Şiğırlär - Gali Rähim

GALİ RÄHİM

Romans

Ber zamannı sine kürgän idem:

Aksıl, tonık ide yözläreñ,

Tonık altın ide näq çäçläreñ,

Firäzädäy — zäñgär küzläreñ.

Tatlı hıyal belän küz aldımda

Yoklap kitkän idem tirbälep...

Şul hıyalım mañgayımnan söyde

Salkın kışlar buyı tirbätep.

Uyandım min şul uk hıyal belän

Moñlı, güzäl yaznıñ könendä;

Küz aldımnan haman sin kitmädeñ

Nurlı cäyneñ yaktı tönendä.

Äyt: küñelne nişläp dulkınlata

Kölüläreñ, äytkän süzläreñ?

Çäçläreñ şul sineñ tonık altın,

Firäzä kük — sineñ küzläreñ...

Sonet

Utrıp urmannıñ auzında töynädem min,

Bu moñ tönne sandugaçtan könnädem min;

Gacäyep bu matur töndä el dä niçek

Tulılıgımnan bähetemneñ ülmädem min?

Ay yaktısı töşkän dä kül şäülälängän,

Kül östennän toman çıgıp gäüdälängän,

Matur-matur ak külmäkle kızlar bulıp,

Kütärelgän ap-ak kömeş däü lägännän.

Ay nurınnan alar kiyem kiyengännär,

Saf-saf bulıp tezelgännär dä kilgännär,

Kilgännär dä minem östkä iyelgännär.

Nurdan bulgan bu kızlarnıñ arasında

Kürgäçten «ike küzem karası»n da

Onıttım min yörägemneñ yarasın da.