Аамҭа иазымҵәахыз - 5

Уи мчыла еиднахуеит ҳагәқәа…

Ҳҩызцәагь ҳзыԥшуп, џьара ус аӡә днаҳалымшәо,
Маӡала игәырӷьо рхырҿқәа!..
Бысзымгәаарц сбыҳәоит, сылаԥш
гәык быхсыжьуазар,
Уи шәарҭак анцәырҵуа абалоит…
Бхаршҭшьас исымои, сгәы ҭыхны
икасмыжьуазар,
Иахькаршәугьы быхьӡ аҳәалоит!..
***
Адунеи аадырҳәырц иаҿуп шьоук ара,
Ихдыршәҭырц рҭахуп иара хыла…
Аҟәышқәа рыбжьы заҵа ирмаҳара,
Гәаӷла иҭәу ажәларқәа анеидыххыла…
Аха иҟоуп урҭ раӷәра иаахан изку,
Ижьышуа бгаҵас, иадцан иԥхарҵон…
Иара адунеигьы ласызҭгьы урҭ ишырҭаху,
Ирԥырхагоу ахаҳә еиԥш, ахланҵ иҭарҵон!..
***
Амҩа аҭатәым агәаӷ,
Заа иҵхлатәуп адацқәа…
Уи иззахамҵаз аҟәараӷ,
Иҟамлацт ицәымытҟәацқәа…
Аҳалалра шәарҭоуп цәгьа,
Абга иацҭаркыз жьоушәа!..
Аха ихьчазар иара цқьа,
Иазыргар абжьы нароушәа…
Усҟан аԥшәмарагь ауеит,
Цгьак захьӡашам иркаран…
Мамзар агәаӷ ихнаҩауеит,
Узаҿамԥшуа адунеи еиқәаран…

***
Бысцәыбнал, бҭахызар, иахьыбҭаху бца,
Сылахьгьы инаган усҭахым ҳәа ианҵа!
Зегь акоуп ба бышҟа сыҩны сцалоит,
Зегь акоуп ба быччаԥшь бмырбаӡакәа изӡалоит!
Иҟалоит сбыхҭыгәлар ҽаӡәы бшизыԥшу,
Сгәы ԥызжәоу бымҳәароуп амыцхә саншу!..
Мамзар, уи арԥыс зынӡа сиаӷахоит,
Ишәҭқәагьы ргарҭаҵәҟьа имоуа дынхоит!..
Амш сыннакылом, иԥжәалааит ақәагьы,
Усҟан сшьамхы ҵархоит еиҳагьы!..
Бхышә хәыҷ цхыбжьонла цәгьашәа исгәаԥхоит,
Бӡамҩқәа иреиԥшны иҟаԥшьӡа еикәаԥхоит!..
Дыбцәажәыр ҟалоит ҳәа шьоук баша
бдыршәоит,
Ирдыруоу, зны аҵәарҭ шҿоу акәамԥагь
кашәоит!..
Аҽыбӷаҿ ҳаннеи, зынӡакгьы сԥырӡоит,
Сҟамчы сҟьаӡом, ус знык иасырбоит!..
Бысцәыбнал бҭахызар, бнала, ма шьхала,
Зынџьырҵас бмапқәа рыла сшьаҳала!..
Аарцә акәыз, нырцә акәыз, мышкызны
сбыхьӡоит,
Аҳаԥеиԥш, сгәы бызҭымҵуа бнаган
бҭасыртәоит!..
***
Ба бзыргәааи ҳәа сымҵааит,
Аха быблақәа исарҳәеит…
Ԥыҭрак ашьҭахь ибхыԥсааит,
Исмырбакәа, маӡа бҿарҳәеит!..

Аха быччаԥшь сҿабмырԥхеит,
Иҭбырқәацәааит бара бқьышәқәа!..
Шьҭа баҟәыҵ, уажәшьҭа исызхеит,
Шьҭа иаарты нас бара бхышәқәа!..
Аха икыдыбҟьеит уи убас,
Асаркьа ҭҟьарц аԥсык ауп иагхаз!..
Ҳаи, шьҭа исымада ҭынхас,
Иаитәы егьыҟамзаап изхабгаз!..
Аха шәымҭак ауп ицаз,
Лыччаԥшь схьылыгӡеит мацәысҵас!..
Иарбан мчу уи лгәы ҟазҵаз,
Иарбан мчу са сыцҳа хызҵаз?!
Шьҭа срызхәыцуеит сара шәкы,
Аха акызаҵәыкгьы сзалхуам…
Уҭахызар ухагаха, уаапкы,
Лгәы анузаалырт, улыԥсахуам!..
***
Аԥсҭазаара аҟыба-ӡыба,
Амаӷыш иаҩызоуп, сашьҭуам…
Сара сҭамтәац аӡә иџьыба,
Абзеира сзызузгьы дысхашҭуам…
Ас изсцәыхьанҭоу сыздыруам,
Асҵәҟьа изҵысуазеи сыцҳа?!
Аӡы хышхыҵәауазар, сзыруам,
Снахәларшәны сагома рыцҳа?!
Ус сишама лахьынҵада,
Хықәк схықәнажьлап аӡәы сибарцаз…
Ари аԥсҭазаара атәы зҵада,
Сызҿыз иашан даара иҳәарцаз…

***
Са сгәы иҭаскыз сзахьымӡозар,
Шьапҿаршә сзиуазар аԥсцәаҳа…
Снеирц ахьысҭахыз, снамӡозар,
Сгәыхәтәы сзаԥымлауазар уаҳа…
Нас, сабеиҭахыз сызшозгьы,
Адәы сзықәиҵеи сыргәаҟуа…
Сара исеиӷьыз аӡә дибозҭгьы,
Агәырҩа хьанҭыџь дамыргакәа!
Уи аҵыс ԥшӡа махәык инықәԥраан,
Сыжәҩахыраҿ иааины иԥхьахыр…
Ах,аԥсҭазаара, ухышә нывҵраан
Мрахаак сыла иҭаурыԥхахыр!..
***
Шаҟантә сшьацәхныслахьоу сара,
Сыжәҩа нҭарсны саанызкыло,
Сҩызцәа, шәсымамызҭгьы абра,
Сзыҟаломызт уажә сышәԥыло…
Шаҟантә саҟәыҵхьоу сара аҩра,
Скалам сыршәхьоу, усымбааит ҳәа!..
Еиҭасықәшәоит ҿыц аира,
Смуза аацәырҵуеит, ухаҵкы сцааит, ҳәа!
Абас исышьҭоуп сыхәцә санкы
Аԥсҭазаара, ус сцалароуп…
Зны сықәнаҟьоит, уи сшьапы,
Зны сықәнаргылоит;-«Уеихалароуп!»
***
Сара исымаз агхақәа,
Сцәа исызҭамыгӡеит, исзымжәит…

