Kilä Yava, Kilä Yava... - 1

  (İke pärdäle komediyä)
  
  KATNAŞALAR:
  
  Sacidä — 35—40 yäşlärdäge hatın.
  Fändäs — Sacidäneñ ire, 40—45 yäşlärdä.
  Şäyhi — santehnik, 40—45 yäşlärdä.
  Räşit — 40—45 yäşlärdäge biznesmen.
  Zäynäp — Fändäsneñ söyärkäse, 25—30 yäşlärdä.
  
  BERENÇE PÄRDÄ
  
  BERENÇE KÜRENEŞ
  Sacidälär fatirı. Sacidä öy cıyıştıra. Telefon şıltırıy.
  Sacidä (trubkanı alıp). Allo... Äye, min. Yuk, tanımadım. Räşit?.. Ä-ä-ä, tege, kafeda tanışkan idek... Häterlim, isemä töşte. (Kölä.) İnde ul ğomerdän birle. Yartı yıl uzdı tügelme soñ... Äy, sez irlär gel şulay inde. Ä üzegez mine iskä aldıgızmı soñ? Şulaymı... Sez, Räşit, kızık keşe ikänsez... Çınlapmı? (Kölä.) Işanmıym. Yuk, yuk, mömkin tügel. Nişläp dip... İñ berençe säbäp — minem irem bar. Tuktale, nişläp yartı yıldan soñ şıltıratırga buldıgız? Ä-ä-ä-ä, şulaymıni, çit illärgä komandirovkaga yörisezmeni... Yuk, yuk, mömkin tügel. Oçraşıp söyläşergä?.. Yuk, yuk. Ä min sezneñ telefon nomerıgız yazılgan käğazne yugalttım. Min bit irdäge hatın. Yarıy, telefon nomerıgıznı yazıp alam, bik yamansu vakıtta, bälki, şıltıratırmın... söyläşergä keşe bulmaganda.
  Äye, yalgız çagımda. Utız ike, undürt, siksän biş. Bu öy telefonıgızmı? Yarıy. Bolay naçar tügel şikelle. Çit illärgä yörüçeneke kebek bulmasa da, tüzärlek inde. Zarlanır urın yuk. (İşek kıñgıravı zeñgeldi.) Gafu itegez, bezgä kemder kilde. Yarıy, sau bulıgız. Väğdä itmim, küz kürer.
  Sau bulıgız!
  Zur çemodan kütärep, Fändäs kaytıp kerä.
  Fändäs. Öydäme sin, yukmı? (Çemodanın idängä taşlıy.) Uf, köç-häl belän menep cittem. Lift eşlämi. İsänme, karçık. (Koçakların cäyep yılmaya häm hatınına taba atlıy.)
  Sacidä (salkın gına). İsänme!
  Fändäs. Ällä şat tügel inde sin minem kaytuıma... (Hatının koçaklap übä.)
  Sacidä (ireneñ koçagınnan şuıp çıga häm sınaulı karaş taşlıy). Min sineñ kaytuıña, bälki, şatmındır da, läkin üzeñ uylap kara: kaysı hatın ire yal yortına kitkäç, üze genä şatlanıp utırır ikän?!
  Fändäs. Şulay kilep çıktı bit. Min bit siña äyttem, otpusk al, dip.
  Sacidä. Otpuskımnıñ cäy ahırında gına bulasın bik yahşı belä ideñ läbasa.
  Fändäs. Mömkinlekne ıçkındırmaska buldım inde, üzeñ dä şulay dideñ bit.
  Sacidä. Sez irlär gel şulay, mömkinleklärne ber dä ıçkındırmıysız. Bälki, sine sınap karar öçen genä rizalık beldergänmender?!
  Fändäs (açuı kabara başlıy). Tuktale, kaytıp kerüemä taşlanma miña! Min bit sine sagınıp kayttım.
  Sacidä (kirelänep). Anda sagınırga bigük irek birmägännärder.
  Fändäs. Ni söyliseñ soñ sin! Menä siña büläk alıp kayttım. (Törgäk alıp birä.)
  Sacidä (bik ise kitmägän qıyäfät belän büläkne ala). Rähmät.
  Fändäs. İkençesendä bergä barırbız, yäme.
  Sacidä (yöze tagın da nıgrak karañgılana). Barmıym min sineñ belän berkaya da!
  Fändäs (tavışın kütärep). Yarar inde, närsä bala-çaga sıman kirelänäseñ!
  Sacidä (yarsıp kıçkıra). Bala-çaga sıman? Üzeñ mine bala-çaga urınına kürgäç! Cäy urtasında hatının taşlap kitsen dä...
  Fändäs. Şulay kilep çıktı bit inde...
  Sacidä. Keşelärdän dä oyat.
  Fändäs (üzen kulga ala häm hatının da tınıçlandırırga niyätli). Karale, karçık, isän-sau kaytıp citüemä, sineñ isän-imin toruıña kuanırga kiräk.
  Sacidä. Ay tele. Töçelänergä osta da inde şuşı irlär!
  Fändäs (koçaklamakçı bula). Tukta inde, karçık! Bik sagındım üzeñne.
  Sacidä (iren etä). Kit äle, kit.
  Fändäs (kinät kırıslana). Yarar. Bik matur karşı aldıñ. Rähmät. Kittem min.
  Sacidä (küzlären çekeräytep). Kaya kitteñ?
  Fändäs (çıgıp kitärgä cıyına). Änidä kunam bügen. Tınıçlan başta. Annarı kaytırmın. Beraz sürel.
  Sacidä (kıcrap). Bötenläy kaytmasañ da bula! Oyatsız!
  Fändäs (tınıç kına). Çemodanda küçtänäçlär... siña.
  Sacidä. Kiräk tügel! (Çemodanga kiterep tibä.)
  Fändäs çıgıp kitä, Sacidä divanga kaplanıp yılap kala. Torıp ärle-birle yöri başlıy. İreneñ çemodanın aktara. Annan matur kofta ala, zatlı konyak, berniçä kap känfit çıgara. Aptırap utırgannan soñ telefonnan şıltırata.
