Туган ягы кирәк кешегә

  Читтә йөргән чакта, сагындырып,
  Керер өчен төнлә төшенә,
  Зәңгәр таңлы, биек аяз күкле
  Туган ягы кирәк кешегә.
  
  Зур уңышлар яулап, заманалар
  Матур бәя бирсә эшенә, -
  Шатлыкларын ишеттерер өчен,
  Туган ягы кирәк кешегә.
  
  Йери-йери күңеле тупасланса,
  Тузан кунса яшьлек хисенә, -
  Бер сафланып килер өчен, тагын
  Туган ягы кирәк кешегә.
  
  Яшәр өчен бетмәс кеч алырга
  Олысына һәм дә кечегә, —
  Мәхәббәтле, ямьле, мәрхәмәтле
  Туган ягы кирәк кешегә.