Шиғырҙар - Мәжит Ғафури - Bashkir language - Cyrillic script - read with dictionary

Total number of words is 220

Total number of unique words is 176

47.1 of words are in the 2000 most common words

56.7 of words are in the 5000 most common words

62.3 of words are in the 8000 most common words

Each bar represents the percentage of words per 1000 most common words.

Ат менән Аҡбай

Ат бит күп эшләп,
Тирләгән тамам,
Бик ныҡ асыҡҡан,
Бик ныҡ һыуһаған.
Ул шулай эшләп
Ҡайтып инеүгә,
Ҡаршыға Аҡбай Йүгереп килә.
Шатланып сабып
Эй Аҡбай йөрөй.
Боттарын тешләй,
Шаярып юрый.
Гүйә, ул ярҙам
Итмәксе була,
«Рәхмәт, атҡайым, —
Тимәксе була. —
Арып ҡайтҡанһың,
Кил, аҙыҡ бирәйем,
һыуһап ҡайтҡанһың,
Кил, һыу эсерәйем».

1988 йыл

Балалар һәм китап

Дүрт-биш бала йыйылғандар бер урынға,
Тап уртала, береһе китап тотҡан ҡулға;
һәммәһе лә ҡолаҡтарын торғоҙғандар,
Береһе уҡый, башҡалары тыңлай шунда.
Ултыралар китап уҡып, күңел асып,
Шатлыҡтарын бергә-бергә уртаҡлашып;
Ҡайһы ваҡыт тыңлай былар тып-тын ғына.
Ҡайсағында көлөшәләр сырҡылдашып.
Ҡайсағында әллә кемде ҡыҙғаналар,
Уфылдашып, әкрен генә ҡуҙғалалар,
Ахырыһы, был китап бик күңеллелер:
Күҙ ҙә алмай уҡый уны был балалар.

1996 йыл

Көҙ

Көндөҙ һалҡын ел иҫә,
Таң менән ҡырау төшә.
Ҡояшты болот ҡаплаған
Ҡыҙҙырмай ул йәйгесә.
Ҡыр, баҫыуҙар һап-һары,
Ҡыуарып бөткәндәр бары.
Тик ужым баҫыуҙарын
Йәшел тиергә ярай.

1988 йыл

Сәсеү бөткәс

Кисә генә яҙғы сәсеү бөткән,
Ҡыр өҫтөндә шау-шыу баҫылған.
Гөрләп-гөрләп йөрөгән машиналар
Эш бөтөрөп ҡайтҡан баҫыуҙан.

1988 йыл

Яҙ етте

Ҡояш нурын болот ҡаплаһа ла,
Яҙ яҙлығын итә — иретә...
Ҡарҙар бөтөп, ҡара ер йәшәреп,
Һандуғастар һайрар көн етә.
Ерҙең йөҙөн, ҡара сатыр кеүек,
Ҡара болот ҡаплап ятһа ла,
Яҙ яҙлығын итте, үлән сыҡты
Көнгә ҡаршы булған баҡсала.
Ҡояш, бара торғас, еңеп сыҡты,
Ер йөҙөнә ҡарап көлдө ул,
Һалҡын ҡара болот саф ҡояштың
Көслө нурҙарына бирҙе юл.

1988 йыл

You have read 1 text from Bashkir literature.

Dictionary

Click or select a word or words to search the definition