Bu dönyada maturlık bar...

Keşe bulıp cirgä tudıñ – alga ımsın, Yäşäü yämen tatıp kara – ul ber tılsım, İzge yulda şähit bulsañ ileñ öçen, Halkıñ sine izge itep doga kılsın. * * * Romaşkalar kinängändä çäçäk atıp, Cir sulışın tıñlıym kayçak cirgä yatıp – Sızlana ul, ıñgıraşa, äytä kebek: Min kiçergännärne, Keşem, kara tatıp! * * * Niçek keşe ğomer itsen tınıç kına – Baş oçında elep kuygan kılıç tora, Şul kılıçnı tizräk özep töşerü uyı Küpme cälladnıñ uç töben kıçıttıra... * * * Añlıy almıym gamsez, tınıç yäşäüçene, Añlıy almıym tirläp kılıç yasauçını, Häyät äle şundıylarnı tudırganda Kem ışanır tınmas diyep yäşäü çıñı... * * * Yäşlegemdä nider kalgan onıtılıp: İzge eşlär – ölgermägän min kılıp, Nider kötkän küzlär kalgan – moñ tulıp, Hıyallarım – ireşmägän omtılıp... * * * Sabıy küzläreneñ kersez karaşı... Änkäylärneñ açı yöräk yarası... Barmı bütän canı sukır bulgannarnıñ Küñel küzlären açtıru çarası?! * * * Kayber duslar äytä, sin dip berkatlı, Beläm üzem, ul duslarım meñ haklı – Bu dönyadan kara ezli belmi canım, Ücätlänep ezli annan gel aknı... * * * Igı-zıgı, borçulardan tämam tuydım, Barın cıyıp bäğıremä bikläp kuydım, Könem ütte, atnam ütte – min üzemneñ Bu dönyaga kiräk tügellegem toydım. * * * Şıbırdaşıp cirgä yafrak koyıla – "Täftiläü"ne köylägändäy toyıla, Ğomerlärneñ fanilıgın toyıp şulçak Ärnep-sulkıldap bäğırlär kıyıla... * * * Bu tormışnıñ bula şundıy mizgele – Içkına kuldan häyätneñ tezgene, Kabat anı tezgenlärgä köneñ tügel, Ğomer könnäreñneñ citmi yöz-meñe. * * * Tañnar ütkän, könnär ütkän, kiçebez, Säfär çıgıp, yulda kalgan işe bez, Töngä kalmıy şul yullarnıñ ahırına İreşergä citsä ikän köçebez... * * * Yazmışlarnı hiç kenä dä añlap bulmıy, Yazmışlarnı hiç kenä dä aldap bulmıy, Yäşäeşneñ Allah birgän töp kanunı – Yalgan belän hakıykatne yalgap bulmıy. * * * Mänsezlärgä yäşäü ciñel anısı – Nider uylap köyäse yuk, yanası, Nik tudırdım bu balanı dönyaga, dip Ut yota tik tabıp bakkan anası... * * * Mähäbbätne sınıy ğomer agışı – Ayırılular-sagınular sagışı, Sagınularnıñ açılıgın söyli kebek İyelä-bögelä kipkän yılga kamışı... * * * Kayan kilep adaşkan bu ak bolıt – Ällä bähet kükkä aşkan ak bulıp, Koçaklıysı kilä üzen oçıp menep, Äkiyättäge ber kanatlı at bulıp! * * * Minem küñelem şundıy inde – "osobıy", Ya sataşkan ber mäcnün ul, ya sabıy, İrtä dimi, kiçen dimi, ezlänä, Añlıy almıym, nigä şulay gasabi!.. * * * İskä alsa ihlas belän Äğläsen Onıta keşe näfseneñ däğvasın, Tiränräk añlıy başlıy Keşe bulıp Yäşäveneñ cirdä asıl mäğnäsen. * * * Aptırıym min kayçagında baylarga – Hıyallanalar oçarga aylarga, İldä may yuk ğadi tormış arbasınıñ Şıgırdagan tägärmäçen maylarga. * * * Başkalarnıñ fikerenä tüzmiseñ, Uñnan-suldan haman kara ezliseñ, Üz-üzeñä tik ber karap baksañ ide – Härkemdä dä yuk şul küñel közgese. * * * Tañ ata da, küzläreñä koyaş baga: – Ni kılırga niyät bügen, Fälän aga? Zaya ütkän här kön sayın kaytarası Burıçıbız arta bara bu dönyaga. * * * Üz yazmışın bähet itep ürgän keşe, Bähet kötep korı kalgan sürän keşe, Şundıylardan ğıybrät alır bu dönyaga Keşe bulıp yäşim diyep kilgän keşe. * * * Canım yaralı, dip kemgä zarlanasıñ – Bu dönyada can yarasız kemnär bar soñ? Üz yaraña tüzep bula, duslarıñnıñ Dävalarga tırış kübräk can yarasın... * * * Balaçakta iyärlägän atlar... Üsmer çakta bez