Зынгьы сцәыргалеит ақәа,
Зны амра сықәдрыԥхеит, срыӡрыжәит…
Иацы сыззымиааиуаз, ицәгьаз,
Иахьа снацәа иахасыршәуеит!..
Ажәа иашьҭаз, ихнарҵәаз,
Схьаақәа, ҩызара сзыжәуеит…
Ус ҳаицнеилап, ҳамшәацәап,
Абзиагь ацәгьагьы ҳнарҿыхәо…
Ашәарҭа ҳԥырҵып, аҽаӡап,
Рагәаԥшьҵас, ҳаламыс аныӷәӷәо!..
***
Ба быда гәҿыӷьроуп џьым ара,
Ақалақьгьы аҿаԥа аҿалеит!
Ибдыруеит дшыҟам ба бмыцхәра,
Бараӡәк сгәы ашә аартны бсыцәҭалеит!..
Шьҭа бара ибҳәо ҟанаҵоит,
Са сазымдыруашәа иаацәырҵуеит…
Исымбар анамуа аҽаӡоит,
Саназыԥшӡам, ашәхымс иаахыҵуеит!..
Зны агәҿыӷьра анаҟә насхаԥоит,
Зынӡа иццакӡом уи, аҽыргәаԥуа…
Сгәы сашьҭоуп, иҟам, инхацәоит,
Уабакылаӡ, сҳәахуеит слафуа!..
Уи ахьыҟоу бдыруаҭгьы бара,
Иаҵеит ба бҟын аҽыҵәахышьа!..
Уажәшьҭа изгаӡаҵәҟьом уи агәра,
Зынӡа исгәаԥхаҵәҟьом уи аԥшышьа!..
Сзыргәырӷьо башьҭамшәа бара,
Сзыргәаҟуарҿ акәзаап бахьаԥшәымоу!

Агәҿыӷьра саашьҭнаԥаар сара,
Бараӡәк боуп самызхуа исымоу!..
***
Зегь акоуп исзычҳауам бсымбар,
Бахьыҟазаалак сгәы ԥшаауа ибышьҭоуп…
Сара саԥхьа ҷкәына ԥшӡак бигар,
Иаразнак сызхылауа ба бышьҭоуп!..
Са издыруеит, ус схы агәра асыргоит,
Сгәы иҭоу мышкызны инаӡароуп…
Иҟоуп хәшәык, уи сыхәоит, ма сагоит,
Ба бзы ихьшәашәоу, сара сзы ицароуп!..
Зегь акоуп, ба бынасыԥ ҟалоит,
Исыздыруам, зашҭа бҭалоу дарбан?!
Баргьы гәаныла бзиа сыббалоит,
Даҽаӡә иччаԥшь наҟ аӡӷьыра инаҭан!..
Уажә азыҳәан ак ҳзеиламшәа ҳҳәалап,
Ҳагәра ргарцаз ирҭаху ҳархықәаап!..
Ба быӡӷабуп, ашьабсҭеиԥш бҽырбалап,
Иаҭаххар, саргь сымаҳә хылԥа схысԥаап!..
***
Сызхьымӡац шырацәоу агәра згоит,
Иаацәырҵует сҿаԥхьа еиҭа ҳракырак…
Сшьаҿа неихызгар, зегьы бгоит,
Снапгьы инампыҵшәоит уа маакырак…
Аха аԥсҭазаара ҩаԥхьа ицәқәырԥоит,
Сылаԥш нақәшәоит иаҳракӡоу ахра…
Ашәарҭара аҵәаҟьеиԥш исынԥоит,
Снышьҭнаԥаауеит ажәа аҳра!..

***
Ахеиԥш исылҟьеит сара ажәа,
Уи дәықәырҵеит садыргарцаз…
Аҳы, ухаҵоуп, уажәшьҭа уцәажәа,
Ашьапҿаршәҵәҟьа узаауит рҳәарцаз…
Аха уи ажәа са сахымԥсааит,
Аҭак дәықәысҵеит имҩашьо!..
Изықәнаго рышәхымс иахысааит,
Иагьырдырлап уи иаҳәашьо!..
Ахҿа иаҩызоуп иуқәкны ианааиуа,
Ушьапы уқәнаҟьоит уӷәӷәамзар…
Уи дфырхаҵоуп ажәа иаиааиуа,
Аха дрыцҳауп, агәы изҭамзар…

***
Ажәа бысҭеит, уаҳа исҳәом ҳәа бзиа бшызбо,
Еилазгар акәхеит сара уи ажәа уажәшьҭа
ишыббо!..
Изурызеи, сеилкаа, сбыҳәоит, сгәы сызҭыгом,
Банызымбо, амш шықәсдуҵас иаасызхыгом…
Сара усҟангьы уи ажәа мчылаҵәҟьоуп ишысҳәаз,
Иахьагьы исыздыруам закә мчу сара исыхаз…
Бзиа бшызымбо, шьҭа бшысхашҭхьоу ҳәоу
сангыло,
Урҭ ажәақәа роуп ибдыруаз сыԥсы згәылоу!..
Ажәа ибысҭаз наҟ исзырхынҳә шьҭа иҟалозар,
Бзиа бшызбо сара сааҟәымҵӡакәа исҳәалозар,
Шьҭа исыздыруам нас абриаҟара ба бзырхәыцуа,
Амца анаҵо ауп агәгәаҳәа аӡыршы анхыҵуа!..

***
Иааиуеит аамҭа зегь ириааиуа,
Аӡәгьы издырӡом дахьаго…
Аха изларшәу абзеира аиуа,
Анцәа дахьигӡоит иқәнаго…
Усгьы дыҟоуп уи мҩахызго,
Ма изырхәашьуа есымша,
Абзиа иашьҭоу ажәа рцәызго,
Зынӡа ишыӷәӷәамгьы ихыԥша…
Аха аамҭа зегь ириааиуа,
Акгьы амбоушәа ҟанаҵоит…
Уаҩ изгәамҭо, иара иаҩуа,
Улахь инаган ианнаҵоит!..
***
Ус бара бымсааит, ҽаџьара бшыԥшуаз,
Зынӡа ишбызгәамҭаз шәлақәагьы шышуаз?!
Агәашә сшаадыххылаз зынџьырла иабыркыз,
Аанкылара шыцәгьаз сыҽ сҟамчы зықәкыз,
Сышьхәа насырбар, уи снахыууаа сцон,
Бҭаацәа ирыхьз еилыркаанӡа, ашәымҭаказ
бызӡон!..
Ус бара бымсааит, ҽаџьара бшыԥшуаз,
Нарҭаа рқәаб иаҟароу ахш рацәа шбыршуаз!
Уи уажәы-уажә ишаҵыбшьуаз,
ихыҵыр ҳәа бышшәоз,
Шәлақәагь уаҟа ибыдгьыжьылон,
рҵыхәақәа зрышәшәоз!
Урҭ брызгәаан брықәыҵәҟьон,
наҟ шәысԥырҵла, ҭит!
Сара сычҳара шхыҵуаз, хьаас зынӡа ибымкит!..