  Sacidä. Allo, Räşit, sezme? Bu min, Sacidä. Bik aptıraşta kaldıgızmı? Yukmı... Min bügen ük şıltıratırga buldım äle sezgä. Min bit yalgızım çakta şıltıratırmın digän idem. Menä bügen min kotoçkıç yalgız. Söyläşep utırır keşem dä yuk. İrem?.. Ul änisenä kitte. Yal yortınnan kayttı da änisenä kunarga kitte. Yuk, sez üzegez miña kilegez. Duslık uramı, utız ikençe yort, yegerme berençe fatir. Kötäm. (Trubkanı kuya. Aptıraşta kalıp arı-bire yörergä totına.) Cülär min, cülär! Nişlim min? Minme soñ bu? (Barıp közgedän karanıp tora.) Kadalıp kitsen lä!
  Sacidä kinät katgıy kararga kilä häm Räşit kilüenä äzerlänä başlıy — kiyenä, bizänä, yasana. Şul uk vakıtta üze kapmakarşılıklı uylar belän bimazalana. Bervakıt işek kıñgıravı zeñgeldi. Sacidä siskänep kitä, Räşit kilde dip bik nık kauşıy. Läkin, anı tagın da nıgrak kotsız kaldırıp, busagada ire Fändäs päyda bula.
  Fändäs (çitensenep). Min... ni... açkıçımnı onıtıp kaldırganmın.
  Sacidä (üzen kaya kuyarga belmi). Soñ, açkıçıñnı al da inde, bar, çıgıp kit.
  Fändäs (bik katı borçılıp). Tuktale, açkıçtamıni hikmät! Bez bit inde sineñ belän şaktıy ğomer itkän keşelär. Şırt-pırt itep ber-berebezne bimazalarga bezgä bit unaltışar yäş tügel!
  Sacidä (ireneñ kire kaytuınnan bik nık kauşıy, Räşit menä-menä kiler dip kurkıp, ni äytergä dä belmi taptanıp tora). Üzeñ ğayeple.
  Fändäs. Zinhar, üzeñne kulga al. Ğayeple, ğayeple... Atta da, tärtädä dä bardır inde, kem äytmeşli.
  Ägärenki ğayep mindä kübräk dip sanasañ, gafu it.
  Sacidä (ber çarasız kala häm iren gafu itärgä teläsä dä anı tizräk çıgarıp cibärergä tırışa). Bar, äniyeñdä kun bügen. İrtägä tınıçlap söyläşerbez.
  Fändäs. İrem berüze yal yortında buldı dip ğailä tarkatmıylar inde. Ulıbızdan oyat. (Uyga kalıp.) Yanına barıp kaytırga kiräk bulır.
  Sacidä. Menä bit, kaytıp citü belän Kazanga barırga säbäp tä taptıñ.
  Fändäs. Yarar inde, ä! Gel talarga gına torma inde! Ulımnı sagındım.
  Sacidä. Anı Kazanga olaktıruda da sin ğayeple.
  Fändäs. Ukısın, ukısın. Kazan Kazan inde ul. Böten zur keşelär iñ elek Kazanda belem aldılar.
  (İşek kıñgıravı zeñgeldi, Sacidä bötenläy koyılıp töşä.)
  Fändäs. Kem ikän bu?
  Sacidä (bik nık kauşıy). Bu kem... ni... Min häzer añlatam.
  Süzen äytalmıy kala, iñenä açkıçlar, şlanglar häm timer-tomır tutırgan iske sumka asıp santehnik Şäyhi kilep kerä.
  Şäyhi. İsännärmesez!
  Fändäs. İsänmesez!
  Şäyhi (gorur qıyäfät belän häm kılanuın yäşermiçä). Min santehnik Şäyhetdin bulam. Na pravitelstvennom urovne söyläşkändä Şäyhulla, ä hatın-kız öçen prosto Şäyhi. Sezneñ santehnikagıznı karıysı bar ikän, imeş.
  Fändäs. Vakıtsızrak kildegez, ä şulay da kilüegez äybät. Bezneñ rätlise närsälär baytak monda.
  Şäyhi (fatir eçenä uza häm barmagın zur mäğnä belän öskä kütärä). Santehniknıñ kilüe berkayçan da vakıtsız bulalmıy. Bigräk tä üzegez çakırtkaç.
  Fändäs. Bez bit inde yartı yıl elek CEKka şıltıratkan idek, santehnik cibäregez, dip.
  Şäyhi. Menä bit kildem. (Fälsäfi qıyäfät belän.) Santehniknıñ anıñ kayçan kilüe tügel, ä bälki, ğomumän kilüe häyerle. Ozak kötkän närsä qaderleräk bula ul. Ozak kötkän, nık telägän närsä barıber kayçan da ber kilmi kalmıy. Santehnik ta barıber kilä ul. Dönyada santehnik kilmi kalgan fatir bar mikän? Möğayın, yuktır. Dimäk, santehniknıñ kilep kerüe — ul nindider kotılgısızlık.
  Mähäbbät kilüe sıman. Yazlarnıñ hiçşiksez citüe, sıyırçıklar kaytuı şikelle. Tuu häm ülem kebek, nihayät. Min kildem! (Şulay söylänä-söylänä koralların äzerli häm eşkä kereşä.)
  Sacidä (üzen kaya kuyarga belmi). Sin, Fändäs, äniyeñä barmıysıñ bulıp çıgamıni?
  Fändäs. Santehnik kilgäç, berkaya da barıp bulmıy inde.
  Şäyhi. Huca, kil, sinsez bulmıy monda. (Şäyhi vanna bülmäsendä häm tualetta kazına başlıy,
  Fändäs anıñ yanına kitä.)
  Sacidä (nişlärgä belmi üzaldına mıgırdana). Nindi cülärlek eşlädem bit, ä! Häzer kilep kersä, bette baş. Uramga çıgıp karşı alırga kiräk. (Çıgarga cıyına.)
  Kulına çäçäk bäyläme totıp häm şampan şärabı kütärep busagada Räşit päyda bula. Östendä kura ciläge tösendäge pincäk, muyınına şaktıy kalın altın çılbır takkan, barmagına alagayım zur itep eşlängän altın yözek kigän.
