Шигырьләр - Разиль Валиев - 22

Ничек түзәрмен?

Кар кызы
Рәшит Абдуллин музыкасы
Ява карлар, ява талгын гына, —
Ак өметләр ява сыман.
Эзләп йөрим бүген бәхетемне
Ак бураннар арасыннан.
Кушымта:
Әй, Кар кызы, әйтмә салкын сүзләр,
Буран булып чыкма юлларыма.
Алып бар син мине үзең белән
Гел язлардан торган елларыма.
Ява карлар, ява. Ак ялкыннар
Күңелемне ала сыман...
Ак бәхетләр теләп, иңнәреңә
Туй күлмәге сала сыман.
Кушымта.
Ява карлар, ява кайнар карлар,
Ява йөрәк ярасына.
Мәхәббәтем бүген табармын күк
Кайнар карлар арасыннан.
Кушымта:
Әй, Кар кызы, әйтмә салкын сүзләр,
Буран булып чыкма юлларыма.
Алып бар син мине үзең белән
Гел язлардан торган елларыма.

Зинһар өчен, кермә төшләремә...
Резедә Әхиярова музыкасы
Зинһар өчен, кермә төшләремә...
Мин бит сине күптән оныттым,
Җәй җилләре күптән агарттылар,
Тараттылар сагыш болытын.
Зинһар өчен, кермә төшләремә...
Уянам да никтер боегам.
Әйтерсең лә, су алмакчы булам
Күптән кипкән сусыз коедан.
Зинһар өчен, кермә төшләремә...
Таң атуга төшләр өзелә.
Көннәремне, елларымны алдың,
Төннәремне калдыр үземә.
Зинһар өчен, кермә төшләремә...
Үртәмәче, көлмә ерактан.
Сине түгел, мин бит яшьлегемне
Шулай сагынам, шулай яратам.
Зинһар өчен, кермә төшләремә...
Минем хәлгә кемнәр төшенә? —
Сөям хәзер бары хыялымда,
Яшим хәзер бары төшемдә.

Ташлык авылы җыры
Алмаз Хәмзин музыкасы
Урманнарга барган идем.
Каршы алды имәннәр.
Урман кебек шаулап яши
Туган ягын сөйгәннәр.
Кушымта:
Туган аулым Ташлык —
Минем җаныма башлык.
Ташлап китмәм ташкалага,
Мин бит Ташлыкка гашыйк.
Зәй буена төшкән идем
Колач җәеп йөзәргә,
Безнең яктан матур җир юк, —
Ышан минем сүзләргә.
Кушымта.
Кайнар тауга менгән идем,
Аякларны пешерә.
Җаннары таш булмаганнар
Безне искә төшерә.
Кушымта:
Туган аулым Ташлык —
Минем җаныма башлык.
Ташлап китмәм ташкалага,
Мин бит Ташлыкка гашыйк.

Акбүз ат
Рәшит Кәлимуллин музыкасы
Туй күлмәге кигән таллар,
Бизәнгән урамнары.
Кочагына алды безне
Мәхәббәт бураннары.
Кушымта:
Акбүз ат, акбүз ат, акбүз ат, акбүз ат...
Кыш аеның аклыгын ал,
Салкынын язга озат.
Ак канатлы акбүз атны
Гашыйклар көтте озак.
Ак бәхетләр юрый-юрый
Кышлар безгә ашыккан.
Ак юллардан үтә бүген
Җирдә бөтен гашыйклар.
Кушымта:
Акбүз ат, акбүз ат, акбүз ат, акбүз ат...
Кыш аеның аклыгын ал,
Салкынын язга озат.
Ак канатлы акбүз атны
Гашыйклар көтте озак.

Җитеннәр
Фасил Әхмәт музыкасы
Гел кояштан торган юллар безне
Офыкларга таба илттеләр.
Гел бәхеттән,
Гел бәхеттән торган сүзләремне
Ишеттеләр,
Ишеттеләр бары җитеннәр,
Ишеттеләр бары зәңгәр күзле җитеннәр.
Син югалдың офык томанында,
Гел сагышлы көннәр җиттеләр.
Хәзер инде,
Хәзер инде тәүге мәхәббәттән —
Хыялымда,
Хыялымда бары җитеннәр.
Хыялымда калды зәңгәр күзле җитеннәр.
Эзләп йөрдем җитен чәчәкләрен,
Эзләп йөрдем җирнең читеннән.
Көтмәгәндә,
Көтмәгәндә үзе очрады ул, —
Чәчләренә,
Чәчләренә кадәр җитеннән.
Чәчләре дә хыялдагы ап-ак җитеннән.

