Soñargan bähet
Avılga küptän gaz kerde.
Su da kapka töbendä,
Çuyırtaştan yul tözilär—
Türä tordı süzendä...
— Nindi bähet,— digän buldım,—
Cännätkä kerdegez bit.
Hıyalnıñ çınga aşkanın
Sez täki kürdegez bit!
Avıldaşlarnıñ yözendä
Bitaraflık bar sıman.
"Soñardı bähet, kartaydık..."—
Diyep uylıylar sıman.
Yäşlek
Beleştelär,
Küreştelär,
Köleştelär,
Kileştelär.
Ber-bersenä
Kereştelär.
Matur itep
Yöreştelär.
Kügärçendäy
Görläştelär.
Tañ atkançı
Serläştelär.
Kaçıp-posıp
Übeştelär.
Kayçaklarda
Könläştelär:
— Yaratmıysıñ,—
Diyeştelär.
Mähäbbättän
Köyeştelär.
Tormış şulay
Köylände.
Yeget kızga
Öylände.
Rähmät, ätkäy
Rähmät, ätkäy, ber eşkä dä
Bezne mäcbür itmägänseñ.
Ukırga dip, ällä kaya
Citäkläp tä yörtmägänseñ.
Tulısınça möstäkıyllek
Birgänseñ sin balalarga.
Çıgıp kitsäk tä irekle
İdek bit bez dalalarga.
Rähmät inde, ätkäy, siña,
Üzeñ garmun uynagansıñ.
Garmunımnı vatarlar dip,
Bezdän cıyıp kuymagansıñ.
Şul moñnarnı küñelebez
Señderep lä bargan ikän.
Ruhi dönyabız cirenä
Buraznalar yargan ikän.
Bezneñ belän gorurlıgıñ
Çıga ide yözläreñä.
Bähetle minutlarıñnı
Ukıy idek küzläreñdä.
Rähmät tıynaklıgıñ öçen,
Kötmädeñ sin bezdän türä.
Maksatıbız buy citmäslek
Tügel menä şuña kürä.
***
Min başka yul saylar idem
Aleksandr abıy bulsam,
Min utka hiç kermäs idem.
Gazinur abıy bulsam da,
Gaziz cannı birmäs idem.
Üz ilemne berkayçan da
Berkemgä dä satmas idem.
Ä şulay da kükräk belän
Utnı kaplap yatmas idem.
Min niçek tä saylar idem
Tugan ildä yäşäü yagın.
Tormıştan da qaderleräk
Cir yözendä ni bar tagın?!
***
Sez mine belmisez inde,
Ä min Sezne beläm.
Küpme vakıtım ütkäräm
Çönki Sezneñ belän.
Sezneñ belän kileşäm min,
Haklık Sezneñ yakta.
Miña kurkınıç yanamıy
Bergä bulgan çakta.
Söygän yarım tügel yuksa,
Ğaşıyq buldım Sezgä.
Äyläneplär kaytam bik yış
Haman üzegezgä.
Ä min Sezgä bilgesez ber
Ap-ak çäçle agay.
Sez minem öçen iñ yakın,
Qaderle Atnabay!
Salım
Yäşem illegä citkändä,
Min dä täki yort saldım.
Burıçlarga bata-bata
Tülädem aña salım.
Kürşelärdän kalıp bulmıy,
İske maşina aldım.
Niçek yäşerep kalasıñ—
Tagın tülädem salım.
Salımnarnı bertuktausız
Salalar da salalar.
Yarıy äle havası buş—
İrkenläp tın alalar.
Menä Salavat tülider
Salımnarnıñ sallısın.
Tikkä taşlap kitmägänder
Äle ul da Çallısın.
Kotkıga birelep ottım
Ker yuu poroşogı.
Salım tülärgä citmäde,
İ gönahım şomlıgı...
Hatın äytä, başka irlär
Eşläp toralar kalım.
Ber kön şabaşkada buldım:
Tabıp saldılar salım.
Salım tülärgä dä citmi
Abzarım tulı malım.
Tänemdä bulganda canım,
Taşlamas mine salım.
Baylarnıñ kolagına
Äy sez, baylar!
Ul baylıktan
Dan — şöhrät algaçtın,
Keşe kerep adaşırlık
Höcrälär salgaçtın,
Cir çitenä, diñgezlärgä
Yal itärgä bargaçtın,
Nindi uy — ğamällär belän
Yäşisez ikän tagın?
Uylap karıysızmı beraz
Halıkka yärdäm yagın?
Halıktan algan — halıkka.
Şulay tiyeş labasa.
Ä sezneñ berüzegezne
Baylık basa da basa.
Ul baylıknı, beläsez bit:
Bulmıy alıp kitep tä,
Eşläp tapkan häläl malnı
Pıran-zaran itep tä.
Balañ, yarıy, qader belsä,
Yugarı tökermäsä.
«Atay malı katay» diyep
Taratıp betermäsä.
İsemegez kalsın äle,
Kılıgızçı igelek.
Onıtmagız yätimnärne,
Balalarnı iñ elek.
Olılar da, keçelär dä
Sezne härçak sanlasın.
Üzegezgä rähät bulır,
Sezne halık danlasın.