Әй Кеше, кайларга юл тоттың

  — Әй Кеше, кайларга юл тоттың,
  Юк анда туганың-танышың?..
  
  — Чүлләрдә сусаган кешегә
  Чишмәдән су илтеп барышым.
  
  — Әй Кеше, кайларга юл тоттың.
  Юк анда туганың-танышың?
  
  — Ачлыктан тилмергән, йөдәгән
  Балага нан илтеп барышым.
  
  — Әй Кеше, кайларга юл тоттың,
  Юк анда туганың-танышың?
  
  — Диңгездә бәлагә очраган
  Корабка ярдәмгә барышым.
  
  — Әй Кеше, кайларга юл тоттың,
  Юк анда туганың-танышың?
  
  — Йорт-җирен су баскан кешегә
  Диварлар төзергә барышым.
  
  — Әй Кеше, кайларга юл тоттың,
  Юк анда туганың-танышың?
  
  — Барасы юлыма корылган
  Диварны сүтәргә барышым.