Урман чишмәсе
Шамил Тимербулатов музыкасы
Урман юлында чыктың каршыма,
Такыя үреп кидең башыңа.
Кара урманда көндез адаштым,
Калды урманда моңлы карашым.
Кушымта:
Челтер-челтер ага урман чишмәсе.
Челтер-челтер суга ятлар төшмәсен.
Челтер-челтер килә синең сүзләрең лә...
Челтер-челтер көлә гүзәлем, гүзәлем, гүзәлем лә.
Зифа каендай синең буйларың.
Карадым сиңа, карап туймадым.
Чишмә суыдай акты чәчләрең,
Чишмә суыдай җанга чәчрәдең.
Кушымта.
Урман яктырды, безне күрүгә.
Чакырдың мине урман түренә.
Урман чишмәсе, сиңа мең рәхмәт!
Чишмәдәй чиста безнең мәхәббәт.
Кушымта:
Челтер-челтер ага урман чишмәсе.
Челтер-челтер суга ятлар төшмәсен.
Челтер-челтер килә синең сүзләрең лә...
Челтер-челтер көлә гүзәлем, гүзәлем, гүзәлем лә.

Ак пароход
Сәгыйт Абдуллин музыкасы
Идел буйлап ак пароход килә.
Иркәм, миңа ак бәхетләр телә.
Ак пароход ялгызларны табыштыра,
Ак пароход йөрәкләрне кавыштыра.
Шатлык төяп ак пароход килә.
Бөтен дөнья бүген уйный-көлә.
Ак пароход сагышларны тараттыра,
Ак пароход мәңгелеккә яраттыра.
Талгын гына ак пароход килә.
Акчарлаклар җырлый безнең көйгә.
Ак пароход дәшә ерак ил гизәргә.
Ак пароход алып бара диңгезләргә.
Дулкын ярып ак пароход килә.
Серләреңне дулкыннарга сөйлә.
Ак пароход ак хыяллар бүләк итә,
Ак пароход ак бәхеткә алып китә.

Ай батканда, таң атканда
Рәшит Абдуллин музыкасы
Ай батканда, таң атканда
Уздым җырлап урамнардан.
Ай батканда, таң атканда
Кемнәр язмыш юрамаган?!
Кушымта:
Бара идек таңда урманнарга,
Кошлар моңын бергә тыңларга.
Синең өчен былбыл сайрый анда,
Минем өчен кәккүк моңлана.
Ай батканда, таң атканда
Кайтып киләм туйларыңнан.
Төн карасы, җан ярасы
Китми минем уйларымнан.
Кушымта.
Ай батканда, таң атканда
Җырлыйм да күк, җылыйм да күк.
Мең шатлыклар телим сиңа...
Туктамыйча сана, кәккүк!
Кушымта:
Бара идек таңда урманнарга,
Кошлар моңын бергә тыңларга.
Синең өчен былбыл сайрый анда,
Минем өчен кәккүк моңлана.

Бишек җыры
Шамил Тимербулатов музыкасы
Әлли-бәлли: йом син күзең,
Әлли-бәлли — татлы сүзем.
Йоклый инде бөтен бәбиләр дә,
Йоклый инде хәтта әбиләр дә.
Әлли-бәлли, йом син күзең,
Әлли-бәлли, татлы сүзем.
Әлли-бәлли итәр балам,
Әлли-бәлли, алтын алмам.
Йоклый инде бөтен малайлар да,
Йоклый инде хәтта бабайлар да.
Әлли-бәлли итәр балам,
Әлли-бәлли, алтын алмам.
Әлли-бәлли, йоклап китәр,
Әлли-бәлли, үсеп җитәр.
Йоклый җиһан бәллүр бишегендә,
Йоклый алмый әни кеше генә.
Әлли-бәлли, йом син күзең,
Әлли-бәлли... Бетте сүзем.

Җырлыйк әле
Рәшит Абдуллин музыкасы
Дулкыннары белән Идел
Кагылды җанга.
Мин мәңгегә монда, диде,
Агалмам анда.
Кушымта:
Туган якның бар моңнары
Безнең күңелдә.
Җырлыйк әле, җырлыйк мәңге,
Җырлыйк бүген дә!
Сөембикә манарасын
Дәштек без юлга.
Ләкин безнең белән юлга
Чыкмады ул да.
Кушымта.
Чакырдык без шомыртларны,
Миләш, баланны.
Тик алар да безнең белән
Килә алмады.
Кушымта:
Туган якның бар моңнары
Безнең күңелдә.
Җырлыйк әле, җырлыйк мәңге,
Җырлыйк бүген дә!

