Бөҗәкләр белән сөйләшү

  — Чикерт-чикерт, Чикерткә,
  Сине нәрсә сикертә?
  — Синең кебек малайлар
  Тотарга чамалыйлар...
  — Әй Кырмыска, Кырмыска,
  Хәлләр нихәл тормышта?
  
  — Тормыш ансы ярыйсы,
  Тик... кай яктан карыйсы?
  Кайчак урманга чыгып,
  Өнемә таяк тыгып,
  Малайлар туздыралар -
  Ярышлар уздыралар.
  
  Их, бер ярыш уздырсаң -
  Үз өйләрен туздырсаң?!
  — Әй Күбәләк, Күбәләк,
  Синең тормыш түгәрәк...
  — Түгәрәген түгәрәк
  Кебек инде, Мөбарәк...
  Тормыш ансы ничава,
  Тик бозылды бит һава!
  Даруын да сибәләр,
  Агуын да сибәләр.
  Сибәләр дә сибәләр!
  Безнең жаннар кибәләр...
  
  — Үзең нихәл, Мөбарәк?
  — Минем дөнья түгәрәк!
  Аккошлар бетеп бара,
  Үрдәкләр китеп бара.
  Әрәмәләр, сазлыкларны
  Кешеләр тетеп бара.
  Елгамны киптерәләр —
  Кырга су сиптерәләр.
  Тавымны да җимерәләр —
  Таш кирпеч иттерәләр.
  Казылмалар эзлиләр —
  Җир белән тигезлиләр.
  
  Шулай, дустым Күбәләк,
  Дөньям тигез, түгәрәк!