Terelü

Min avırdım... Kürşe aptekanıñ
Bar daruın eçep beterdem.
Anıñ sayın kiptem, anıñ sayın
Kanı kaçtı sulgan bitemneñ.

İntekterde mine aylar buyı
Eçem poşuı, yöräk yanuı.
Kiräk ide miña tännän bigräk
Can daruı, küñel daruı.

Sizde monı ziräk bolnits kızı,
Ul ülçäde yöräk köçemne.
Daru itep nazlı küz karaşın,
Yılmayuın miña eçerde.

Min yäşermim, bälki, tänemdä dä
Ber-ber törle çirem bulgandır,
Kaysı çirneñ mindä köçlelegen
Doktor üze sizä torgandır.

Rähmät siña cılı nazıñ öçen,
Tatlı süzeñ öçen, küreklem!
Şular belän mine keşe itteñ,
Şular belän mine tereltteñ.