"Татарстан" поезды
Рәшит Абдуллин музыкасы
Саубуллашып кул болгадым,
Янды йөрәк ярасы.
Сагышларны оныттырды
Казан — Мәскәү арасы.
Кушымта:
Дөнья буйлап, сине уйлап
Инде күпме юл уздым.
Бәхетемә илтә кебек
"Татарстан" поезды.
Төн шикелле моңсу иде
Күзләреңнең карасы.
Табыштырды, кавыштырды
Мәскәү — Казан арасы.
Кушымта.
Поезд кебек үтә гомер...
Күпме калды барасы?
Җыр шикелле кыска икән
Мәскәү — Казан арасы.
Кушымта:
Дөнья буйлап, сине уйлап
Инде күпме юл уздым.
Бәхетемә илтә кебек
"Татарстан" поезды.

Кайларда бәхетле илләр?
Луиза Батыр-Болгари музыкасы
Ник чыга кояш,
Ник ата таңнар,
Нигә сагышлы
Хыялый җаннар?
Ник ява яңгыр,
Ник исә җилләр?
Кайларда икән
Бәхетле илләр,
Кайларда бәхетле илләр?
Ник үсә гөлләр,
Ник шаулый урман,
Минем хыялның тамыры корган.
Ник яши кеше,
Ник дәшми илем?
Мин бу дөньяга
Нигә дип килдем?
Мин бу дөньяга нигә килдем?

Моңланма
Рәшит Абдуллин музыкасы
Моңланма, җаным, моңланма,
Авыр миңа болай да.
Синең янга килгән саен
Моң өстәлә моңнарга.
Зарланма, җаным, зарланма,
Гүя минем зарым юк.
Зарым да син, парым да син, —
Минем башка ярым юк.
Көнләшмә, җаным, көнләшмә,
Инде бик күп көнләдең...
Синең белән уртак инде
Көннәрем һәм төннәрем.
Елама, җаным, елама,
Нигә юкка еларга?
Яңгыр түгел, бәхет яусын
Без барасы юлларга.

Әлифба
Рәшит Абдуллин музыкасы
Әлифбам — тормышта
Беренче баскычым:
Син — белем дөньясын
Ачучы ачкычым.
Кушымта:
Әлифба, Әлифба,
Син минем юл башым.
Дәфтәргә төшердең
Күктәге кояшым.
Өйрәттең син мине
Хәрефләр тезәргә.
Тылсымлы хәрефләр
Әйләнде сүзләргә.
Кушымта.
Каләмем йөгерә
Мин бер сүз әйтүгә.
Дәфтәрдә бар хәзер
Әни дә, әти дә.
Кушымта.
Өйрәттең син миңа
Ватанны сөяргә
Рөхсәт ит, зур рәхмәт,
Мең рәхмәт! — дияргә.
Кушымта:
Әлифба, Әлифба,
Син минем юл башым.
Дәфтәргә төшердең
Күктәге кояшым.

Сау бул, җәй
Әнвәр Бакиров музыкасы
Сау бул, җәй!
Хушыгыз, елгалар!
Хушыгыз, болыннар, кырларым!
Мин сездә туйганчы уйнадым,
Иң матур җырларны җырладым.
Сау бул, җәй!
Хушыгыз, урманнар,
Күкләргә үрләгән учаклар!
Учаклар шикелле яктырып
Хәтердә сакланыр ул чаклар.
Сау бул, җәй!
Хушыгыз, юлларым!
Юллардан инде күп атладым.
Күрдем күп илләрне, җирләрне,
Батырлар исемен ятладым.
Сау бул, җәй!
Чакыра мәктәбем.
Алтыннан — сентябрь юллары.
Барасы юлларым — бик ерак,
Хыялым кояшы — югары.

Сират күпере
Шамил Тимербулатов музыкасы
Син һаман көләсең,
Җанымны теләсең...
Ә минем күңелем моңлана.
Мәхәббәт янәшә,
Йөрәккә ул дәшә,
Читләрне, ятларны тыңлама.
Кушымта:
Ялгыз җырлар җырлый-җырлый
Инде күп йөрдем.
Әйдә, китик, бергә үтик
Сират күперен!
Әйдә, китик, бергә үтик
Гомер юлларын,
Икәү бергә җырлыйк, әйдә,
Сөю җырларын.
Син — сылу су кызы,
Мин — гади җир улы,
Тик гади түгел шул мәхәббәт.
Таратты сагышны,
Йөрәкләр кавышты...
Җанымда — мең ләззәт, мең рәхәт.
Кушымта:
Ялгыз җырлар җырлый-җырлый
Инде күп йөрдем.
Әйдә, китик, бергә үтик
Сират күперен!
Әйдә, китик, бергә үтик
Гомер юлларын,
Икәү бергә җырлыйк, әйдә,
Сөю җырларын.