Ус бара бымсааит, ҽаџьара бшыԥшуаз,
Зынӡагь блымҳа ишҭамсыз, сгәы иаҳәоз ауаз!..
Сгәи сыхшҩи ирҳәоз, еиқәымшәеит,
еимдрыххеит,
Сыгә баб иҭәаҟәа амцра ацрарсра аҭаххеит!..
Аха сыхшҩ иамуит «Иухьзеи, агаӡа,
Лаб даацәырҵыр ҳкәыкәылах
ықәихуеит зынӡа!..»
Ус бара бымсааит, ҽаџьара бшыԥшуаз,
Зынӡа бшьара бшықәнаҟьаз амца ӷәӷәа
ибыншуаз!..
Уаха амзагь сыхәаԥшуеит аблақәа хааӡа,
Быхшгьы шыр бааԥеиԥшроуп, иабҭарц ахааҵа!..
Ус быбжь сгәы инықәҩит, «Уаха аҵәы сахоуп,
Шьыжь арбаӷьқәа иааиларԥсаанӡа,
умааин, сеилахоуп!..
***
Зынӡа ажәакгьы сҿымшәеит, зынӡа
ажәакгьы сҿымшәеит,
Зынӡа ажәакгьы сҿымшәаӡет сара…
Бара сгәы зегь ԥыбжәеит, бара сгәызегь
ԥыбжәеит,
Бара даара беигәырӷьеит сбылра!..
Уажәшьҭа уаҳа ак ҳзеилам, уажәшьҭа
уаҳа ак ҳзеилам,
Уажәшьҭа быччаԥшь сашьҭаӡам зынӡа…
Мчыла исҳәоит абзеираз, мчыла исҳәоит
абзеираз,
Зынӡа ак ҳабжьамзшәа иԥхьаӡа!..
Сгәы, уажәык сумшаҭеит, сгәы, уажәык
сумшаҭеит,
Сгәы, уажәык сымшаҭакәа сужьеит…

Сгәырҩақәа зегь сгәарҭеит, сгәырҩақәа
зегь сгәарҭеит,
Схьаақәагьы раӷәрақәа рыҿшәеит…
Бца, бысԥырҵ, иауазар, бца, бысԥырҵ, иауазар,
Иҟалап мышкызны сыбрыԥрхар…
Ибхарои, са сбылуазар, ибхарои, са сбылуазар,
Нас уи бымца салҵып сеиқәбырхар!..
***
Шәарҭ шәыгә иалоу рацәаӡоуп,
Акәасҭхеиԥш ишуп шәхьаа…
Даргь зҭынчым убриазоуп,
Даргьы аршлеит убри заа!..
Ари аԥсҭазаара хьанҭоуп,
Ҳаԥхьа игылоу идмырласуазар…
Шьоук ирхьаау дара ртәоуп,
Уара ухьаа рылымсуазар,
Мчыла иузрыдҵаӡом уара,
Уааигәа агылара ианацәхьаҵуа…
Аамҭа аҵәы алоумҵан ара,
Иара ахала ианыҭҟәацуа!..
***
Уи даныбзиаз аамҭа цахьеит,
Уи даҿамхакәа амцҳәашьа иҵахьеит,
Шьҭа уабаихәо!..
Аҩсҭаа ичысхә алакҭа дҭадрыԥшхьеит,
Ианырҭахыз, аху-хуҳәа ддыршхьеит,
Дрылоуп урҭ дхырхәо!..

Уара угәы далоуп анкьа иуаҩыз,
Уажә дааумпыҵахеит деиԥшны аҩыз,
Изуӡбари рыцҳа?..
Уара усгьы уаҿызаауеит узҿыц,
Аха убри иҩыза уаҿамшәаларц иц,
Дықәумҵан уцҳа…
***
Уара узцәаҳәак иаԥсам роуп уӡбахә зрыххо,
Урҭ ирдыруеит уҟанаҵ ахаан ишмыцхәхо…
Аха ирыздырӡом уа шуакәым дара ҭазырхо,
Баҩхатәра ахьрымам ауп рыԥсы еилазырхәо!..
Уи, Анцәа ду иоуп хыхьынтәи ирылазҵо, изшо,
Уанӡа рнапы знеиуам, иҟам шьҭа иқшо!..
Иаԥсам ҳәа дрызхьамԥшзар, џьым, акыр зылшо,
Уара уаныҟамгьы, уҩымҭақәа роуп,
уаҵәтәи амш зызшо!..

***
Уи ауха аиашаз амла сакуан,
Аха бара џьара быццакуан,
Быбла сабомзт…
Бысҭак узызуп, бҳәеит бара,
Аха урҭ ажәақәа исзымгеит рыгәра,
Бгәы аҟынтә иааӡомзт…
Снеира бҭахушәа ибҭахымшәа ибҳәеит,
Изура сзымдыруа саргьы саашанхеит,
Лафкгьы сыҿнамхит…

Бзиа избоз быччаԥшь сыцәцеит,
Бзиа избоз ббысҭа мсаӡеит,
Аҵхгьы сыхнамхит!..
***
Шьҭа еилкаауп, егьҳзеилаӡам ҳара,
Абриаҟра аамҭа сзажьоз нас сара сгәы?..
Бнасывысуеит ус хара-хара,
Ҳаизааигәазаргь, иҳабжьоушәа аабоит такәы…
Шьҭа еилкаауп, ҽаӡә былаԥш изырхоуп,
Сара ус бнасахәаччон ргәыбзыӷгас!..
Ах, сыгә рыцҳа, иужьоз уара ухоуп,
Уараӡәк уоуп издыруа сара исхугаз…
Шьҭа еилкаауп, араҟа са смыцхәуп,
Бгәы ааиртырц ҷкәынак даадыххылоит…
Са сымҵәыжәҩа сзышьҭымхуа ихуп,
Ахәлара зыхьӡаз ахьшьеиԥш, сыԥхьарылоит!..
***
Ҳара иҳабжьаз зегь абра инҵәеит,
Ба быхәмарра шьҭа сазхыхуам…
Сызқәыло абаҟоу, ҳацҳагь ԥҵәеит,
Сзырхагоз быччаԥшьгьы базҿыхуам…
Гәырҩак рхуп ихәашьӡа слакҭа,
Хьаасгьы исымам уажәшьҭа исԥеиԥшу…
Исзынхаз сеидру. мшәан,уажәшьҭа,
Зыбӷьқәа ҿӷәыхаау аҵла сеиԥшуп…
***
Уи лымца скызаауеит сара,
Аӡәгьы издырӡом уажәшьҭа исхызго…

