızlarga yakın bulıym diyep,
Min biyekkä taba ürlädem.
Fani dönya kaynap kına tora
Bäğıreñä sineñ törtelep.
Ber uylasañ, gel tupaslık anda,
Ber uylasañ üze — göl kebek.
Uylandıra küklär zäñgärlege,
Moñsulata şäfäq balkışı.
İmän äle, imän yäşäp yata,
Koçagında — yafrak alkışı.
Yäşen bit ul çäçäklärne tügel,
İmännärne sugıp audara.
Yäşen sukkan käüsä töplärendä
Kırmıskalar gına sau kala.
Tabiğattä — kırıslıklar,
Ä tormışta — niçek, ni-närsä?
İl küzendä cavap totası bar,
Sınamakka sine cibärsä.
Sıngan çagı bula küñellärneñ,
Süngän çagı bula uçaknıñ.
Köl astınnan yäşäü çatkıları
Bärep çıga barıber şul çaknı!
Yoldızlarnıñ kinät atıluı
Tıngı birmi miña kiç-irtän.
Berkem işetmägän avazlarnı
Nigä ikän yışrak işetäm?..