Безнең җыр
Илгиз Закиров музыкасы
Һавада каурый болытлар
Аккош каурые сыман.
Безнең җырга туган якның
Бар матурлыгы сыйган.
Кушымта:
Язларны ләйсән китерә,
Ләйсән — кояшлы яңгыр.
Безнең җырлар күңелләргә
Ләйсән яңгырдай явар.
Елгада — шәһәр шәүләсе
Йөзә аккошлар сыман.
Безнең җырга туган якның
Бар сөенече сыйган.
Кушымта.
Офыкта — шәһәр утлары,
Таң шуннан ата сыман.
Безнең җырга туган якның
Бар батырлыгы сыйган.
Кушымта:
Язларны ләйсән китерә,
Ләйсән — кояшлы яңгыр.
Безнең җырлар күңелләргә
Ләйсән яңгырдай явар.

Сәгать суга
Рәшит Абдуллин музыкасы
Әйдә, искә алыйк әле
Борынгы гадәтләрне...
Бер минутка тынып торыйк,
Онытып сәгатьләрне.
Без бит җирдә һәммәбез дә
Табигать сәнгатьләре...
Җир-анага саулык бирсен
Яңа ел сәгатьләре.
Иске елда калсын әле
Кайгының сәбәпләре.
Кавыштырсын гашыйкларны
Яңа ел сәгатьләре.
Ташып торсын туган илнең
Шатлык-сәгадәтләре...
Сәгать суга, сәгать суга, —
Яңа ел сәгатьләре.

Һай, дуслар
Татар халык көе
Елга ага, елга ага,
Ярлар озатып кала.
Бәхетен эзләп, елганың
Зәңгәр күзләре тала.
Кушымта:
Һай, дуслар!
Чит җирләрдә
Бәхет эзли
Елгалар, җилләр генә,
Елгалар, җилләр генә.
Җилләр исә, җилләр исә,
Җилләр исә шәрекъка.
Бәхетен таба алмыйча,
Җилнең гомере үтә.
Кушымта.
Бәхет эзләп талган картлар
Карый иленә таба...
Ир-егетләр үз бәхетен
Туган җирендә таба.
Кушымта:
Һай, дуслар!
Чит җирләрдә
Бәхет эзли
Елгалар, җилләр генә,
Елгалар, җилләр генә.

Көзге шатлык
(Вальс)
Илдус Якупов музыкасы
Әйләнә җирем яктыга,
Син дә бер очып әйлән!
Уйна, бие, җырлар җырла, —
Авылда бүген бәйрәм!
Түгәрәк ипи шикелле
Тулган Ай йөзә күктә.
Көз аенда дөнья — муллык,
Яшьләр кавышу көтә.
Кушымта:
Күз иярми игенченең
Аяк басуларына.
Җитезлеккә өйрәнгәндер
Иген басуларында.
Кояш төсле көләч йөзле,
Арып кайтса да эштән, —
Игенченең күңеленә
Кырлар шатлыгы күчкән.
Көз аенда кияү килә,
Йортларга төшә килен.
Игенчеләр арасыннан
Батырлар сайлый илем.
Кушымта:
Күз иярми биюченең
Аяк басуларына.
Батырлыкка өйрәнгәндер
Иген басуларында.

Соңгы чәчәк
Луиза Батыр-Болгари музыкасы
Мин килдем кояшлы дөньяга,
Мин җирнең иң соңгы чәчәге.
Күзләрдә иртәнге чык түгел,
Тапталган мәхәббәт яшьләре.
Мин көлмим кешеләр көлгәндә,
Еламыйм, кешеләр еласа...
Мин инде бәхеттән ваз кичтем,
Таңнарда җанымны моң баса.
Мин килдем кояшлы дөньяга,
Мин җирнең иң соңгы бер гөле.
Кем табар миңа бер җылы сүз?
Кем ачар сагышлы күңелне?

Син генә
Рәшит Абдуллин музыкасы
Үтә айлар, еллар,
Туа яңа җырлар.
Минем җырым һаман үзгәрми.
Кем соң минем иркәм?
Йөрәгемдә йөртәм
Аңа дигән сөю сүзләрен.
Кушымта:
Син генә ул ямьле язым,
Син генә ул моңлы сазым,
Син генә ул якты хыялым.
Син генә ул минем ярым.
Син генә ул минем парым,
Син генә, син генә...
Яшь гомерем үтә,
Багып зәңгәр күккә...
Күзләремдә якты төс уңды.
Көн дә карыйм Айга, —
Сөйгән ярым кайда?
Ишетәме минем җырымны?
Кушымта.
Ялгыз чыгам юлга,
Ялгыз микән ул да...
Ялгызлыкка күңел түзәрме?
Исемен дә белмим,
Үзен һаман эзлим
Һәм кабатлыйм бер үк сүзләрне.
Кушымта:
Син генә ул ямьле язым,
Син генә ул моңлы сазым,
Син генә ул якты хыялым.
Син генә ул минем ярым.
Син генә ул минем парым,
Син генә, син генә...