Уажәыгь сацәшәаҵәҟьоит абылра,
Уажәыгь исхьаауп сгәы данҭызго…
Аха сымца лхьымсӡозар зынӡа,
Даҽаӡә икәицқәа дыдрыԥхозар…
Саргь уи салҳәозар имӡа,
Иқәыԥшӡоу ҷкәынак игәра лгозар…
Иазхоуп,слызхьаԥшӡом сара уажәшьҭа,
Уи лгәы иалнахыз длымаз…
Данызбо еихаччаргьы слакҭа,
Гәаныла исҳәоит, сыхшҩ, уаԥшәымаз!..
***
Шьҭа иазхоуп, ҳаиԥырҵып ԥшьаала,
Уи са шсакәугьы еиҳа иззыцәгьо…
Акагь ҟамлазшәа ба бҟазшьала,
Ихәаҽгәышьа акәиц ихәыҵҟьо…
Шьҭа иазхоуп, еиқәаҳхып ҳамца,
Санылом бымҩагьы сҽырхахан!..
Исыцрымшәо быччаԥшь, аҳәатәхамҵа,
Сажәра иҭазгалоит хьҟәырҷахан!..
***
Аамҭа иқәыӷәӷәоит ӷәӷәала,
Дакуп ахџыџеиԥш дыҵацалан…
Аха иҭыԥаҿ иара ихала,
Аӡәгьы дзииааиуам дыкҿацалан…
Ахаангьы ирымҭац ҽыԥныҳәа,
Ахаангьы абз цәгьагьы дзахәуам…
Угәы ҭынчыз иара изыҳәан,
Уи аӡеиԥш ихьышьҭра иԥсахуам!..

***
Акгьы ҟамлазшәа ҳаиҿаԥшуеит,
Даҳзымдырӡоушәа ҳауа изхароу!..
Баргь ҩныҵҟала беилашуеит,
Саргьы исызцәыргом арахь исгәалоу…
Абас ҳаиԥырҵӡоума зынӡак,
Ҳазцәажәом, ҳажәақәагьы ныхуп…
Иҟаҳҵар ҳҭахуп ҳара шьаҿак,
Аха ҳабжьара ацҳа хыхуп…
***
Цәашьык хааӡа иҭаԥхон са сгәы,
Аӡәгьы исырбомызт, иҵәахын…
Исыцын, сахьчон уи такәы,
Сымҩа арлашон, саҭахын…
Иахьынтәааз сеидру, ԥшак ҵысит,
Ишызбоз иарцәеит са сцәашьы…
Мцак захылмҵуа иԥсасит,
Шьҭа исхаԥаҵәҟьоит сара ашәшьы…
Ԥхаррак ыҟамшәа џьаргьы,
Адунеи ҵаазшәа збауеит…
Сгәы ихааӡа иҭаԥхоз сцәашьгьы,
Лабжышк иацны икаҭәауеит…
***
Убас сбыргәааит уи ауха,
Исҳәогь сҿамшәауа саанхеит…
Зынӡа ибымамызшәа аԥшыха,
Наҟ бысԥырууаан беихеит…
Сыла ирбоз сызхаҵомызт,
Ари ба бакәзу, аҽаӡәу?!

Сбышьҭаларгьы, сызбыхьӡомзт,
Зынӡа сашьҭуамызт сызку..
Бцеит ауха.Бхьамыԥшӡакәа,
Уссгьы имкыкәа иҳабжьаз…
Амзагь са сымшаҭаӡакәа,
Еиҭасанаҳәеит сышжьаз…
Зегь сцәыӡит шәымҭак ала,
Уи ауханӡа исгәаԥхоз…
Исзынбыжьит бара агәала,
Ишыбдыруазгьы сышҭанархоз…
***
Уаҳа акгьы ҳзеилам, абзеираз, ҳаилгеит,
Ба бынасыԥ са саԥырхагам…
Акымзарак, иҟалеи, атәылагь мыбгеит,
Исзырҳәоугьы акыҟазаап, схагам!..
Уажәраанӡа издыруаз бакәӡам бара,
Иаалырҟьан убас бҽыбыԥсахит…
Зынӡак исҭахым сара акгьы аҳәара,
Сзеиҭамҵуа аӡә илаԥш саԥахит…
Анкьеиԥш быҟаӡам, аарла быччоит,
Ибыхьуа сыздыруам саныббо…
Аҵыхәтәантәи аамҭаз быгәгьы еиҟәыҷҷоит,
Ибҭахӡамкәа былаԥш ансхыбго…
Ҟазшьала ҳаиқәымшәеит, қәралагь убас,
Сыбзаҵамҵеит уаҳа быԥсаҵа!..
Сбықәныҳәан бдәықәысҵоит, сгәааӡом зынӡас,
Игәаӷьы нас, бца нас, шьҭа хаҵа!..

***
Иҟоуп бзиак, шәа ишәызгәамҭо,
Уаҩы иахьибарҭам аԥсы ҭоуп…
Аԥшӡа иашьҭоу, ақьиа дызшаҭо,
Зегь иреиӷьу уи илакҭоуп…
Шәара ишәқәашьым уи дахьыҟоу,
Иааигәа анеира, ибара…
Абзиа зныруа, аиаша иазыҟоу,
Убри аӡәк игоит игәра!..
Даара идууп шәара ишәцәыӡуа,
Аха ишәзеилкааӡом зынӡа…
Дыҟоуп ус, аӡәы сзызхәыцуа,
Дсыргылт сыԥсҭазаара аханӡа!..
***
Кагь ҟамлеит нас, ус ҳаиԥырҵит ҳара аамҭала,
Ибныбмырԥшын, бҩызцәа рҟынгьы
ба блакҭала…
Ҭынч базхәыцып, ҭынч ибшәап уи зегьы бхала,
Нас ҳаиҭеиқәшәап, нас ҳаиҭеибабап лыԥхала…
Исанабыжьша ус акы ыҟамзар схынҳәӡомзт,
Иара бхаҭаҵәҟьагь инаҿаршәны
сыгәра бгаӡомзт…
Кагь ҟамлеит нас, ԥша шәышәык ауп
аарла иасыз,
Ус иаҳнырт ауп, ахы ҳнардырт ауп,
ишымҩасыз!..
***
Са саныббо быбла ԥшӡақәа амца рхылоит,
Аха ак рҳәаанӡа, уи бгәы аҟәышра
нарԥыххылоит!..