  Räşit (avızı yırık, küzläre mut). İsänme, Sacidä! (Şunduk türgä uza.)
  Sacidä (özgälänep). İrem kayttı, çıgıp kitegez tizräk!
  Räşit (işekkä taba yünälep). Üzeñ çakırdıñ bit.
  Fändäs (tualettan çıga häm kunaknı kürep ala). Sez kem?
  Räşit (ni äytergä belmi). Räşit!
  Sacidä (nık kauşıy). Ul tege santehniknıñ iptäşe. (Räşitkä.) Bezgä santehnik kilde... Sez bit şunıñ yanına dip kergänsezder?
  Räşit (yugalıp kalmıy). Äye, min alarnıñ uçastok naçalniğı. Mondamı ul?
  Sacidä. Monda, monda, äydägez, uzıgız bädräfkä.
  Räşit. Rähmät. Kilü belän bädräfkä uzarga kuşkaç ällä niçek, älbättä. (Santehnik yanına bara.)
  Fändäs (Sacidägä). Nişläp soñ ul çäçäklär totıp yöri?
  Räşit (işetep ala). Santehniklar naçalniğı torba kütärep yörergä tiyeşmeni?! Ber yortnı su baskan ide. Şularnı kotkardık. Çäçäklärne şunda birdelär. Tä-ä-ä-k, niçek eşlär, baramı?
  Şäyhi (bädräftän çıga). Bara.
  Räşit (ütä citdi qıyäfät belän). Äydä, ozakka suzma, äle tagın berniçä fatirga barası bar bügen.
  Şäyhi (aptırap). Minem bügen bütän berkaya da barasım yuk. Sin närsä minem belän komandovat itäseñ?
  Räşit (tınıç kına). Çönki min sineñ uçastok naçalniğıñ.
  Şäyhi. Bezneñ uçastok naçalniğı Tälğat Bariyeviç...
  Fändäs (poşamanga kalıp). Tälğat Bariyeviç, di...
  Räşit. Min — naçalnik uçastka. Kem ul Tälğat Bariyeviç? Kayda ul?
  Şäyhi. Anı uzgan atnada bülniskä saldılar. Üpkäsenä salkın tigän.
  Räşit. Ülde ul.
  Şäyhi (küzlären akaytıp). Ülde?! (Hälsezlänep kitä.) Ul miña fatir väğdä itkän ide.
  Räşit. Ülär vakıtı citkän keşe sineñ fatir alasıñ bar dip ülemen kiçekterä almıy inde ul. Ä bälki, siña fatir birmäs öçen ıçkıngandır. Häzer min sineñ uçastok naçalniğıñ.
  Şäyhi (bu häbärdän huşına kilä almıy utıra). İh, Tälğat Bariyeviç, Tälğat Bariyeviç... Minem aña utız meñ burıçım da bar ide äle.
  Räşit. Tege dönyada birerseñ. Yarar, sin monda ozak totkarlanma. Min sine CKUda kötäm. (Çıgıp kitmäkçe bula.)
  Fändäs. Sez santehniklar naçalniğı bulgaç, äydägez, utırıp çäy eçik. Bez sezgä häzer yış möräcäğat itärbez, ahrısı, çönki sanoborudovaniye bik iske bit inde bezneñ. Min bügen genä yal yortınnan kaytıp töştem.
  Räşit (avızın kıyşaytıp, üzaldına). Min moña bik şatmın.
  Fändäs. Bik şäp konyak alıp kayttım. Äydägez, avız itärsez.
  Räşit (Şäyhigä). Eşeñ küpme äle?
  Şäyhi. Baytak.
  Räşit. Eşlä. Aşıkma. (Östäl yanına utıra.) Konyak naçar närsä tügel inde ul.
  Fändäs. Sacidä, närsä katıp kaldıñ, kapkalarga berär närsä ätmällä.
  Sacidä (kabalanıp östälgä rizık taşıy). Häzer, häzer.
  Östäl yanına utırışa başlaganda gına işek kıñgıravı zeñgeldi. Zäynäp kerä.
  Zäynäp (mölayım yılmayıp). İsänmesez!
  Sacidä. İsänmesez! (Zäynäpne başınnan ayagına qadär centekläp küzätä.) Sez dä santehniklarnıñ berär buhgalterı tügelder bit?
  Zäynäp (aptırap kaşların kütärä). Nik alay disez? İsänme, Fändäs!
  Fändäs (şakkatıp). İsänme!
  Zäynäp (türgä uza, sumkasın divanga taşlıy). Sin nişläp miña äytmiçä kaytıp kitteñ?! Min bit sine yugalttım.
  Fändäs (torıp kıbırsıy başlıy). Sacidä, kızarga aşıkma. Bu — Zäynäp.
  Sacidä (yaman usal itep). Şunnan?
  Fändäs (Sacidä tiräsendä böterelep). Kurortta bergä yal ittek.
  Sacidä. Rähmät.
  Zäynäp (Sacidägä). İsänmesez!
  Sacidä (näfrät belän karap). Sälam!
  Zäynäp (berni bulmaganday yılmayıp). Sez miña alay kırıs karamagız. Bez Fändäs belän berberebezne yaratabız.
  Fändäs (kemgä endäşergä belmi). Zäynäp! Sacidä!
  Räşit (ayagın ayakka atlandırıp kiyerelep utıra). Kızık ikän sezneñ monda. Küptän mondıy kompaniyälärdä bulganım yuk ide.
  Sacidä. Yä, yä, çibärkäy, tıñlıybız.
  Fändäs. Sacidä, tuktale. Zäynäp, sin nik kildeñ?
  Zäynäp. Berençedän, miña äytmiçä kaytıp kitüeñ poşamanga kaldırdı. İkençedän, şul arada sine sagınırga da ölgerdem. Öçençedän... närsä sanap toram soñ min... Ğomumän, sinnän başka yäşi almıym.
  Sacidä (tämam aptıraşta kalıp). Sin tileme ällä?
  Zäynäp. Sez nişläp minem belän dorfa söyläşäsez? Fändäs, nişläp mine yaklamıysıñ?