Елмайсын сабыйлар
Рәшит Абдуллин музыкасы
Агара, чалара әнием чәчләре...
Агармый тик кайгы карасы.
Мәйданда, мәйданда мәңгелек ут яна,
Ул — минем йөрәгем ярасы.
Кушымта:
Сабыйлар, сабыйлар елмайган чагында,
Кайгының юллары ябыла.
Кешеләр, кешеләр кайгысын таратып,
Елмайсын сабыйлар тагын да!
Мин беләм, мин беләм: бары тик бер адым
Кайгылар, бәхетләр арасы.
Менә шул, менә шул мәңгелек арада
Сулкылдый йөрәгем ярасы.
Кушымта.
Бәхетләр, бәхетләр ягына юл тотып,
Безгә бит әле күп барасы.
Сабыйлар, сабыйлар елмайса дөньяда,
Төзәлер йөрәгем ярасы.
Кушымта:
Сабыйлар, сабыйлар елмайган чагында,
Кайгының юллары ябыла.
Кешеләр, кешеләр кайгысын таратып,
Елмайсын сабыйлар тагын да!

Язгы наз
Шамил Тимербулатов музыкасы
Янган йөрәк, ярсу күңел
Ашкына язга.
Язлар килә җиргә бик азга.
Кояш төсле син дә мине
Иркәлә, назла.
Сөю назы була тик язда.
Илдә яз, җирдә яз,
Бар дөньяда яз,
Дәртле яз, назлы яз.
Очар идем бүген йолдызга кадәр,
"Сөям" диеп әйтсәң син әгәр.
Туган җиргә, туган илгә
Тагын язлар килә.
Минем белән бергә җырлый дөнья,
Минем белән бергә көлә.
Яңгыр ява, ләйсән яңгыр,
Шатлыклар ява.
Хисләр ташый, йөрәк ут яна.
Ашкын җаннар мәхәббәтен
Язларда таба.
Шуңа, ахры, гашыйк мин язга.

Саумы, Казан!
Рәшит Кәлимуллин музыкасы
Туган калам син!
Казан, сиңа мин гел табындым.
Чакырганда син
Кош булып канат, әй, кагындым.
Сагындым мин гел,
Ашкындым сиңа, и Казаным!
Җаным синдә гел,
Синдә — юл башым, юл азагым.
Кушымта:
Саумы, Казан,
Саумы, Казан!
Туган калам!
Саумы, Казан!
Синдә минем
Җаным калган.
Без мәңге бергә, Казан!
Синең ташыңа язмышым язам.
Туган калам син!
Сиңа илтсеннәр бар юлларым.
Уйлап сине гел
Җир йөзен күпме, әй, урадым.
Синдә — якын дус,
Синдәдер минем чын язларым.
Синдә — сөйгән яр.
Бәхетем синдә, и Казаным!
Кушымта:
Саумы, Казан,
Саумы, Казан!
Туган калам!
Саумы, Казан!
Синдә минем
Җаным калган.
Без мәңге бергә, Казан!
Синең ташыңа язмышым язам.

Җыр чакыра
Котдус Хөснуллин музыкасы
Ничәнче ел илләр имин тора,
Ничәнче ел туплар ярылмый.
Туплар тынсын өчен утка керде,
Яуга керде Фәрит Яруллин.
Тургай булып күккә ашкан чакта,
Җир үзенә алды җыр улын.
Җиңү җырын җырлый бүген тургай, —
Җырлый, гүя, Фәрит Яруллин.
Афәт килсә илгә, мин тау булыйм!
Туфан килсә, биек яр булыйм!
Ватан өчен җанны кызганмаска
Өйрәтте бит Фәрит Яруллин.
Кая барсам, дуслар каршы алыр,
Бәхетләргә илтер бар юлым.
Җыр чакыра яңа җиңүләргә, —
Җыр башлаучы Фәрит Яруллин.

И машина, машина...
Луиза Батыр-Болгари музыкасы
И машина, машина,
Үсми агач башында.
Кемгә булыр машинам, дип,
Бабай, башың кашыма.
Кушымта:
И машина, машина,
Җитте минем башыма.
И машина, машина,
Чыктым юлның башына.
Машиналарга утырып,
Бәхет килә каршыма.
Кушымта:
И машина, машина,
Җитте минем башыма.
И машина, машина,
Минем янга ашыга.
Елыйм да мин, көләм дә мин,
Сөенәм дә мин шуңа.
Кушымта:
И машина, машина,
Җитте минем башыма.
И машина, машина,
Җитте минем башыма.
"Машинага кызыкма", — дип
Яздым кабер ташына.
Кушымта:
И машина, машина,
Җитте минем башыма.