Урҭ ирҭахыз, урҭ ирӡбарыз, нас сазхәыцуеит,
Издырт шысҳәо, избеит шысҳәо,
инасԥырҵуеит…
Са саныббо бӡамҩа ԥшӡақәа аауаркалеиуеит,
Ибуа ибҳәо бақәымшәауа, баагәаҭеиуеит!..
Акагь сымбазшәа сыбла бҟәызгоит
быԥхашьаанӡа,
Ҷытбжьык заҩымшәо ахьшьыцбеиԥш,
бысцәықәԥраанӡа!..
Са банызбогь, сгәы сыцәҭыԥоит, измааноузеи,
Уи анкылара, уи аргәыбзыӷра, иаҭахӡоузеи?!
Мшәан, саныббо, ба быгәгьы ус алеишәа
цәгьазар,
Иҟалои нас, инеиужьны, ирԥырҵны ицазар!..

***
Ҳаиԥырҵуеит, еиҭах бааныжьны сцауеит,
Ақалақь баларшәны бхала…
Гәалақәак бымоуп, аха ибӡауеит,
Џьара быԥшуеит быбла кыдхалан…
Сшьапқәагь сызхәыцӡом, уажәык еилагеит,
Ишәыхьзеи, сҩныҟа сыжәгароуп!
Сыхшҩ, уаасзымдырыртә иахьак уеибагеит,
Уаҳа угәы кажьны усымбароуп!..
Амзагь хаакәакәараӡа хыхьынтә иԥхоит,
Ԥшқацәоушәа еҵәаџьаагьы гароуп!..
Нарҭаа рбаагәареиԥш, аԥсҭҳәа еикәаԥхоит,
Аха ианаҭахха, урҭ зегь срыбгароуп!..
Ари ақалақь зынӡаҵәҟьагь агәра згаӡом,
Ҷкәынцәақәак збеит ишуаҭыруаз...

Баша игәы иҭеимкааит, аӡәгьы бизгаӡом,
Ахыкәалааиԥш скылҟьоит, ибдыруаз!..
Ҳаиԥырҵыз џьызшьо, зынӡак ргәы иажьоит,
Схықәысҵарц сыҟам, бсыԥшаанӡа…
Сгәы алым иаҩызоуп, иахьҭаку исыжьжьоит,
Ахыцқәа ԥыххаа исыцәцаанӡа!..
***
Сажәеинраала иамҳәаӡеи, нас сара сгәы иҭаз,
Инеины бгәы изҭамтәаӡеи, иара иахьахәҭаз?!
Ма бышьҭырԥраан бамгаӡеи, жәҩанахьы хара,
Былабжышқәа ҭамбаӡеи,
иацәымшәаӡои азыԥшра?!
Сажәеинраала аныԥхашьо, бахлафаала бара,
Иахьынӡауа икҿацала, иаҿызааит абылра!..
Амала ирыцҳахоит уи ба бгәы иҭшәар,
Аҵысхшеиԥш ихыбмыртәалар,
ибцәыӡуеит ибыршәар!..
***
Мшәан, ҳлашәума, иҳахьзеи, ҳара ара
зегьы аабоит,
Аиашеи ахәахәеи еиҵагьежьны еиқәԥоит!..
Зтәы иагоу сеидру, уи аҿҳәара хароуп,
Аха ишәарҭоу, иаиааиуа рахь ииасуа роуп!..
***
Макьанагь иҳаздырӡом ҳара ҳаззыԥшу,
Амца аиқәҵара мариоуп, ахчныза аншу…
Аха гәыбӷанс ируҭои нас згәы нхауа,
Ҿаҳәарак амҿы ззаамгаз ҽҳәатәан
рҽандрыԥхауа!..

***
Ицеит ааԥын, ицеит аԥхын, ицеит ҭагалан,
Иааит аӡын, уи ҳнаԥылеит ҳамҿқәа еингалан…
Ахьҭа ҳамкроуп, амла ҳамкроуп… Аха акы
ҳхароуп,
Ҳагәқәа рҿы ада, зехьынџьара араҟа
иԥхарроуп!..
***
Ус сааиуан… Аԥсҭазаара шхьанҭыџьыз
сымбозшәа,
Иара иахьаҭахыз акәымкәа, сара
иахьысҭахыз сцозшәа…
Иреиӷьыз сҩызцәа сара есымша сыгәра ргозшәа,
Сара сзыҳәан ахаангьы бзиамзар ак
рымҳәозшәа…
Ус сааиуан… Аԥсҭазаара даара акыр
снарҵозшәа,
Избахуан, сызҭахым шьоук рыцҳақәа
ԥыҵәҵәозшәа…
Қьышәха слеира иазыԥшыз
ршьацҳәақәа хнаҵәҵәозшәа,
Са сакәымкәа, дара рҩнқәа ааныжьны
ихҵәозшәа!..
Ус сааиуан… Убри зегь зынӡа ишжьагаз збаанӡа,
Схада сзықәгәыӷша акгьы шыҟам агәразгаанӡа…
Аӡә слымҳа ак ҭеиҳәазшәа, ахықә
аҟны снаӡаанӡа,
Уажәазы сацәцеит, шьҭа саџьал гәықәха
сыхьӡаанӡа!..

***
Ҳзыхьӡаз рацәаӡамзаргь, ус баша ҳамҩамсзааит,
Ҳгәы иҭаз назыгӡаша шьоук ааип еиҭа…
Уи ҳажәа зызнаагаз игәамԥхартә
дымгәамҵзааит,
Маҷӡак иааҭылашаартә иҟаҳҵамашь илакҭа?!
Хәыҷы-хәыҷ ҳнаскьанагоит ҳаџьал ҳагәҭасуа,
Иараӡәк ауп издыруа ҳанаго, ҳахьаго…
Арҵәааҳәа аԥшадаас атрышә ианаҳзасуа,
Аԥсцәаҳа –млашь ҳааҵра данаво дымлаго,
Иаадыруеит ари адгьыл аӡә дшақәламхо уаҳа,
Еиҳа-еиҳа ҳамҩа ҭшәахоит, иладароуп…
Дгәамҵлааит аԥсцәаҳа, ҳа иҳамаӡам гәнаҳа,
Ҳзыхьӡаз ауп изымго, уи изышьҭымхуа
еидароуп!..
***
Ҳхы ҳзазымиааиӡацт ҳара,
Баша гәыӷрак акәа ҳҭаршәуп…
Ҳрышьҭоуп ахьӡқәа рырҳара,
Иҳазгәакьоу џьара икаршәуп…
Аамҭа ҳхықәнаргылт ахықә,
Шәыԥсык ухазаргь уахьеиқәымхо…
Ҳаџьал ҳаҩысуеит наԥшхықә,
Иҳардыруа, ҳаргьы ҳшазымхо…
Агәҿыӷьра иаҩызоуп аԥсрагьы,
Иануҭаауа, акгьы уҭахӡамзаап…
Сга, усыцәнымхозар саргьы,
Иҵахжәоу аҵлеиԥш, сыӷәӷәаӡамзаап!..