bireşkän antlar... Bäğırlärneñ iñ türennän suırıp alıp Kem soñ sezne cirgä salıp taptar?! * * * Yuragannar kayçagında yuş kilä, Telägännär kayçagında huş kilä... Tik aldana kürmä berük öndä, diyep, Andıy hällär barı yaktı töş kenä. * * * Keşe küñele säğadätle çişmä kebek, Moñnar aga annan sarkıp-tibep, Şul moñnarın añlıy belsäk, ber-berebezneñ Häyät çişmäläre betmäs kibep. * * * Tabiğattä nindi mizgel, kür sin ä, İke çäçäk aşkına ber-bersenä – Ğaşıyqlarnı kavıştıra almaganga Cirdä aunap çarasız cil körsenä. * * * Kön-tön aga cırlıy-cırlıy çişmälär, Serläre küp şul alarnıñ çişmägän, Bähetleme uçka alıp çişmälärneñ Ser-sihätle salkın suın eçmägän?! * * * Ber sorauga cavap tapmıy yörim küptän: Nik atıla bu yoldızlar Cirgä küktän? Yoldız bulıp kuyınına atılırday Planetalar bu ğalämdä yuktır bütän! * * * Şuşı cirdä bez yäşise, belmibezme, Ällä belep kolakka da elmibezme? Yaralıybız, pıçratabız, agulıybız – Nigä bolay mıskıllıybız cirebezne?! * * * Bu dönyada sihri-serle köçlär bar – Cannı canga bäyli torgan hislär bar, Şul hislärne bähet itep ürer öçen Yäşlektäge tiñsez aylı kiçlär bar... * * * Söydek tä bez, söyeldek tä – meñ şöker, Küñellärgä şifa-bälzäm şul fiker – Söyü qaderen belgännärgä ğomer buyı Doga itep kabatlıysı ber ziker. * * * Yarıy äle bu dönyada güzällek bar – Ber kürüdä üzägeñne özärleklär, Güzällekne kürä belsäk, cannı nazlap Ğomer buyı bezne söyü "ezärleklär". * * * Mäktäplärdä yuk mähäbbät därese, Ä bit yuksa bez mähäbbät varisı, Üzebezçä söyep, üzebezçä, dimäk, Söygännärneñ küzlärenä karıysı! * * * Tañ belende yırak ofık çitennän, Tañ cilläre übep aldı bitemnän, Sinsez ütkän täüge tönem hatiräse – Tulgan aynıñ ber poçmagı kitelgän... * * * Sorarlar bit kilgäç Täñreñ yanına: – Nindi öleş kertteñ söyü fänenä? Könläşerlek tügel lä hiç, äy Ğarifcan, Söymi-söyelmi kitkänneñ hälenä! * * * Yäşi idem tınıç kına, bitaraf, Bar dönyamnı tetränderde şul karaş, Çäçlärem kük matur itep hisläremne Tara inde, sihri güzäl çäçtaraş! * * * Keşe cirgä yılap tua, küräseñ, Sizenäder ber kön kilgäç üläsen, Añlap ala cirgä yukka kilmägänen, Yatlap algaç barı söyü süräsen. * * * Koyaş batkan kerfekläreñ arasına, Niçek tüzim ul küzlärneñ karaşına, Uylamadım şul küzlärneñ karaşınnan Yörägemä sulmas yalkın kabasına... * * * Ğayep itmä äle mine sürän, diyep, Hisläreñne yäşeräseñ tirän, diyep, Hisläremne yörtälmim şul uç töbemdä, Här oçragan cilbäzäkkä biräm, diyep. * * * Arıp kitsä canım tormış gamennän, Täm tapmıy başlasam yäşäü yämennän, İskä alıp sineñ nazlı koçagıñnı Avız itäm saf söyü bälzämennän... * * * Söygän yarıñ kuyınında ber göl bulsañ, Uzışlarda yarsıp torgan döldöl bulsañ, Bu dönyada yäşädem dip yeget bulıp Namusıña äytäläseñ ğadel bulsañ. * * * Miña sineñ oçkın tulı küzeñ kiräk, Oyalıp äytkän söyäm digän süzeñ kiräk, Almagaçtan äle genä özep algan Tatlı almadan da tatlı üzeñ kiräk. * * * Balası kük irtä kilgän sıyırçıknıñ Nigä, yazmış, mine bolay kıyırsıttıñ – İrtä söyü, irtä köyü – säbäpläre Yözemdäge härber tirän cıyırçıknıñ... * * * Şau hislären tota almıy yögändä, Täü söyüdän başın cuyıp yörgändä, Täüge koymak gel töyerle bula, diyep Başına da kitermi şul bu bändä... * * * Karap tora, kölep tora kendegeñ, Kendegeñ ük äytep tora kemlegeñ, Kendegeñä yalgış küzem töşkän sayın Üz hokukın daulıy başlıy irlegem...