Балачак ялкыны
Фасил Әхмәт музыкасы
Һәрвакыт уяумы, әзерме?
Чакыра балачак быргысы.
Безгә бит бу чорны төзисе,
Заманның җырларын җырлыйсы.
Кушымта:
Без уяу, без әзер,
Йөрәкләр һәрвакыт ялкынлы.
Җәлилләр, Алишлар ялкыны
Мәңгелек ут булып балкыды.
Әйләнеп карасаң үткәнгә,
Күренә янгыннар яктысы.
Безгә бит илләрне, җирләрне
Яманлык күзеннән саклыйсы.
Кушымта.
Бәхеткә юл ярып барганда,
Юлдаш бул һәрвакыт халкыңа!
Яшь калсын йөрәкләр мәңгегә,
Сүнмәсен балачак ялкыны!
Кушымта:
Без уяу, без әзер,
Йөрәкләр һәрвакыт ялкынлы.
Җәлилләр, Алишлар ялкыны
Мәңгелек ут булып балкыды.

Балачакны сагыну
Ренат Ибраһимов музыкасы
Балачак, әй, шат чак,
Гел сүнмәс учак.
Шушы учак ялкыны җанда
Мәңге, мәңге яначак.
Моңланам мин җыр җырлап,
Юанам сине уйлап.
Балачакка кайтып барам
Гомерем кыры буйлап.
Балачак, әй, шат чак,
Гел сулмас чәчәк.
Чәчәк тотып, төшемә минем
Балачагым керәчәк.
Моңланам мин җыр җырлап,
Юанам сине уйлап.
Балачакка кайтып барам
Гомерем кыры буйлап.

Алма сатам, чия сатам...
Луиза Батыр-Болгари музыкасы
Алма сатам, алма сатам,
Алмасыз калма тагы.
Алма кебек ярлар белән
Каршылыйк әле таңны.
Хөрмә сатам, хөрмә сатам,
Хөрмәсез кала күрмә.
Хөрмә кебек чибәрләрнең
Урыны була түрдә.
Чия сатам, чия сатам,
Чиясез кермә өйгә.
Күңелләрем чияләнмәс
Җырласаң безнең көйгә.
Алма сатам, хөрмә сатам,
Хисләрем кушып сатам.
Минем өчен җанын биргән
Бер чибәрне яратам.

Дуслык учагы
Рәшит Абдуллин музыкасы
Дуслар белән учак яктык
Төнге елга ярында.
Төн дә якты була икән
Янда дуслар барында.
Кушымта:
Казан — Уфа, Уфа — Казан —
Дуслык учагы.
Учак кебек кайнар икән
Дуслар кочагы.
Таңга кадәр җырладык без
Төнге елга ярында.
Җырлар дәртле була икән
Янда дуслар барында.
Кушымта:
Казан — Уфа, Уфа — Казан —
Дуслык учагы.
Учак кебек кайнар икән
Дуслар кочагы.
Кошлар җырын җырладык без
Тып-тын елга ярында.
Һәркем былбыл була икән
Янда дуслар барында.
Кушымта:
Казан — Уфа, Уфа — Казан —
Дуслык учагы.
Учак кебек кайнар икән
Дуслар кочагы.

"Әйдә барыйк, кызлар карыйк"
музыкаль комедиясеннән җырлар
Луиза Батыр-Болгари музыкасы
Мин бер генә тапкыр яраттым
Синнән башка беркем кирәк түгел,
Син бит минем якты йолдызым.
Сине эзләп ничә утка кердем,
Сине эзләп күпме юл уздым.
Кушымта:
Кояш булып чыктың юлларыма,
Төннәремне куып тараттың.
Мин бер генә тапкыр тудым җиргә,
Мин бер генә тапкыр яраттым.
Йөрәгемне сузып кулларымда,
Бу дөньяны мең кат буйладым.
Чибәрләргә күзем төшкәндә дә,
Синдә иде минем уйларым.
Кушымта:
Кояш булып чыктың юлларыма,
Төннәремне куып тараттың.
Мин бер генә тапкыр тудым җиргә,
Мин бер генә тапкыр яраттым.

Туачак кызыма, улыма
Бәхетең мөлдерәп торганда,
Очраса мең бәхет юлыңда,
Онытма бәхетләр кирәген
Туачак кызыңа, улыңа.
Кушымта:
Гашыйклар күрдисәм юлымда,
Күңелем көнләшә, кызыга.
Бар булган байлыгым — хисләрем —
Туачак улыма, кызыма.
Аңласа әгәр ул җанымны,
Күтәреп йөртермен кулымда.
Җанымны урталай бүләрмен
Туачак кызыма, улыма.
Кушымта:
Гомернең иң матур мизгеле
Яр белән бергәләп узыла.
Ник яшим дөньяда, булмаса
Туачак улым да, кызым да.

