Яна Вакыт, Безне Яндырып...

  Адымнарны сагайта.
  Хатирәләр яңарта.
  Әйтер сүзне сайлата.
  
  Йокысызлык офыгында
  Шәфкать аша таң ата.
  
  ***
  
  Үткәнне сорама.
  Сиңа да киләчәк...
  Җавап урынына
  бирием бер чәчәк.
  
  Күпме су сипсәң дә,
  ул да бер корыр.
  ...Кемнеңдер бер җыры
  гомерләргә тора.
  
  ***
  
  Y3 вакыты җиткәч, имән ава,
  йолдыз арып сүнә, рух какшый...
  Нихәл итмәк кирәк: кемдер чынлап
  Яшәештә мәңге калмакчы!
  
  Була кайчак: Дөньяны баскан
  Явызлыкны җиңә бер Яхшы.
  
  ***
  
  Талантъи да, буй-сынын да
  Җәлләмичә, ишеп биргән.
  Ефәктән түгел, каештан
  Язмышын да чигеп биргән.
  
  ...Бәхет дигән кульяулыктан
  бер чеметем кисеп биргән.
  
  ***
  
  Шагыйрьләр алар картаймый.
  Шагыйрьләр ара гына.
  Вакыт иңсәсенә басып
  ял итеп ала гына...
  
  Туксанда да ялганның ул
  суга ала яңагына.
  Шагыйрьләр пыскый алмыйлар,
  Шагыйрьләр яна гына!
  
  ***
  
  ...Кыз сынын ясады бер оста.
  Ә кыз эчтән көлде, масайды.
  «Җан өрсәң дә, оста, син ташка,
  таш таш инде, тере мин — башка!»
  
  ...Акты гомер. Оста күптән юк...
  Ә таш сын шул: көләч, яшь һаман!
  Бөкре карчык килә янына:
  яшьлегенә — сынга — яшь тама...