Тынма, Давыл!

  Агыйм дисәм, барыйм дисәм,
  Аккош бүлә юлымны.
  Халык җыры
  
  Таллар кистем, баулар иштем,
  Саллар салдым суларга.
  Илем ягы унда да бит,
  Җилләр исә сулларга.
  
  Өстә — дулкын,
  Аста упкын
  Куллар сала салыма.
  Сукма, дулкын, упма, упкын,
  Кайтыйм ярым янына.
  
  Давыл тынды, дулкын тынды.
  Аккош бүлә юлымны:
  Юксыңдыр син, сизәдер кош
  Юлым бушка булуны...
  
  Тынма, дәрья, айка, чайка:
  Күнмәгәнмен тынлыкка.
  Упкыннарың берни түгел,
  Батырма тик моңлыкка.