Моңлану
Синең җырың — минем җырым иде,
Синең язмыш — минем язмышым.
Ул җырларны хәзер ялгыз җырлыйм...
Мин ялгыштым, ахры, мин ялгыштым.
Мин ялгыштым, ахры, ялгыштым.
Сине күрми торган чакларымда
Офыкларда иде карашым.
Көпә-көндез бүген кояш батты...
Мин адаштым, ахры, мин адаштым.
Мин адаштым, ахры, адаштым.
Ялгызларны бәхет читләп үтә...
Үз-үземне ничек юатыйм?
Сине түгел бүген, мәхәббәтне
Мин югалттым, ахры, мин югалттым,
Мин югалттым, ахры, югалттым.

Сана, кәккүк, сана таңнарымны
Айлы иде кичләр,
Якты иде көннәр.
Кемнәр назлый хәзер,
Сөя сине кемнәр?
Шатлык тулы иде
Безнең уртак таңнар.
Минем хәлне аңлар
Сагышлы җаннар.
Кушымта:
Сана, кәккүк, кәккүк, сана таңнарымны,
Сана, кәккүк, кәккүк, сана төннәремне.
Көннәремә салдың кәккүкләрнең моңын,
Кочагыңа алдың хәзер кемнәрне?
Уртак иде еллар,
Уртак иде айлар.
Минем йөрәк әле
Һаман ярсу, кайнар.
Уртак иде язлар,
Уртак иде көзләр.
Синнән башка йөрәк
Ничек соң түзәр?
Кушымта:
Сана, кәккүк, кәккүк, сана таңнарымны,
Сана, кәккүк, кәккүк, сана төннәремне.
Көннәремә салдың кәккүкләрнең моңын,
Кочагыңа алдың хәзер кемнәрне?

Яшьлегем канатында
(Вальс)
Язлар белән син килерсең төсле,
Мин язларга шундый ышанам.
Язлар җитсә, ташый мәхәббәтем,
Минем күңел язга охшаган.
Кушымта:
Очып килдем синең янга
Яшьлегем пар канатында,
Сагышларны таратырга,
Мәңгегә яратырга,
Мәңгегә яратырга.
Язлар үтәр, сүнмәс безнең хисләр,
Мин бит сиңа шундый ышанам.
Ялгыз җанда көз җилләре исә,
Ялгыз җаннар көзгә охшаган.
Кушымта:
Очып килдем синең янга
Яшьлегем пар канатында,
Сагышларны таратырга,
Мәңгегә яратырга,
Мәңгегә яратырга.

Кышкы учак
(Вальс)
Тагын бер ел иңләп узды
Язмышым урамнарын.
Кайгыларны адаштыра
Яңа ел бураннары.
Кушымта:
Ява карлар, яңа карлар,
Яңа елның кары ява.
Кар өстендә, учак булып,
Яшьлек елларым яна.
Тагын бер ел шаулап узды,
Туздырып ап-ак карны.
Ак кар булып, уйнап оча
Яңа ел шатлыклары.
Кушымта.
Тагын бер ел иңрәп узды,
Тик хәтер булып калды.
Аклык булып җанга иңә
Яңа ел болытлары.
Кушымта:
Ява карлар, яңа карлар,
Яңа елның кары ява.
Кар өстендә, учак булып,
Яшьлек елларым яна.

Хатлар көтәм авылдан
Җырлар оттым авылымда
Чишмәләр тавышыннан.
Кайда минем көмеш чишмәм,
Очрашып кавышырга?
Кушымта:
Таңнар атса, кичләр җитсә,
Чишмәләрне сагынам.
Сагышларым басылыр күк,
Хатлар килсә авылдан.
Кайда минем урманнарым,
Кайда соң болыннарым?
Нинди җилләр тарый икән
Талларның толымнарын?
Кушымта.
Ала алмыйм күзләремне
Авылым якларыннан.
Хатлар көтәм, сәлам көтәм
Бәхетле чакларымнан.
Кушымта:
Таңнар атса, кичләр җитсә,
Чишмәләрне сагынам.
Сагышларым басылыр күк,
Хатлар килсә авылдан.

Мәхәббәт дарулары
Янам инде, көям инде
Мәхәббәт учагында.
Нигә мине юатмыйсың
Тылсымлы кочагыңда?
Кушымта:
Ничек кенә басыйм икән
Йөрәгем януларын?
Кайдан гына табыйм икән
Мәхәббәт даруларын.
Сагышланам таңнар белән,
Моңаям кичләр белән.
Нигә мине терелтмисең
Тылсымлы хисләр белән?
Кушымта.
Ала алмыйм күзләремне
Кояшлы күзләреңнән.
Нигә мине назламыйсың
Тылсымлы сүзләр белән?
Кушымта:
Ничек кенә басыйм икән
Йөрәгем януларын?
Кайдан гына табыйм икән
Мәхәббәт даруларын.