***
Зегьы срылаӡоит сара,
Абри зсымамзи ҳәа саҳәом…
Аха игәхьаазго абра,
Акызаҵәык, быччаԥшь сахәом!..
Убри сархагахоит имӡа,
Абри азынтәахагь баша сахом!..
Зегьы сцәыӡыргьы зынӡа,
Акызаҵәык, быччаԥшь сахәом!..
***
Зегь акоуп ибҵәахуеит, зегь акоуп ибҵәахуеит,
Зегь акоуп бара бзиа сыббоит.
Саргь уажәшьҭа исызӡаӡом, издыруеит
бгәы нсырхауеит,
Сшьапқәа сырҩны бышҟа сыргоит!..
Нас исхарои сара, мшәан саҿуп абылра,
Уи са сықәрагь зынӡа ибымгәырҩан…
Уажәшьҭа исылшом аԥшра, уажәшьҭа
ибгозар сыгәра,
Уажәшьҭа сабылуеит, схьаа сзыхҩауам!..
Нас ицеит ааԥынрак, еиҭа ҳхаагеит ԥхынрак,
Мшәан, ҭагалангьы ԥшын игәырӷьаҵәа!
Уажәшьҭа аӡынра ҳзааит, ма уи аҵх дуқәа руак,
Ҳамҭас ҳалахь ианиҵару Анцәа?!
Зегь акоуп сбырҳәацәоит, зегь акоуп
бынхацәоит,
Нас сыбгәалашәар бдәықәлашт быҭҟьа!
Са сгәы иҭаскыз наӡоит, беимаа абжьы
сыԥхьаӡоит,
Аҟамчеиԥш акаҭран инахҟьа!

***
Шаҟа ус ҳаркузеи ҳаибархха,
Ҳхаҭақәа иҳаздырӡом ҳанрыцәцо…
Ҳаибаӡом иаразнак ҳазҭаххаз,
Изакә мчу сеидру ҳныҟәызцо…
Нас, акы ҳазааиуеит ҳааԥсаны,
Уи нахыс ҳашзымцоугьы ҳнарбоит…
Ҳамахә ҩақәа наҟ инкаԥсаны,
Ҳамахә аӡа ҳашьҭахь иааиуа иргоит!..
***
Сылаԥш лҟәызгеит сара мчыла,
Ах, иахьа агәнаҳа ҟасҵеит!..
Дааныжьны амҩа сананыла,
Уаҳа схьамԥшӡакәангьы сцеит…
Аҽнынтәарак сгәы хьухьууан,
Шьҭахьҟа исыхон, сагарцы…
Уи сыжьжьахуан, шьҭа умҵәуан,
Дуцәыӡуам, уҟоуп дубарцы!..
Схала издыруан уи шымцызгьы,
Арахь мчыла агәра згон…
Аха саангылазҭгьы, сыԥшызҭгьы,
Уа сгәы ацҳаиԥш иҭабгон!..

***
Знык ауп ҳа ҳалаԥшқәа анеиқәшәа,
Уи нахыс уаҳа дсымбеит.
Ах, ицәгьаӡазаап уи ллеишәа,
Сахьӡаанӡа ла лыхәаԥшра ҽеишәа,
Ахьшьыцбеиԥш, дныҵашәкәа дцеит!..

Ҳаи, џьушьҭ, абас дԥырӡарыма,
Уаҳа ҳаибамбаӡои шьҭаҴ
Сарымоуп, сарымоуп, сарыма,
Нас уи зегьы баша исҵәахрыма,
Сызҭамԥшуазар уаҳа ллакҭа…
Сишь, џьара аԥсҭҳәақәа еилаҵәеит,
Ишызбауаз ажәҩан хәашьит…
Амза анысцәырҵәах, исхацәеит,
Сажәақәагь сзымҳәеит, исҿаҵәеит,
Сзыргәырӷьоз сгәыӷрақәа ршьит…
Ус, иаамацәыст сгәысҽанӡамкәа,
Ус, шәахәассирк аасҿаҷҷеит…
Сыҭҟьеит, уаҳа мчыкгьы сакӡамкәа,
Уи дхьаԥшит зынӡакгьы илҭахӡамкәа,
Аха илгәарԥхаҵәҟьан дыччеит!..
***
Иабаҟоу ҳаԥсуара, ҳдоуҳа,
Иабаҟоу иныҟәызго ишьҭыхны?..
Иҭҟьеит, иандәықәло еиԥш аҽыҭҟьа,
Адәыԥшӡаҵәҟьа цәыԥԥны, иӷәыхны…
Уажәшьҭа ихынҳәрыма еибганы,
Ма ҳшахьҵәуоу аламӡаҵәҟьоу?..
Ас, Аԥснызегь рыбганы,
Аԥсуара наҳԥырҵны ицаҵәҟьоу?..

ЗЕГЬ АКОУП, ИБҴӘАХУЕИТ!..
Зегь акоуп, ибҵәахуеит, зегь акоуп, ибҵәахуеит,
Зегь акоуп, бзиа сшыббо бҵәахуеит!..

Исыбмырбарц ибӡауеит, исыбмырбарц
ибӡауеит,
Аха быблақәа мчыла ирҳәауеит!..
Мшәан, бзыцәшәозеи бара, шьҭа
ибымгаҵәҟьои сыгәра,
Нас уи сықәрагьы хьаас ибымкын!..
Са саҿуп шьҭа абылра, ба баҿуп шьҭа аӡыҭра,
Ус зынӡаҵәҟьа, зынӡа бымгәыкын!..
Уажәшьҭа ааԥынра цеит, уажәшьҭа
аԥхынрагь цеит,
Ҭагалангьы иаҭахымкәа ауп ишцаз!..
Аӡын ҵаа иканарҷҷеит, ус анбасҳәа быччеит,
Уи аҵх дуқәа руак ҳмыршауаз!..
Аха бысԥырҵуеит бара, зны
быԥсҭҳәоушәа бӡыҭуеит,
Зны бымроушәа баакылҟьоит схахьы!..
Са исызгом схы агәра, аха бзеиԥшу сыӡбауеит:
Аӡмыжьахьтә иааԥшуа ахьы!..
Ус баацәырҵуеит бара, бцоу, баҿу аԥырра,
Цқьа исзеилыргом, бнеиуеит быҭҟьа…
Уи бшьапышьҭыбжь згәы иқәҩуа,
цәашьас имои ара,
Аҟамчеиԥш, ақаҭран инахҟьа!..

***
Ҳбызшәагьы ыӡӡом, ҳаргьы ҳаӡӡом,
Анцәа иаҳҟәырхуп ҳара аԥсра!..
Знык ҳандәықәла ахаангьы ҳхьаҵӡом,
Аҵарауаҩ, ибзақәмыршәеит убра!..

Ҳашьха дуқәа ихьчо иаҳзааргаз,
Амшынгьы иазымыӡәӡәеит ара…
Ҳбызшәа ԥсуам… Иаабоит ишхьаабгаз,
Аҵарауаҩ, ибзақәмыршәеит убра!..
Уи заҭәазымшьо аӡә дҟалозар,
Ма изҭахым зынӡа аҵара…
Урҭ ҳазрыҳәои, ицааит ицозар,
Аҵарауаҩ, ибзақәмыршәеит убра!..
Есымша иҳәатәым уи шшәарҭоу даара,
Иҳамгоушәа уаҳа ҳа ҳхы агәра...
Иаабоит ӷба дуӡӡак еиԥш ацәаара,
Ҳбызшәа ҵааҟәрылаӡом ара!..
***
Иҟан иашак, ҳабла зыдхалоз,
Ҳгәы хыҭхыҭуан иара аабаанӡа…
Уи аҳракыраҿ знык изхалоз,
Хьаҵшьа имамызт дыблаанӡа…
Иҟан иашак, ҩысшьа змамыз,
Уажә уи аҭыԥан ҽак рхәыцит…
Шьҭа изҭахыда, иагьмаӡамыз,
Уаамҭа цеит ҳәа инаԥырҵит!..
Иҟан иашак, амц ааскьаанӡа,
Аха ҳаахьаԥшаанӡа иацәхалеит!..
Аҳәыҳә рыцҳаиԥш, иахьаз абаанӡа,
Аҭра иныхцаны, иныхтәалеит…
***
Ус, бареи сареи ҳабжьара,
Ибжьаршәуп иумбо цҳа хәыҷык…

Зных уи ҳақәнаҟьоит ҳшьара,
Зных иҳаланаҵоит мчык…
Ҳҩыџьагь ҳауп уи шыҟоу здыруа,
Иарбан ҿышәҭоу иара ахьху,
Уи амаакырагьы цырцыруа,
Излыху сеидру, мамзаргь хьу!..
Аха ҳзықәымлеит, иаҳзымгәаӷьт,
Ус нырцә-аарцәынтә ҳаиҿаԥшуеит…
Аӡ хышхыҵәа наҟ ахықәахьтә,
Ӡызлан лыччабжь ҳаҳауеит!..

***
Адунеи ду зырхыџхыџуа,
Цқьа иззымдыруа ацәа иҭаӡо,
Аӡәгьы даныҟам уи дзызхәыцуа,
Еиҳа ианырацәоу дзыргаӡо,
Ашәарҭа аныҟоу амца акырҳәа,
Ааигәа данумбо еиқәзырхо,
Шьоук аныччо аҟырҟырҳәа,
Ара амаалықьцәа анҭахо,
Џьара иҟоуп гәыӷрак аарла,
Рахәыц хәҷык адунеи зку…
Ианааҵыс-ҵысуа уи уаршәарла,
Нас убри акәхап аҟәышра зқәу…
Ах, уи амцхә идмырҵысуандаз,
Ишшәарҭоу рдыруандаз дара…
Ах, уи цқьаҵәҟьа агәра ргауандаз,
Ируамызт ргәы рҭынчны атәара…

Адунеи ҵлаҵас иандырхыџхыџуа,
Ара акызаҵәык са сзыцәшәо,
Рхада уаҳа акы мхәыцуа,
Иахьреигәырӷьо ауп уи зрышәшәо!..
***
Ҳаҟәыҵп, шьҭа ҳгәалақәа уаҳа иҳамҳәап,
Уаҩ илаԥш иахьамбо иҵәахызааит…
Ҳанырымбо ҳҩызцәагь ҳаӡбахә дрыххап,
Ҳанырбо еиҳа ҳарҭахызааит!..
Издыруеит, мышкызны ҳҩыџьагь ҳаиқәшәоит,
Аамҭа иҳацәцоу ауп сзыхӡыӡо…
Ах, уи сыгә рыцҳа, ахәыҷ иеиԥш ибыцәшәоит,
Банамбо игәырҩоит ацәа иҭаӡыӡо…
Аамҭала иаҳҵәахыргьы, ма иаҳӡаргьы зынӡа,
Уи шхәыҵкәраауа здыруеит аҽырҿыцны…
Сшархаго, ишыгәхьаазго, ба ибасҳәоит имӡа,
Мышкызны ма избароуп уи ԥхыӡны!..

***
Зны бхәыҷуп, зны даара бзажәуп,
Зны бажәа кырӡа ибраӡоит…
Нахьхьииӡа сгәаҵаҿ бсахьа ҭаршәуп,
Сшәоит…Иаацәырызгар ирӡоит!..
Зны изгәаӷьуеит, зегьы-зегь басҳәоит,
Баргьы бысԥырҟьаны бцауеит…
Зных са сыбыз мчыла иҿасҳәоит,
Идырҟәыдуа ауасеиԥш исшьаҳауеит!..
Сгәы иҭоу бдыруеит егьа исҵәахыргьы,
Маӡа-аргама уи сҳәалоит…

Идыр, мышкызны са сыԥсыргьы,
Ибызмырцәаз мцан бгәаҿы сбыллоит!..
***
Уа угәаҟра хьаас измада ара,
Хи-ԥси роуп араҟа иҟоу…
Уа ужәлар рхьаа, ргәырҩара,
Иабарҭаху, убызшәа ушазыҟоу?..
Абас иабанӡацои дара,
Ирымаӡамкәа, акы изхьынҳало?..
Ма шәахҵас иалаӡуеит убра,
Ма инахәлабгоит амшын иахьалоу…
***
Урҭ урмазҵаан аказы,
Урҭ уаа гәаҩақәоуп, иудыруаз!..
Уара уангылоз шарԥазы,
Хьаасгьы иркым, узыруазыруаз…
Абнаршәыраҿгьы иумбои,
Аҵла гәаҩақәа рацәазаап…
Аха урывсны умцои,
Маҭәахәыс, зынӡа ихәарҭамзаап!..
Аха ишәарҭоуп акы убра: –
Уа зны-зынла аурҭгьы асуеит…
Хланҵы ианҭалауа дара,
Ааигәа игылоу аҿа ирыцәхасуеит!..
***
Ах, сыгызмалхәыҷ, бзырччаз здыруеит,
Ацҳа ихысҵаз аӡы иабҭеит!

