Үйірмеден үйірме

  Үйірмеміз көп біздің,
  Бәрін қолдан өткіздің.
  Үйірменің сен барған
  Санын онға жеткіздің.
  
  Бір күні болдың аспазшы,
  Болдың бірде бақташы.
  Бірде болдың модельші,
  Ұнамады басқасы.
  
  Сөйтіп жүріп спорттың
  «Сортын» қудың үш-төрт күн.
  Ұста болып саусақты
  Тістеуікке тістеттің.
  
  Оны тастап бір кеттің,
  Биші болдың сен көп күн.
  Таба алмадың сонымен
  Жеңіл жолын еңбектің.
  
  Жүрсің әлі секеңдеп,
  - Арманыма жетем, - деп,
  - Жалқауларға үйірме
  Ашылмайды екен, - деп.