Ачылды, кар эреп, таулар, тугайлар

  ****
  
  Ачылды, кар эреп, таулар, тугайлар.
  Суык көннәр үтеп, кышлар да бетте.
  Исән җаннар күрер тиз якты айлар,
  Биш-ун көннән мона майлар да җитте.
  
  ***
  
  Түкте кояш нурларын алтын-сары,
  Тауларның бетте эреп салкын кары.
  Күтәрелде күк йөзенә сабан тургай,
  Ишетелде чырлап түккән моңлы зары.
  
  ***
  
  Таулы матур илләрендә
  Гөрли агым сулары;
  Тонык ялтыр күлләрендә
  Каңгылдый аккулары.
  
  ***
  
  Көлемсерәп, көн башланды,
  Җәйге күркәм таң белән;
  Япраккайлар да яшьләнде,
  Һәм тибрәнде күк үлән.
  
  ***
  
  Чыкты кояш кызарып, нурлар очты,
  Бизәнде тау, бизәнде кыр, гөлләр үсте.
  Һава тымык, шылт итми... үләннәр — чык,
  Җып-җымылдап уйныйдыр җирнең өсте.
  
  ***
  
  Болыт үтте. Гөмберли күк еракларда.
  Сил шаулый, сулар гөрли болакларда.
  Тавышы — колакларда...
  озакларда...