Аха ианаму, шьапыла сыруеит,
Бара уи шызгәаӷьуазгьы гәабҭеит!..
Ах, сыгызмалхәыҷ, ҽаӡә былаԥш иқәшәеит,
Са сахь ахьаԥшрагьы баҟәыҵит…
Иахьа исгәаԥхоз ажәакгьы бҿымшәеит,
Изакәу сеидру, даҽак бхәыцит…
Ах, сыгызмалхәыҷ, ихыбхит сыцҳа,
Аха аӡы сҭалауеит сбааӡаргьы!..
Бгәы зызхьаауаз, дынхаӡеитеи рыцҳа,
Ажәра бҽабҭоума, дмааӡаргьы?!
***
Аԥсадгьыл ахьаа араҟа згәы ҿкааны иаку,
Ицәгьоума, ибзиоума, уи иахьуа зегь зыхьуа,
Иҟалалоит убри ауаҩгьы зны ибла аныхку,
Пату аниқәиҵацәо итәоу џьара зыҽрыхьуа…
Уи дыӷәӷәоуп, дышҩашьоу иарагь иблала ибоит,
Аха амҩа ииҭоит, рацәак хара имхәыцуа…
Амала, дыззеилымкааз, дышнеиуа ицҳа ҭабгоит,
Ауаҩ ҟәыш, аҩны дахьтәоугьы идыруеит
уи дзеиԥхыӡуа!..
***
Уимбазшәа ҟаиҵоит, угәра игазшәа ҟаиҵоит,
Уиртәазшәа ҟаиҵоит, иреиӷьу ҭыԥкаҿ…
Иугәаԥхазшәа ҟауҵоит, уҽумрыххазшәа
ҟауҵоит,
Иухәҭаӡазшәа ҟауҵоит, уахьтәоу ухы укәаҽ…
Аха иузымдырт уара, уи узнеигаз убра,
Нас дааигеит уцымхәра:»Уҭыԥ узымбеит!»

Убра иугеит ухы агәра, убра уацәыбналт атәра,
Убра уииааит уара, аҩсҭаа уҽиумҭеит!..
***
Ба сбыргәырӷьон уаанӡа, ба бысҿаччон ихааӡа,
Нас ҽазныкгьы игәаӷьы, иҟалозар…
Са исҭахым иҭааӡа, сара сҟын ианааӡа,
Бара быччаԥшь, ацәашьеиԥш имыԥхозар…
Са сзықәгылоу сшьам, ибдыруеит ус исҟазшьам,
Аха иҳәа, бмыԥхашьан, сыбгәаԥхозар,
Убриак азыҳәан, сиуеит, убриак азыҳәан,
сыҩуеит,
Убриак азыҳәан, исҭиуеит, иҭитәхозар!!!
АԤСУА
Зегь ухьаауп уара, зегь угәалоуп уара,
Аԥырԥырҳәа есымша убылуеит…
Шьоук ухыччоит ара, уагьатәарбом дара,
Малла иҩычоу рыгәра ргауеит…
Аха ашәарҭара анааигәахо аӡәгьы дубом,
Урҭ ыҟаӡамшәа ишәаҟьоит…
Уара иушьҭоу ахыкәалаа усҟангьы уазгом,
Ихьыдышьшьны адгьыл ианҟьоит…
Нас дарбану араҟа иаԥшәыман инхо,
Уи азҵаара абаҭаху, иӡбоуп!..
Асаранџь еиԥш иԥшӡо ҳаԥсадгьыл еиқәзырхо,
Зегь раԥхьа иааҭҟьо, уа уоуп!..

***
Уи деилыскаахьаз џьысшьон,
Сгәы сырҭынчхьан сара стәала…
Аха башан, сгәы сажьон,
Сшьара сықәиҟьон ажәала…
Уажәшьҭа ахықәаҟны санааи
Ауп, дзакәыҵәҟьаз аныздырыз…
Иаргьы дгәырӷьан, данысиааи
Зынӡа ихашҭт иҽы шкәадырыз!..
Дҽыжәлан, иаԥхьаҟа дызцом,
Арахь ишьҭахьҟагьы ҿҟьарроуп…
Излеигои агәнаҳа дызҵоу,
Аха дзаангылом, дыҭҟьароуп!..
Башоуп… Уаҳа дызцаӡом,
Уа дадырсызшәа дынхазаап…
Гәнаҳак шьҭыхны изгаӡом,
Дунеи дук аҟра ихьанҭахазаап!..

***
Иазхоуп аӡӷаб, шьҭа баҟәыҵ аҽырбара,
Бара ибеиӷьасшьо аӡәгьы дсымаӡам сара!
Амшын хықәгьы ба баныҟам иҭацәуп,
Измаанои нас, са банысымбо сзаҵәуп!..
Сҩызцәа бзиақәа исылырхуеит алаф,
Урҭ срызгәааӡом, урҭ ирымоуп уаха қьаф!..
Са схахьызгараҵәҟьа сзымдыруа схәаҽуеит,
Уи бызгәамҭоушәа бахьгылоу быччауеит!..
Уажә гәаныла уахьынтә ҿысҭуеит: «Иазырха,
Бара быччаԥшь, са исыцралеит имцаха!»

Аха дгәабҭан, былаԥш идхалт аҽаӡәы,
Издыруада, шәеиҭеиқәшәозар шәара уаҵәы?!
Ах, убриҵәҟьа, са ишысзымчҳауа агәра га,
Даасԥыхьашәар, уи аҷкәын дақәшәоит иқәнага!
Аԥша хага сахәыҭхәыҭуеит: «Иаачҳала,
Уи иуалҳәо сара сҟынӡа иаацҳала!»
«Шәара ишәзеилои?!» – сҳәеит гәаныла
сааибакын,
Аԥырԥырҳәа исызмырцәаӡо амца скын!..
Аха избаҵәҟьоит, цқьа ишазымхо уажә сылша,
Са инасԥырҵны, ишиашо иҭалоит ба бхы аԥша!..
***
Иабаҟоу рҳәаақәа, амци аиашеи еилаԥаҭеит,
Шьҭа еилҳаргароуп, иҳәан ԥхьагылак
даагәаҭеит…
Аха ассир, абламбараҵәҟьа уа иаабеит,
Амц анҩнала, бзеила уаабеит, иҳәан, даатәеит!..
***
Аӡәгьы даныҟаӡам зынӡа,
Схала аусураҿ сыштәоу,
Уи дааҩналахуеит маӡа,
Избоит амцагьы шлыцроу!..
Акгьы сбыхәауам сара,