  Sacidä (kıçkırıp). Kem bu?
  Fändäs (başın aska iyep). Yal yortında tanışkan idek.
  Sacidä. Tanışsagız... Tanışkan keşeneñ yortına iyärep kaytu mäcbürimeni häzer?
  Zäynäp. Bez ber-berebezne yaratabız, şulay bit, Fändäs.
  Fändäs (kırt kisep). Yuk!
  Zäynäp (küzlären akaytıp). Niçek inde «yuk»?! Yaratam dip antlar itkäneñne, nindi väğdälär birgäneñne onıttıñmıni? Sin närsä, mine aldadıñ gına mällä? Yuk, yuk, sineñ başıñ gına beraz butalgandır. Bezgä bit çiksez rähät buldı, bez bit ber-berebezne kürmiçä ber säğat tä tora almıy idek.
  Fändäs (kıçkırıp). Yuk! Yuk! Yuk! Nik kildeñ sin monda?!
  Zäynäp. Niçek inde «nik kildeñ»?.. Sin bit äle äytkän ideñ, mäñge bergä bulaçakbız, dip. Ä häzer inde nik kildeñ diseñ!
  Sacidä. Üläm, oyat, hurlık! (Çıgıp yögerä.)
  Fändäs. Sacidä, tuktale! (Hatını artınnan çıgıp kitä.)
  Zäynäp (östäl yanına utıra, avır sulap kuya). Bolay kilep çıgar dip uylamagan idem.
  Räşit (şampan şärabın açıp sala). Sin, çibärkäy, çınlap ta yal yortınnanmı, ällä cülärlär yortınnan gınamı?
  Zäynäp (Räşitneñ bokalın ala häm eçep kuya). Monı mıskıl itü dip añlargamı, ällä kompliment dip kabul itärgäme?
  Räşit. Sin monı maktau sımanrak kabul it inde.
  Zäynäp (açu belän). Rähmät.
  Räşit. Kiyäveñ bulsın Nuriähmät.
  Zäynäp. Nişläp sez minem belän ironiyäle söyläşäsez?
  Räşit (beraz alga taba suzılıp). Çönki oşıysıñ sin miña.
  Zäynäp (başın kütärä töşep). Min bik küplärgä oşıym.
  Räşit (üzenä dip şärab sala, Zäynäp anı tagın alıp eçep beterä.) Sin Fändäsneñ söyärkäseme çınlap ta?
  Zäynäp (gorur qıyäfät belän). Äye.
  Şäyhi. Açkıçlarım kalıp torsın. Krannarnı yapmıy torıgız. Min tiz genä CKUga barıp kiläm.
  Räşit. Bar, bar, äbräkäy sandugaçı. Bolay da hava naçar monda. (Şäyhi çıgıp kitä.)
  Zäynäp. Ä sez kem bulasız?
  Räşit. Kem dip äytim ikän... Älegä berkem dä tügel.
  Zäynäp. Fändäsneñ tuganı tügelme?
  Räşit. Citeşep bulmadı äle. Çak kına bacası bulmıy kaldım.
  Zäynäp. Niçek inde?
  Räşit. Karale, sin berär akvariumda yäşädeñme ällä moñarçı?
  Zäynäp. Yuk, nik alay disez?
  Räşit. Bolay gına. Balık ise kilep kitkändäy buldı.
  Häldän tayıp Fändäs kaytıp kerä.
  Fändäs. İh Zäynäp, Zäynäp. Tormışnıñ astın öskä kiterdeñ bit.
  Zäynäp. Bu sineñ hatınıñ ide mällä?
  Fändäs (kıcrap). Yuk, santehniknıñ hatını ide.
  Zäynäp. Ul nindi hatın ide soñ?
  Fändäs (kıçkırıp). Minem hatınım ide! Nik kildeñ sin monda?
  Zäynäp (şakkatıp). Niçek inde nik kildem... Sineñ yanıña. Üzeñ bit minnän başka yäşi almıym digän ideñ.
  Fändäs. Sin bit minem ğailäm barlıgın bik yahşı beläseñ!
  Zäynäp. Miña äytmi-nitmi kaytıp kitkäneñne belgäç, bik borçıldım. Miña üpkälägänseñder dip uyladım. Ğomumän, annarı ällä nilär uylap beterdem. Min sine bik sagındım. (Barıp koçaklıy.)
  Fändäs (muyınınnan anıñ kulların alıp taşlıy). Tuktale, Zäynäp. Uf, äydä beraz konyak eçik äle. (Räşitkä.) Gafu itegez, sezneñ isemegez niçek?
  Räşit. Räşit.
  Fändäs. Min Fändäs bulam. (Ryumkalarga konyak sala.) Ä tege santehnik kayda?
  Räşit (ryumkanı ala). Min anı CKUga cibärdem. Häzer kiler. Äydä, tugan, borçılma, mondıy gına matavıklar kilep çıkkalıy inde ul. (Zäynäpkä ımlap.) Mondıy tavık-çebeşlär bar çagında butalçıklarnıñ betäse yuk.
  Zäynäp (qanäğatsezlänep). Sez ällä niçek säyer söyläşäsez minem belän.
  Räşit (korı gına). Äle sineñ belän söyläşüçe dä yuk. (Eçep kuya.)
  Zäynäp. Fändäs, nişläp ul minem belän dorfa söyläşä?
  Fändäs. Söyläşsen. Çönki ul santehniklar naçalniğı.
  Räşit (ryumkanı kütärep). Oçraşuıbızga bik şat. (Eçälär.) Nişlisez inde häzer?
  Fändäs. Zäynäp, sin kiçekmästän kitärgä tiyeş.
  Zäynäp. Yuk, min sinnän başka berkaya da kitmim.
  Fändäs. Min üzem sineñ yanıña barırmın.
  Çitkä alıp kitep närsäder añlata, kürşe bülmägä kerep kitälär.
  Räşit (kölä). Kızık bu dönya.
  Santehnik kilep kerä.
  Şäyhi (Räşit yanına kilep basa, karap tora). Sin nişläp aldadıñ?
  Räşit. Kemne?
  Şäyhi. Tälğat Bariyeviç isän. Ul — bezneñ naçalnik. Sin tügel.
  Räşit (utırgan cirennän genä Şäyhine tüşennän yomarlap tota häm teşlären şıgırdata).
  Sin, äbräkäy sandugaçı, küp söyläşmä. Siña barıber tügelmeni — kem näçälnik. Unitazga başıñ belän tıgıp kuyuım bar, şuña kürä mine üzeñneñ näçälnigeñ digen. (Yanına tartıp utırta.) Yarar, yarar, kurıkma. Mä siña. (Şäyhineñ tüşendäge kesägä açka tıgıp kuya.) Salasıñmı beraz?
  Şäyhi. Salam, älbättä. (Räşit konyak sala, Şäyhi şunduk eçep kuya.)
  Räşit. Bar, eşlä!
  Şäyhi. Yarıy, rähmät. (Tualetka kitä.)
  Fändäs belän Zäynäp ikençe bülmädän çıgalar.
  Fändäs (Zäynäpne iñennän koçıp). Min sine häzer vokzalga qadär ozatıp kuyam, bilet alıp biräm, utırtıp cibäräm.
  Zäynäp (yılamsırap). Fändä-ä-ä-s!..
  Fändäs (özgälänep). Maturım, min atna azagında üzem kiläm sineñ yanıña. (Şäyhigä endäşä.)
  Sezneñ eşegez küpme äle?
  Şäyhi (vanna bülmäsennän kıçkırıp cavap birä). İke-öç säğatlek.
  Fändäs. Alaysa, sez eşli torıgız. Min häzer äylänep kaytam. (Räşitkä.) Sez dä kitmi torıgız.
  Zäynäpne ozatıp kiläm. Kitmi torıgız.
  Räşit. Kitmim. Santehnik eşen tämamlamıyça berkaya da kitmim.
  Fändäs belän Zäynäp çıgıp kitälär.
  Räşit. Äy, can köyege! Kil, berär ryumka totıp kuy.
  Şäyhi (kilep utıra). Sin nişliseñ soñ monda? (Eçälär).
  Räşit. Bernişlämim. Yulım uñmadı äle bügen. Küräseñme, nindi matavıkkilep çıktı.
  Şäyhi. Hi-i-i, matavık mondıy bulmıy ul. Püçtäk bu. Min küp fatirlarda bulgan keşe, ällä nindi känitillär kürgänem bar. Min sineñ ni säbäp belän monda yörüeñne añladım.
  Räşit. Bügenge zamanda bik küp añlau yaramıy.
  Şäyhi. Min üzemä tiyeşlesen genä añlıym.
  Räşit. Sin ozagrak mataş, yäme. (Santehniknıñ tüş kesäsenä tagın akça tıgıp kuya.) Miña monda ozagrak torırga säbäp kiräk.
  Şäyhi (beraz iserä). Min ul hatınnı bärep üterer idem.
  Räşit. Min anıñ Fändäsen dä bärep üterer idem äle...
  Yış-yış sulap Sacidä kaytıp kerä. Şäyhi tualetka kerep kitä.
  Sacidä. Kayda tege qabahätlär?
  Räşit (avızın kıyşaytıp). Minemçä, alar kire yal yortına kitep bardılar, ahrısı.
  Sacidä (divanga salınıp töşä). Küñelem sizgän ide anı...
  Räşit. Töker. Andıy hıyanätçe ir siña layık tügel. Äydä minem belän.
  Sacidä. Kaya?
  Räşit. Minem bu şähärdä dürt fatirım bar. Kaysına teliseñ, şunda barabız. Berse Himiklar uramında, ikençese Muradyana uramında, öçençese Bızov uramında, dürtençese... m-m-m-m... karale, familiyäsen onıttım... Anısı da berkem belmi torgan familiyä inde... Tatar keşese... Yarar, kadalıp kitsen. Äydä minem belän. Stresslarıñnı beterermen.
  Sacidä. Min berkaya da barmıym. Mondıy hurlıknı kütärep yöri almıym min.
  Räşit. Nindi hurlık! Bula torgan häl. Ütereş-suyış yuk. Ülüçe-mazar kürenmi.
  Sacidä. Bu hurlıknı kütärgänçe ülüeñ yahşırak tügel mikän?!
  Räşit. Töker. Äydä minem belän. (Koçaklamakçı bula.)
  Sacidä. Kit äle, kit.
  Räşit. Üzeñ çakırdıñ bit.
  Sacidä. Çakırasım kilep çakırmadım min sine.
  Räşit. Alay bulmıy inde. Menä totarmın da ireñä äytep birermen kem ikänemne, niçek monda kilep eläkkänemne.
  Sacidä. Sez irlärdän ällä nilär kötärgä bula.
  Räşit. Kaygırma. Yal yortında sau-sälamät ir tik yatmas inde ul. Aña açu itep ikebez göclätep alıyk.
  Sacidä. Yarar. Räşit, tıñla, min beraz häl alıym, başımnı rätkä kertim. Annarı siña üzem şıltıratırmın.
  Räşit. Yarıy alaysa, sin kayçan şıltıratasıñ soñ?
  Sacidä. Bügen.
  Räşit. Yarar, kötäm. (Sacidäneñ kulın übä häm çıgıp kitä.)
  Sacidä (nişlärgä belmi, fatir buylap yöri). Närsä soñ bu? Töşme bu, önme?!
  Fändäs kaytıp kerä.
  Fändäs (ğayeple qıyäfät belän). Sacidä!
  Sacidä (ciränep başın çitkä bora). Menä, üzennän-üze isbatlandı.
  Fändäs. Gafu it mine. Kiçer. İhtıyarıñ, teläsäñ nişlät.
  Sacidä. He, nişlätä alam min sine? Ayırılabız da, vässälam. Şunısı bar — ulıbızdan oyat.
  Fändäs. Sacidä, aşıkma. Tormışta ällä nilär bula. Kiçer mine. Min sinnän başka yäşi almıym.
  Sacidä. Sayra, sayra. Menä kürsätteñ bit inde.
  Şäyhi (eşen taşlap karap tora). Bälki, miña başka vakıtta kilergäder... Monda eş baytak äle.
