(yumoreska)
Barısı da näq anekdottagıça kilep çıktı: Fail söyärkäse belän karavatta gıyşık-mıyşık uynap yata ide, tegeneñ mucigı kaytıp kermäsenme?! Anekdotlardan ayırmalı bularak, ir, komandirovkadan tügel, ä tönge smenadan eştän genä kaytkan. Yugıysä, başka könnärdägeçä, döresräge, tönnärdägeçä, irtäräk çıgıp sıpırtkan bulsa, bu hälgä kalmıy da ide Fail. Yuk, bügen ozagrak yuandılar şul...
Kıñgıraunıñ tanış çıltıravın işetkän Mäçtürä: «İrem kayttı!» - dip çäçräp tordı da, çäçelep yatkan eçke kiyemnären tegennän-monnan cıygalap, kiyenä-kiyenä işekkä taşlandı. Mondıy çakta işekne ozaklap açmıyça torunıñ irendä şik uyataçagın belä ide täcribäle hatın. Failneñ:
- Ä miña nişlärgä soñ, kaya kaçarga?- digän soravına da, ul:
- Het şaytanıma olak şunda, änä balkonnan siker, tik küzemä genä kürenmä,- dip ısıldadı.
Nişläsen, Fail, külmäk-ıştanın kultık astına kıstırıp, balkonga çıktı da, tübängä küz saldı. Söyärkäläre berençe katta yäşäüçe muciklardan gomere buyı könläşep yäşäde ul. İçmasam, ikençe kat bulsın ide. Ä monda altınçı kat şul - sikersäñ, söyäkläreñne dä cıya almaslar.
Nihäl itmäk kiräk, bütän çarası kalmagaç, balkon räşätkäse aşa çıgıp, arataga nıklap yabışıp, kullarında asılınıp torırga mäcbür buldı Fail. Mäçtüräneñ Kälimullası, tönge smenadan arıp kaytkan, ozak tüzmäs, karavatka avar da, büränä söyri başlar, dip fiker yörtte ul üzençä. Yukka gına kön sayın turnikta künegülär yasamıy Fail, kullarında yartı säğat kenä asılınıp toruga tüzär anısı!
Bälki barısı da ul uylagança gına barır ide dä bit. Tik... Kiräk bit, näq şuşı vakıtta, bişençe katta, yağni mäsälän, şuşı kvartirdan astagı katta yäşäüçe Mälik tä tönge smenadan kaytıp kerä. Gönah şomlıgına karşı, anıñ hatını Säkinäneñ nıgrak yoklagan çagı ikän. İşekne tiz genä açmıy. Kıñgırau töymäsenä berniçä märtäbä basıp, şaktıy torgan Mälikneñ küñelenä şik töşä. Ul, işek açıluga, yokılı-uyaulı hatının çitkä etärep, iñ berençe eş itep, östäl, karavat asların, şifoner eçlären karap çıkkaç, tup-turı balkonga yünälä häm östän asılınıp torgan ike yalan täpine kürgäç, açudan ükerep cibärä:
- Ähä, kaptıñmı, işekne ozak açmıy torgaç, şiklängän idem anı! Kürmägänegezne kürsätäm häzer...
Mondıy çakta ir zatınıñ kulına eläkkänçe, altınçı kattan yıgıluıñ häyerleräk, dip uyladı Fail, kabat altınçı kat balkonına ürmäli-ürmäli.
Älege şau-şunı Mäçtürä belän Kälimulla da işetep algannar ide. Yögereşep balkonga çıktılar.
- Närsä, Mälik hatını belän tottımı ällä üzeñne? - dip soradı Kälimulla, kurkudan der kaltıranıp toruçı Faildän.
- Yuk... To-totmadı...
Tik şunda Mäçtüräneñ üzenä küze belän kadalıp, sizdermiçä genä närsäder ımlap mataşuın kürep:
- Ä, äy-ye! Şulayrak buldı şul,- dip tözätte.
Kälimullaga karşısında basıp torgan älege mucik, ni öçender, kızganıç bulıp toyıldı bu minutlarda. Äye, Mälik kulına eläksä, bäräçäk tä üteräçäk monı. Çıgarıp cibärergä kiräk biçaranı, dip uyladı ul...
Östenä kiyemnären elgäläp, aşıgıp çıgıp kitkän Fail artınnan işekne bikläp kalgan Kälimulla: «Nik ällä kem hatınnarı öçen adäm canın kıydırtırga, minem Mäçtürä belän yoklamagan läbasa ul», - dip uyladı da, nazlı gına itep Mäçtüräseneñ bilennän koçıp aldı.