Hörriyät hakında

Kayda kitte tsenzurlık, Kollık, tarlık, kim-hurlık? Artka karasak borlıp, Yırak anlar kaldıya. Tigez buldı zakonda Tatar, urıs, yapon da; Ak alyapkıç, zipun da Tam[1] azatlık aldıya. Barça tsenzur yabılgaç, Därtkä därman tabılgaç, Kızıl kara yasagan Kyarhanälär[2] böldiyä. Küp yäş yegetlär ülde, Mäyetlär dönya tuldı, Namnare bakıy buldı Ta kıyamät tidiyä. Şäkert, student — barı, Darga asılgannarı, — Sez bu arıslannarı Onıtmagız tidiyä. Kızganmadı malların, Korban kıyldı cannarın, Can birgändä, şatlanıp, Kölä-kölä üldiyä. İnde kitte elgäre Zıncırlangan[3] telläre, Millätneñ bılbılları Sayrap-sayrap tordıya. Kitte häsrät, älämnär[4], İrkenläde qalämnär; Bulsın küp-küp sälamnär Ruhlarına tidiyä. Mämnün bulsın[5] ruhları, İzge bulsın duhları; Bolarnıñ ah-uhları Hörriyätne birdiyä. _________________ [1]Tam — tulı. [2]Kyarhanä — masterskaya, zavod-fabrika. [3]Zıncırlangan — çılbırlangan. [4]Äläm — açınu. [5]Mämnün bulu — şatlanu.