  Sacidä. Üzeñä kara. Nik bezdän sorıysıñ?
  Şäyhi. Yuk, min ğailä matavıklarına komaçaulamıym dip kenä äytüem.
  Sacidä. Sin bezgä komaçaulamıysıñ. Aşıysıñ kiläme?
  Şäyhi. Minem gel aşıysım kilep tora.
  Sacidä. Äydä utır.
  Şäyhi (östäl yanına kilep utıra, şunduk aşarga totına). Rähmät, bigräk tämle. (Tonçıgıp ala.)
  Sacidä. Änä konyak, salıp eç. (Şäyhi üze salıp eçä. Tagın aşıy. Beraz iserä.)
  Şäyhi (aşıy-aşıy). Mayıgızga çıdıy almıysız. Minem şkurada yäşäp karasagız ide sez. Min bit incener. Diplomımnı yartı millionga satkan keşe min. Kayçandır KHTİ tämamlagan idem, mehaniçeskiy fakultetnı. Sokraşeniyegä eläktem.
  Fändäs. Diplomıñnı nik sattıñ soñ?
  Şäyhi. Akça kiräk buldı da. Hatın üterä yazdı ber turnı, akça eşlä, dip. Kayan alıym min akça
  — zavodtan çıgardılar, urlıy belmim, talarga yöräk citmi. Min yarıy äle het yartı millionga sattım. Minem belän bergä ukıgan Hämit diplomın dürt vauçerga alıştırgan bulgan. Tintäk!
  Çubayska inde kırıkka yakın hat yazıp cibärgän. Ni cavap kilmi, di, ni akça cibärmilär ikän.
  Hämitneñ yırunda. Tehnologiçeskiy fakultetta ukıgan ber tanışım bötenläy dönya kuydı.
  Diplomın bazarda altı banka tuşenkaga alıştırgan bulgan. Şul tuşenka belän agulanıp ülde.
  Kırık sigezençe yılgı tuşenka bulgan. Märhüm üze dä kırık sigezençe yılgı ide. Menä häzer santehnik bulıp eşlim. Şunısı äybät — keşe arasında. Keşe arasında açka ülmiseñ inde ul.
  Hatın gına könläşä. Tös-biteñ maturlanıp kitte, di, rähät eşkä küçteñ, hatın-kız belän fatir sayın şayarasıñdır, şuña tamagıñ tuktır sineñ, di. Aç bulsañ da yaratmıy, tuk bulsañ da bitärli. Sezgä ni citmi soñ?
  Fändäs. Miña bik uñaysız şuşındıy häl kilep çıguına. Citmäsä, çit keşelär aldında.
  Sacidä (yılıy). Minem borçılularım, nervılanularım tikmägä bulmagan ikän bit.
  Fändäs (yarsıp). Tuktale sin! Sindä genämeni nervı! İnde teñkämä tideñ bit soñgı vakıtta! Nik talıysıñ sin mine?!
  Sacidä. Kıçkırma miña! Tikmägä şiklänep yörmägänmen ikän bit, kaygırularım urınsız bulmagan!
  Fändäs (kıcrap). Tik kenä utır! Tuydım! (Ärle-birle yöri.)
  Sacidä (kıçkırıp). Min dä tuydım! (Sikerep tora.)
  Alar tuzınganda Şäyhi tınıç kına tämläp aşap utıra. Kötmägändä tagın Zäynäp kilep kerä.
  Şäyhi (mıskıllı tavış belän). Tagın kildeñmeni, balakayım? Isluşay, min sinnän tuya başladım. Äle berkemnän dä bolay tiz canım bizgäne yuk ide.
  Fändäs (şakkatıp karap tora). Zäynäp, min bit siña bilet alıp birdem. Nik kitmädeñ?!
  Zäynäp. Ällä niçek... kitäsem kilmäde.
  Fändäs. Yarar. Alaysa, üzem çıgıp kitäm. U-u-u-u-f, kittem min! (Yögerep çıgıp kitä.)
  İke hatın ber-bersenä näfrät belän karap katalar.
  Şäyhi (aşıy-aşıy). Sez Fändäsne üpkälätmägez. Äle açıklıysı bar — kem ğayeple. Kaya kitte ikän ul?
  Sacidä. Kayan belim min!
  Şäyhi. Kuıp citim äle min anı. (Tiz genä Fändäs artınnan çıgıp kitä.)
  Sacidä. Nu... nişlibez?
  Zäynäp (bilenä tayanıp). Min dä şul uk soraunı birmäkçe idem, nişlibez?
  Sacidä. Sin mahsus räveştä bezneñ ğailäbezne tarkatırga kilgänseñder şikelle.
  Zäynäp. Ä miña, kiresençä, Fändäs belän miña komaçaularga kilgänsezder şikelle sez bu dönyaga.
  Sacidä. Söyrälçek! Şlyuha! Seberke! Oyatsız!
  Zäynäp (mıskıl itep). Su eçep alıgız, dävam itärgä ciñelräk bulır.
  Sacidä. Üläksä!
  Zäynäp (tınıç kına). Sezgä dävalanırga kiräk.
  Sacidä (isterikaga küçä). Oyat, hurlık! Şuşı köngä kal inde, ä! Kem sin? Kaydan sin?
  Zäynäp (haman tınıç). Min — Zäynäp.
  Sacidä. Zäynäp ikäneñne min inde häzer mäñge onıtmayaçakmın.
  Zäynäp. Mäñge yäşärgä cıyınmıysızdır bit?
  Sacidä. Ä sin üzeñ, pumala, ozak yäşärgä hıyallanasıñmı?
  Zäynäp. Härhäldä, sezdän soñ da yäşäyaçäkmen, çönki min sezgä karaganda yäşräk. (Çäçlären tözätkäläp kuya.)
  Sacidä (aptıragaç kaplanıp yılıy başlıy). Kem kargışı töşte soñ miña?!
  Zäynäp. Uf, arıdım üzem dä. (Divanga barıp yata, baş astına mendär kuya.) Min ber-ike säğat yoklap alam äle, yäme.
  Sacidä (torıp utıra häm aña şakkatıp karap tora). Ästäğfirulla! Närsä bu? Oyat, çitensenü digän närsä yuk mikänni bu keşedä? (Telefon şıltırıy. Sacidä siskänep kitä. Barıp trubkanı ala.) Allo. Äye. Yuk, yuk, sez närsä. Minem öydä şundıy mähşär, ä sez... Nindi oçraşu?! Räşit, sez bit bala-çaga tügel, bu halättä miña hätta söyläşergä dä avır. Belmim. Aptıratmagız! (Trubkanı taşlıy.)
  Sacidä kaygıga batıp utıra. Torıp yöri, nişlärgä belmi. Telefon kat-kat şıltırıy, Sacidä trubkanı almıy.
  İKENÇE KÜRENEŞ
  Şul uk fatir. Zäynäp közge karşında buyanıp-yasanıp utıra. Şäyhi kerä.
  Şäyhi (korı gına). Häyerle kön!
  Zäynäp (tiz genä karap ala). İsänmesez!
  Şäyhi. Halık kayda?
  Zäynäp. Nindi halık?
  Şäyhi. Hucalar kayda?
  Zäynäp (bizänüen dävam itep). Fändäs bötenläy monda kunmadı. Sacidä kayınanası yanına kitte.
  Şäyhi. Ä sin nişläp utırasıñ monda?
  Zäynäp. Bizänep.
  Şäyhi. Tfü, sine monda niçek kaldırdı ul?
  Zäynäp. Kem?
  Şäyhi. Sacidä.
  Zäynäp. Kuıp çıgarıp karadı da ul mine, buldıra almadı.
  Şäyhi (yakın kilep karap tora). Kit sin!
  Zäynäp (ğacäplänep). Kaya kitim di min?
  Şäyhi. Kayan kildeñ, şunda kit!
  Zäynäp (küzlären akaytıp karap tora). Ä sez kem äle şulçaklı minem belän alay söyläşergä!
  Şäyhi. Min neytralnıy keşe — santehnik. Utız ikele açkıç belän mañgayıña ber genä birermen! Keşe tormışın bozıp yöriseñ!
  Zäynäp. Birep karagız!
  Fändäs kaytıp kerä. İserek.
  Fändäs (alpan-tilpän kilä). İsänmesez! Bu — min. Nişläp yat keşelär bar monda? (Şäyhigä.) Sin kem?
  Şäyhi. Santehnik.
  Fändäs. Oçen priyätno. Ä bu — min.
  Şäyhi. Añlıym.
  Fändäs (divanga taba atlıy). Närsä añlıysıñ soñ sin, biçara?
  Şäyhi. Kem biçaradır bit äle monda...
  Zäynäp (yögerep kilä). Oy, Fändäs, närsä buldı siña?
  Fändäs. Äyter idem inde... santehnik yanında yahşı tügel.
  Şäyhi. Äyt, äyt.
  Fändäs (Zäynäpne etep). Sacidä kayda?
  Zäynäp. Kitte.
  Fändäs. Kaya?
  Zäynäp. Belmim.
  Fändäs (divanga yata). Sin dä kit. Beregez dä kiräk tügel. Barıgız da küzemnän yugalıgız.
  Şäyhi (aptırap). Min däme?
  Fändäs (başın kalkıtıp karap tora). Ä sin kem soñ äle?
  Şäyhi. Şäyhi.
  Fändäs. Nindi Şäyhi?..
  Şäyhi. Santehnik.
  Fändäs. Äle genä min kergändä ber santehnik bar ide bit inde. Çto-to kübäyep kittegez äle sez.
  Şäyhi. Şul min idem bit inde ul.
  Zäynäp. Östeñä yurgan yabıymmı?
  Fändäs (yokımsırıy). Änä santehniknıñ östenä yap.
  Zäynäp. Bu min bit, Zäynäp.
  Fändäs (yokı aralaş). Kilep kerde Zäynäp, käcä ... çäynäp.
  Zäynäp (koçaklıy, übä başlıy). Fändäs! Maturım, bu min bit!
  Fändäs (küzlären aça). Ä santehnik kayda?
  Zäynäp. Ul tualetta.
  Fändäs. Uf, yörägem cu itte, östemä santehnik menä dip.
  Zäynäp (cilterätep). Fändäs, bu min, Zäynäp.
  Fändäs. Ä bu min, Fändäs. (Yokıga kitä.)
  Räşit kilep kerä. Koçagında çäçäklär, şampan şärabı, ber kap känfit.
  Räşit. Şıltıratam, şıltıratam... Nişläp trubkanı berkem dä almıy? Üzeñ genämeni?
  Zäynäp. Santehnik monda.
  Räşit (kulındagı äyberlärne östälgä urnaştıra). Ul monda propiskaga kerergä mataşamı ällä?
  Sacidä kayda?
  Zäynäp (açulanıp). Nişläp bötenegez dä minnän sorıysız?
  Räşit. Uramdagı keşedän sorıymmıni inde! (Divanga ımlap.) Bu tege Fändäs mällä?
  Zäynäp. Äye. Sez, santehniklar naçalniğı, monda yış kiläsez äle nikter...
  Räşit. Menä sin ul ällä kayan kilep kerdeñ monda. Ä sin miña oşıysıñ, zaraza. (Zäynäpneñ iyägenä barmagı belän kagıla.)
  Zäynäp (anıñ kulın çitkä etep). Nu, nu, sagrak kılanıgız.
  Räşit (Zäynäptän küzlären almıy). Min bit CKUdan tügel. Min söyärkä-naletçik. Sine kürgäç ällä nişlädem.
  Zäynäp. Ä min häzer Fändäsne uyatıp äytäm sineñ kem ikäneñne.
  Räşit (Zäynäpneñ sarafanı eçenä, kükräkläre turısına un dollar kıstırıp kuya.) Tik kenä utır.
  Min oşıymmı siña?
  Zäynäp (çitkä karap). Oşasañ ni...
  Räşit. Äydä kittek minem belän.
  Zäynäp. Min Fändäs yanına kildem.
  Räşit. Sin aña kiräk tügel, ahrısı.
  Şäyhi (alar yanına kilä). Söylim barısın da Fändäskä. Häzer uyatam da äytäm kem ikäneñne.
  Räşit. Yäşiseñ kilmimeni?
  Şäyhi. Yuk, tuydım dönyasınnan.
  Räşit (santehnikka ber meskengä karagan sıman karap tora). Ä sineñ kem ikäneñne häzer ük üzeñä äytimme? (Uylap tora.) Äytmim. Yä vanna bülmäsendä hurlıgıñnan asılınıp ülärseñ. Annarı bäddogası miña bulır. Min siña häyer genä birim äle. Mä. (Akça birä. Şäyhi akçanı alıp çalbar kesäsenä tıgıp kuya.)
  Şäyhi (Zäynäpkä). Äytäm Fändäskä.
  Zäynäp. Närsä äytäseñ?
  Şäyhi. Bu keşe belän ğıyşık-mıyşık kiläseñ dip.
  Zäynäp (küzlären akaytıp). Kayda? Kayçan?
  Räşit. Nervılanma yuk öçen. Un dollar bir dä kotıl.
  Zäynäp. Nahal!
  Sumkasınnan akça ala häm santehnikka birä. Şäyhi akçanı ala da üz eşen dävam itärgä kitä.
  Räşit (Zäynäp karşına caylabrak utıra). Söylä äydä.
  Zäynäp. Närsä söylim?
  Räşit. Niçeklär itep şuşı köngä kaldıñ? Annarı, şunısı säyer, niçek sine berär cirdä bärep ütermilär ikän?
  Zäynäp. Ham! Menä sezne niçek ütermilär ikän?!
  Räşit. Mine inde ällä niçä tapkır üterep karagannarı bar, läkin niçekter barıp çıkmıy.
  Zäynäp. Keşesenä turı kilmisezder. Üzegezne belegez, oyalmıyça utırasız bit äle şuşında.
  Räşit. Nişläp äle oyalırga tiyeş min? Mine, cankisägem, çakırıp kiterdelär. Ä menä sine monda kötüçe genä tügel, kürergä teläüçe dä yuk bugay.
  Zäynäp (üzen kaya kuyarga belmi). Min tuydım sezdän.
  Räşit. Nişliseñ bit, min, mäsälän, sinnän genä tügel, böten dönyasınnan inde küptän tuydım.
  Sin kem?
  Zäynäp. Niçek inde «kem»?!
  Räşit. Atañ-anañ, Vatanıñ barmı sineñ?
  Zäynäp. Minem böten närsäm bar.
  Räşit. Sindä oyat kına yuk.
  Zäynäp. Citteme sezgä, yukmı! Fändäs!
  Räşit. Kıçkırma, yoklasın. Siña niçä yäş soñ, tavık baş?
  Zäynäp (başın çitkä borıp). Hatın-kızga andıy sorau birmilär.
  Räşit. Mondıy situatsiyädä yarıy. Niçänçe yılgı sin?
  Zäynäp. Ä niçä yäş birer ideñ?
  Räşit. Birmäs idem. Äle bulganın da kire alır idem.
  Zäynäp. O-o-o, ostrit itkän bula!
  Räşit. Sin ber illedä bardır inde.
  Zäynäp. Nahal! Küzegezgä berär närsä üste mällä! Sezneñ şayarularıgız üzegezgä, älbättä, kileşä, läkin ber dä kızık tügel!
  Räşit. Minem belän barasıñmı?
  Zäynäp. Kaya?
  Räşit. Abzar artına! Kaya bulsın inde... Minem bu şähärdä altı fatirım bar. Teläsä kaysına barabız.
  Zäynäp (küzlären çekeräytep). Miña ille yäş bit, nişläp äle mine çakırasıñ?
  Räşit. Siña karap utırgaç, märhümä äbiyem iskä töşte. Bala çakta äbiyem belän yoklıy idem. Bik cılı bula torgan ide.
  Zäynäp. Fändäs! Mine monda mıskıl itälär!
  Fändäs (yokı aralaş). Nişlätälär?
  Räşit. Kıçkırma! Tavışıñ tavış tügel, obşecitiye vahterınıkı şikelle — can bizdergeç.
  Zäynäp. Citte! (Räşitneñ yañagına sugıp cibärä.)
  Räşit (anıñ kulın totıp ala häm şatırdatıp kısa). Yahşı çakta gafu üten. Äle soñ tügel.
  Zäynäp (yalvarıp). Cibäregez, çıgırımnan çıgardıgız mine.
  Räşit (kulın şıtırdatıp kıskan kileş kaynar itep irennärennän übä, Zäynäp karşı tormıy).
  Seberke! Kaynar närsä sin üzeñ.
  Zäynäp (yomşak kına). Nahal.
  Räşit. Sindä miña ber sıyfatıñ oşadı.
  Zäynäp. Kaysısı?
  Räşit. Ul sineñ iñ matur sıyfatıñ — sindä oyat yuk. Sineñ kebeklärgä yäşäve rähäträk. Läkin tormışta oyatnıñ kayçan da bulsa ber kiräk bulıp çıguı bar. Şalt, mäsälän, kiçekmästän oyat kiräk!
  Ä ul yuk! Menä şunda sineñ betüeñ ihtimal.
  Zäynäp (täkäbberlänep). Bütän kaygıñ bulmasa, aptırama ber dä.
  Räşit. Bütän kaygım yuk, şul sineñ kebek tavık-çebeş öçen kaygırıp kına yörim inde min könetöne.
  Fändäs (uyana). Üläm!
  Räşit. Ülmiseñ. Väğdä itäseñ genä. Äydä baş tözätäbez.
  Zäynäp (yanına yögerep bara). Fändäs, bik çitenme?
  Fändäs (aptırap karap tora). Sin kitmädeñmeni äle?
  Zäynäp. Min mäñgegä kildem.
  Fändäs (torıp utıra). Küñel bolgana.
  Räşit. Sineke genä tügel, minem dä saruım kaynıy başladı inde monda.
  Fändäs (östälgä ımlap). Anda eçärgä berär närsä barmı?
  Räşit. Betep kilä.