Бәхетем ачкычы
(Миләүшә һәм Рамил җыры)
Ашкына йөрәгем,
Юлларның юк очы,
Кемнәрнең кулында
Бәхетем ачкычы?
Кушымта:
Кем мине назлады,
Кем сөйде, кем кочты?
Кемнәрнең кулында
Мәхәббәт ачкычы?
Хисләрем ник ташты,
Йөрәгем кем ачты,
Кемнәрнең кулында
Бәхетем ачкычы?
Кушымта:
Кем мине назлады,
Кем сөйде, кем кочты?
Кемнәрнең кулында
Мәхәббәт ачкычы?

Буранлы көннәрдә адаштым
Ялгызым урамнар урадым,
Ятларга серләрем сөйләдем.
Күңелем хис тулы булса да
Мин әле беркемне сөймәдем.
Кушымта:
Буранлы төннәрдә адашып,
Ялгызым урамнар урадым.
Әгәр мин моңайган кешене очратсам,
Сөйгәнем килә, дип, уйладым.
Мин һаман ышанам язмышка,
Син миңа барыбер очрарсың,
Син минем канатка пар булып,
Мәхәббәт иленә очарсың.
Кушымта:
Буранлы төннәрдә адашып,
Ялгызым урамнар урадым.
Әгәр мин моңайган кешене очратсам,
Сөйгәнем килә, дип, уйладым.

Карт өянке
Шамил Тимербулатов музыкасы
Уза гомер, ага сулар,
Яр буенда карт өянке.
Өянкедә сайрый кошлар,
Сайрый өзеп, аһ, йөрәкне.
Кушымта:
Чая инеш читкә агар,
Карт өянке ялгыз янар...
Карт өянке күзләреннән,
Инеш булып, яшьләр тамар.
Яр буенда карт өянке.
Ботакларын җил каерган.
Карт өянке төпләрендә,
Сине уйлап, мин кайгырам.
Кушымта.
Җирдә ялгыз яшәп булмый,
Инеш кибә, тал да корый.
Кайт син миңа, яшьлек ярым,
Инеш кебек урый-урый.
Кушымта:
Чая инеш читкә агар,
Карт өянке ялгыз янар...
Карт өянке күзләреннән,
Инеш булып, яшьләр тамар.

Беренче мәхәббәт урамы
С.Солтанов музыкасы
Чакыра язмышым авазы...
Кайларга илтәсез, юлларым?
Ашкына ал кояш артыннан
Бәхеткә сусаган елларым.
Кушымта:
Ияреп хыялым артыннан
Дөньяны мең кабат урадым.
Күрмичә, сизмичә узганмын
Беренче мәхәббәт урамын.
Очрады бәхетле юлдашлар,
Ишеттем вәгъдәләр, ялганнар.
Хисләрем, йолдызлы кичләрем
Мәңгегә авылда калганнар.
Кушымта.
Чакыра язмышым авазы...
Дөньяны мең кабат урадым.
Кабул ит, мин кайтам яңадан,
Беренче мәхәббәт урамым!
Кушымта:
Ияреп хыялым артыннан
Дөньяны мең кабат урадым.
Кабул ит, мин кайтам яңадан,
Беренче мәхәббәт урамым!

Туган телдә дәшсәм генә...
Рәшит Абдуллин музыкасы
Каршы ала туган якта
Тургай тавышы.
Бары тургай аңлый бугай
Минем сагышны.
Сайра, тургай, мәңге сайра, —
Аңлыйм телеңне.
Син сайрасаң, дөнья ямьле,
Яшәү күңелле.
Кушымта:
Туган телдә җырлый чишмә,
Туган телдә шаулый таллар.
Туган телдә дәшсәм генә,
Туган җирем мине аңлар.
Сайрый тургай туган җирдә,
Шатлык түгелә.
Тургай җыры, тургай моңы
Минем күңелдә.
Җырлый бүген бөтен дөнья
Тургай телендә.
Мин кушылып җырлыйм аңа
Туган телемдә.
Кушымта:
Туган телдә җырлый чишмә,
Туган телдә шаулый таллар.
Туган телдә дәшсәм генә,
Туган халкым мине аңлар.

Оныт инде
Резедә Әхиярова музыкасы
Оныт мине, зинһар, оныт инде —
Утка яктым синең хатларны,
Утка яктым ялган вәгъдәләрне,
Утка яктым бергә чакларны.
Оныт мине, зинһар, оныт инде...
Җил тарата учак көлләрен.
Җилгә очты бөтен хыялларым,
Утта янды гашыйк көннәрем.
Оныт мине, зинһар, оныт инде,
Салма мине утлы күмергә.
Кайтып булмый узган мәхәббәткә,
Кайтып булмый узган гомергә.

Инеш
Рәшит Абдуллин музыкасы
Төштем инеш буена,
Суда таллар коена.
Син дә бүген тал янына
Килерсең күк тоела.
Кушымта: